Kichay leenaykipaq

Índice nisqaman riy

 10 CAPÍTULO

Jerusalén llaqtata rinku

Jerusalén llaqtata rinku

LUCAS 2:40-52

  • WAYNACHALLARAQ KASHASPA JESÚS YACHACHIQKUNATA TAPUN

  • JESÚS JEHOVÁ DIOSMANTA ‘YAYAYMI’ NIN

Jerusalenpi Pascua fiestaman rinapaq tiempon chayamuran, Jesuspas 12 watanpiñan kasharan. Joseqa Diospa kamachikuyninman jinan sapa wata familianwan, amigonkunawan, juj parientenkunawan ima chay fiestaman riqku (Deuteronomio 16:16). Chay fiestaman riyqa ancha kusikunapaqmi karan. Nazaretmanta Jerusalenkamaqa 120 kilómetro jinan karan purinapaq. Maytachá Jesusqa munasharan wajmanta chay fiestapi temploman riyta.

Pascua fiestaman riyqa manan juj p’unchayllapaqchu karan. Pascua fiestaman qatiq p’unchaypin qallariq juj fiestapas, “mana levadurayoq t’anta mijuna fiesta”, chay fiestataqa qanchis p’unchaymi ruwakuq (Marcos 14:1). Chhaynaqa riynintin kutimuynintinpiwanqa iskay semana jinan karan. Chay watapin ichaqa Josewan Mariawan astawan tardamuranku Jesuswan imachus pasasqanrayku.

Nazaretman kutipushaqtinkun Jesusqa mana Josewan Mariawan kuskachu kashasqa. Chaywanpas paykunaqa “jujkunawanchá jamushan” nispan purishallaranku. Ch’isinkama Jesús mana rijuriqtintaq paykunaqa familiankuna ukhupi maskhayta qallariranku, ichaqa manapunin maypipas tarirankuchu. Chaymi paykunaqa Jerusalenta kutiranku maskhaq.

Chaypin ch’isiyaqta Jesusta maskharanku, ichaqa manan tarirankuchu. Paqaristinpas wajmantan maskhallarankutaq, ichaqa manan tarillarankutaqchu. Kinsa kaq p’unchaypiñan Jesusta templopi tariranku. Chaypin payqa yachachiqkuna ukhupi tiyashasqa paykunata uyarispa, tapuspa ima, chay yachachiqkunataq anchata admirakushasqaku imatapas allinta entiendesqanmanta.

Jinan Mariaqa Jesusta niran: “Wawalláy, ¿imaraykutaq kaytari ruwawankiku? Qhawariy, papaykiwan kuskan sinchi llakisqa maskhaykamushaykiku”, nispa (Lucas 2:48).

Jesustaq maypichus kashasqanta mana yachasqankumanta admirakuspa niran: “¿Imaraykun maskhamuwarankichis? ¿Manachu yacharankichis Yayaypa wasinpi kashanayta?”, nispa (Lucas 2:49).

Jinan Jesusqa tayta-mamanwan kuska Nazaretman kutipuran. Payqa kasukushallaranpunin paykunata. Jinaspapas allintan cuerponpipas yachayninpipas wiñasharan. Waynachallaraq karan chaypas, sumaq qhawarisqan karan Diospa ñaupanpipas runakunaq ñaupanpipas. Jesusqa juch’uychanmantapachan Diosmanta yachayta munaran, tayta-mamantapas respetaranmi. Chhaynapin payqa allin ejemplota churaran.