Kichay leenaykipaq

Índice nisqaman riy

 123 CAPÍTULO

Sinchi llakisqa kashaspa Diosmanta mañakun

Sinchi llakisqa kashaspa Diosmanta mañakun

MATEO 26:30, 36-46 MARCOS 14:26, 32-42 LUCAS 22:39-46 JUAN 18:1

  • JESÚS GETSEMANÍ HUERTAPI MAÑAKUN

  • JESUSPA JUMP’IN YAWAR JINARAQ PAMPAMAN SUT’URIN

Jesús apostolninkunapiwan Diosmanta mañakuyta tukuspankun ‘Dios jatunchana takikunata takiranku, jinaspa Olivos orqoman riranku’ (Marcos 14:26). Chhaynapin chayaranku “Getsemaní” nisqa pataman, chaymanqa rillaqkupunin paykunaqa.

Chaypin Jesusqa pusaq apostolkunata juj partepi saqeran: “Kayllapi tiyashankichis, jaqayman rispa Diosmanta mañakamushanaykama”, nispa. Jinaspa Pedrota, Santiagota, Juantawan pusarikuspa aswan ukhuman riranku. Chaypin kinsantinkuta sinchi llakisqa niran: “Llakikuymantan sonqoy phatarunqaña, kayllapi kashaychis, ichaqa noqa jinan rijch’ashallankichis”, nispa (Mateo 26:36-38).

Juj chikan ñaupaqman rispataq pampakama k’umuykuspa mañakuyta qallariran: “Papáy, qanpaqqa tukuy imapas atikuqmi; kay copata noqamanta karunchay. Ichaqa ama munasqaychu kachun, aswanpas qanpa munasqayki kachun”, nispa (Marcos 14:35, 36). ¿Manaña wañuyta munaspachu Jesús chayta nisharan? Manan.

Aswanmi payqa llakisqa kasharan Yayanpa sutin imayna qhawarisqa kananmanta. Paytaqa Diosta k’amiq millay runata jinan k’aspipi warkuspa wañuchinanku karan, chaymi payqa llakisqa kasharan chaywan Diospa sutin k’amisqa kananmanta. Chaymantapas cielopi kashaspaqa rikuranchá imaynas Roma soldadokunaqa mana khuyapayaspa ñak’arichispa ima runakunata wañuchiqku chayta. Chayraykupiwanchá payqa llakisqa kasharan. Payqa runalla kashaspaqa yacharanmi imaynas nanay chayta.

Mañakuyta tukuspan payqa kinsa apostolninkunaq kasqanman achhuykuran, ichaqa puñushaqtan tariran, chaymi Pedrota niran: “¿Manachu juj horallatapas rijch’asqalla kayta atirankichis? Rijch’ashallaychis, mañakushaychistaq ama tentacionman urmanaykichispaq”, nispa. Chaywanpas payqa yacharanmi paykunapas llakisqa kasqankuta, sinchi tutañan kasharanpas. Chaymi niran: “Sonqoqa munallanpunin, cuerpon ichaqa mana kallpayoq”, nispa (Mateo 26:40, 41).

Chaymantataq Jesusqa wajmanta riran Diosmanta mañakuq, chay kutipipas mañakuranmi: “Kay copata noqamanta karunchay”, nispa. Chaymanta kutimuspataq wajmanta apostolkunata puñushaqta tariran Diosmanta mañakunanku kashaqtin. Chaymi paykunaqa “mana ima niytapas atirankuchu” (Marcos 14:40). Jinan Jesusqa juj kutitawan riran mañakuq, payqa qonqorikuspan mañakusharan.

Payqa ancha llakisqan kasharan juchasapa jina wañuchisqa kananwan Yayanpa sutin p’enqayman churasqa kananmanta. Jehová Diosqa uyarisharanmi mañakusqanta, chaymi juj angelta kacharan payta kallpachananpaq. Chaywanpas Jesusqa “astawanraq tukuy sonqowan mañakuran”. Paypa wañunanmantan dependeran kausayninpas lliu runaq kausayninpas.  Chayta yachaspan payqa sinchi llakisqa kasharan, chaymi ‘jump’inpas yawar jinaraq pampaman sut’uran’ (Lucas 22:44).

Kinsa kutipi kutimuspanmi Jesusqa wajmanta apostolkunata puñushaqta tariran, chaymi paykunata niran: “¿Khayna tiempo kashaqtinchu puñushankichispas samashankichispas? Ñan hora chayaramunña runaq Churin juchasapakunaq makinman jap’ichisqa kananpaq. Jatariychis, jaku, jap’ichiwaqniyqa ñan chayaramunña”, nispa (Mateo 26:45, 46).