Kichay leenaykipaq

Índice nisqaman riy

 93 CAPÍTULO

Jesús riman jamuq tiempopi rikuchikunanmanta

Jesús riman jamuq tiempopi rikuchikunanmanta

LUCAS 17:20-37

  • “DIOSPA GOBIERNONQA QANKUNA CHAUPIPIN KASHAN”

  • ¿IMAYNAN KANAN KARAN JESUSPA RIKUCHIKUNAN P’UNCHAY?

Jesusqa Samariapi otaq Galileapin kashanman karan. Chaypin fariseokunaqa tapuranku Diospa gobiernonmanta, chaymi Jesusqa niran: “Diospa gobiernonqa manan llapa runaq reparananpaq jinachu jamunqa, nitaq pipas ninqachu: ‘¡Qhawariychis, kaypin kashan!’ otaq ‘¡jaqaypin kashan!’, nispaqa. Diospa gobiernonqa qankuna chaupipin kashan”, nispa (Lucas 17:20, 21).

Wakin runakunaq piensasqanman jinaqa runaq sonqonmantas Jesusqa rimashanman karan “qankuna chaupipi kashan” nisqanwan. Ichaqa manan chaymantachu rimasharan. Diospa gobiernonqa manapunin chay fariseokunaq sonqonpichu kashanman karan. Aswanmi Jesusqa pay kikinmanta rimasharan, paymi Diospa ajllasqan rey jina chay runakuna chaupipi kasharan (Mateo 21:5).

Chaymantan Jesusqa discipulonkunaman willaran Diospa gobiernon chayamunanmanta, niranmi: “Tiempon chayamunqa, chaypin qankunaqa runaq Churinpa jujnin p’unchayninta rikuyta munankichis, ichaqa manan rikunkichischu”, nispa (Lucas 17:22). Chaywanmi Jesusqa rikuchisharan qhepamanña Diospa gobiernonpi kamachinanta. Wakin discipulonkunan ichaqa anchata chayta rikuyta munasharanku, ichaqa pacienciawanmi suyananku karan Diospa ajllasqan tiempopi Jesús chayamunanta.

Jesusqa nillarantaqmi: “Runakunan nisunkichis: ‘¡Qhawariychis, jaqaypin kashan!’ otaq ‘¡kaypin kashan!’, nispa. Ichaqa aman creenkichischu, amataq qhepankutapas phawankichischu. Imaynan llifllikiyqa cieloq juj ladonmanta cieloq juj ladonkamaraq k’ancharin, chhaynallataqmi kanqa runaq Churinpa p’unchayninpipas”, nispa (Lucas 17:23, 24). Paypa kutimuyninqa llifllikiy jina sut’i reparaymi kanan karan, chaytan Jesuspa discipulonkunaqa allinta entiendenanku karan, chhaynapi llulla mesiaskunawan mana engañachikunankupaq.

Chaymantan Jesusqa niran: “Imaynan Noepa p’unchayninkunapi karan, chhaynallataqmi runaq Churinpa p’unchayninkunapipas kanqa [...]. Chhaynallataqmi Lotpa p’unchayninkunapipas karan; runakunan mijusharanku, ujasharanku, rantisharanku, vendesharanku, tarpusharanku, wasitapas ruwasharanku. Sodoma llaqtamanta Lotpa lloqsimusqan p’unchaymi ichaqa cielomanta azufreyoq nina para chayamuran, jinaspa llapankuta ch’usaqyachipuran. Chhaynallataqmi kanqa runaq Churinpa rikuchikunan p’unchaypipas”, nispa (Lucas 17:26-30).

Noepa Lotpa tiemponpi runakunaqa manan mijusqankuraykuchu, ujasqankuraykuchu, ni chay jina ruwaykunata ruwasqankuraykuchu wañuranku. Noepas Lotpas ruwarankuchá chaykunataqa. Aswanmi chay runakunaqa wañuranku  Diospa munayninta mana ruwasqankurayku, ima tiempopichus kausashasqankuta mana reparasqankurayku ima. Chaykunamanta willaspan Jesusqa discipulonkunata kallpachasharan tukuy yuyaywan Diospa munayninta ruwanankupaq, chhaynapi Diospa phiñakuynin p’unchaymanta salvasqa kanankupaq.

Jesuspa discipulonkunaqa manan kay pachapi saqesqankunatachu munapayashananku karan, chaymi Jesusqa niran: “Chay p’unchaypiqa wasi patapi kashaqqa amaña uraykuchunchu kaqninkunata orqomunanpaq, jinallataq chajrapi kashaqpas amaña kutimuchunchu ima saqesqanmanpas. Lotpa esposanta imachus pasasqanta yuyariychis”, nispa (Lucas 17:31, 32). Imachus saqesqankunata munakusqanraykun Lotpa esposanqa kachiman tukupuran.

Jesusqa nillarantaqmi: “Chay tutapin juj puñunapi iskay kashanqaku; jujninmi apasqa kanqa, jujnintaq saqerparisqa kanqa”, nispa (Lucas 17:34). Chhaynaqa wakinmi salvasqa kanan karan, wakintaq ichaqa wañunanku karan.

Jinan Jesuspa discipulonkuna tapuranku: “Señor, ¿maypin chay kanqa?”, nispa. Jesustaq paykunata niran: “Maypichus wañusqa cuerpo kashanqa, chaypin ankakunapas juñukunqa”, nispa (Lucas 17:37). Jesuspa discipulonkunaqa anka jina ñawiyoq kaspanku cheqaq Cristoman juñukunanku karan, paytaq wiñay kausayman apaq mijunata qonan karan.