Kichay leenaykipaq

Índice nisqaman riy

 14 CAPÍTULO

Jesús discipulonkunata ajllayta qallarin

Jesús discipulonkunata ajllayta qallarin

JUAN 1:29-51

  • JESUSPA ÑAUPAQ KAQ DISCIPULONKUNA

40 p’unchay ch’inneqpi kamusqanmantan Jesusqa bautizaq Juanman kutimuran. Jesús achhuykamushaqtinmi Juanqa payta señalaspa chaypi kashaqkunata niran: “¡Qhawariychis, paymi Diospa corderonqa, paymi kay pachamanta juchata chinkachinqa! Paymantan noqaqa nirani: ‘Qhepaytan juj runa jamushan, paymi ñauparamuwan noqamanta ñaupaqta kausasqanrayku’”, nispa (Juan 1:29, 30). Juanqa yacharanmi Jesusqa ñaupaqmantaña cielopi kausasqanta, chaymi chhaynata niran.

Jesús bautizachikuq jamuqtinmi ichaqa mana yacharanchu paypunichus Mesías karan icha manachus chayta. Chaymi niran: “Manan ni noqapas paytaqa reqsiranichu, ichaqa Israelpi reqsisqa kananpaqmi unupi bautizaspa jamurani”, nispa (Juan 1:31).

Chaymantan Juanqa willaran imas pasaran Jesusta bautizashaqtin chayta. Niranmi: “Santo espiritutan rikuni cielomanta paloma jina uraykamushaqta, pay patapi tiyaykuqtawan. Manan ni noqapas paytaqa reqsiranichu, unupi bautizanaypaq kachamuwaqniymi ichaqa niwaran: ‘Pimanchus santo espíritu uraykamuspa pay patapi tiyaykuqta rikunki, chaymi santo espirituwan bautizaqqa kanqa’, nispa. Noqaqa rikunipunin chayta, chaymi willani payqa Diospa Churin kasqanta”, nispa (Juan 1:32-34).

Paqaristin p’unchay Juan iskay discipulonkunawan kashaqtinmi Jesusqa payman jamullarantaq. Jinan Juanqa discipulonkunata niran: “¡Qhawariychis, paymi Diospa corderonqa!”, nispa (Juan 1:36). Chayta niqtinmi paykunaqa Jesuspa qhepanta riranku. Jujninmi karan Andrés, jujnintaq kanman karan Juan librota qelqaq, sutinqa Juanllataqmi karan. Chay Juanmi Jesuspa primon kanman karan. Paypa mamanmi karan Zebedeoq esposan Salomé, Salometaq Mariaq ñañan kanman karan.

Andresta Juantawan qhepanta jamushaqta rikuspan Jesusqa paykunata tapuran: “¿Imatan munashankichis?”, nispa.

Jinan paykunaqa niranku: “Rabí, ¿maypitaq alojakushankiri?”, nispa.

Chaymi Jesusqa niran: “Jaku rikuchimusaykichis”, nispa (Juan 1:37-39).

Chay ratoqa las cuatro tardeñan kasharan. Andreswan Juanwanqa Jesuswanmi chay p’unchaypi qhepakuranku. Chaypin Andresqa wayqen Pedrota maskhaq riran, tarispataq: “Mesiastan tariramuyku”, niran (Juan 1:41). Jinaspa Jesusman pusamuran. Chay kutipin Juanpas rinman karan wayqen Santiagota maskhaq, jinaspa pusamunman karan. Qelqasqan libropin ichaqa mana chaymanta ima niranpaschu.

Qhepantin p’unchaymi Jesusqa Felipeta tarispa niran: “Qatikamuway”, nispa (Juan 1:43). Payqa Betsaida llaqtamantan karan. Chayqa  Galilea qochaq cercallanpin kasharan. Chay llaqtamantan Andrespas Pedropas karanku.

Chaymantan Felipeqa Bartolomé sutiyoq Natanaelta maskhaspa niran: “Pimantachus Moisesqa kamachikuy simipi qelqaran, jinallataq profetakunapas qelqaranku chaytan tariramuyku, Josepa wawan Nazaret llaqtayoq Jesusta”, nispa. Natanaeltaq ichaqa niran: “¿Kanmanchu Nazaret llaqtamanta ima allinpas?”, nispa.

Chaymi Felipeqa: “Jakuyá, rikuchimusayki”, niran. Jinaspa Jesusman pusaran. Natanael payman jamushaqta rikuspan Jesusqa niran: “Qhawariychis kay Israel runata, paypiqa manapunin engaño kanchu”, nispa.

Jinan Natanaelqa niran: “¿Imaynapitaq reqsiwankiri?”, nispa.

Jesustaq niran: “Manaraq Felipe wajamushasuqtiykin noqaqa rikumuyki higos sach’a k’uchupi kashaqta”, nispa.

Jinan Natanaelqa niran: “Yachachikuq, qanqa Diospa Churinmá kasqanki, Israelpa reyninmá kasqanki”, nispa.

Jesustaq niran: “¿‘Higos sach’a k’uchupin rikumuyki’ niqtiychu creenki? Chaykunamanta aswan admiranapaq kaqkunataraqmi rikunki. Cheqaqtapunin niykichis: Cielotan kicharayashaqta rikunkichis, rikullankichistaqmi Diospa angelninkunatapas runaq Churinman uraykamushaqta wichashaqtawan”, nispa (Juan 1:45-51).

Chay qhepallatan Jesusqa chay discipulonkunawan kuska Galilea provinciata ripuran.