Sikayoran Kalangweran, Idayew Yo si Jehova!
Sikayoran Kalangweran, Idayew Yo si Jehova!
“Idayew yo si Jehova manlapu dia ed dalin, sikayo a . . . tobonbalo a lalaki, tan birhenes.”—SALMO 148:7, 12.
1, 2. (a) Dakel a kalangweran so mikabisado ed antoran panameget? (b) Akin a nepeg ya agpanermenan na saray kalangweran so panameget na atateng da?
DIAD mabetbet et amta la na saray kalangweran no anto so agni niyabuloy ed sikara. Dakel ed sikara so makapangibagan tampol no kapigan ira nayarin ombaliw a bukor ed karsada odino anggad anton oras ira nayarin aliing ed labi odino naabuloyan a manmaneho na luganan. No maminsan, nayarin isipen na sakey a tobonbalo a maslak ed saray kerew to et walaan na saksakey ya ebat, “Manalagar ka anggad ibaleg mo.”
2 Sikayoran kalangweran, amta yon nononoten na atateng yo a makabat iratan a panameget, lapud satan so proteksion ed sikayon mismo. Seguradon amta yo met a manliket si Jehova sano unoren yo iray atateng yo. (Colosas 3:20) Balet, iisipen yo kasi a kaukolan yo ni so manalagar pian nigapo so “peteg” a bilay yo? Kasin amin ya importantin bengatla et sebel ed sikayo anggad nasabi yo so suston edad? Aliwan tua itan! Wala so kimey natan a mas importante ni nen say antokaman a pribilehyo a nayarin pipirawaten yo. Sikayoran kalangweran, kasin naabuloyan kayo lan mibiang ed sayan kimey? Aliwa lambengat ya ontan noagta diad tua et iimbitaan kayo na mismon Sankatageyan a Dios a manggawa ed satan!
3. Iimbitaan nen Jehova iray kalangweran a nawalaan na anton pribilehyo, tan antoran tepet so ikonsidera tayo natan?
3 Anton kimey so tutukoyen tayo? Imanoen pa iray salita ed teksto na tema ed sayan artikulo tayo: “Idayew yo si Jehova manlapu dia ed dalin, sikayo a . . . tobonbalo a lalaki, tan birhenes; mamasiken, tan saray ugugaw.” (Salmo 148:7, 12) Saya so abalbaleg a pribilehyo yo: Nayarian yon idayew si Jehova. Bilang kalangweran, panliliketan yo kasi so mibiang ed satan a kimey? Dakel a kalangweran so naliliketan ed satan. Pian natebek tayo no akin a makatunongan itan a liknaan, ikonsidera tayo so taloran tepet. Unona, akin a nepeg yon idayew si Jehova? Komadua, panon so epektibon pakapangidayew yo ed sikato? Komatlo, kapigan so maabig ya igapo yon mandayew ed si Jehova?
Akin ya Idayew si Jehova?
4, 5. (a) Unong ed koma-148 a Salmo, wala itayo ed anton makapadinayew a kipapasen? (b) Panon a makapangidayew ed si Jehova iray pinalsa ya agmakapansalita odino agmakapankatunongan?
4 Say alay abig a rason no akin ya idayew si Jehova et lapud sikato so Manamalsa. Ontulong ed sikatayo so koma-148 a Salmo pian niyapasakey iyan katuaan. Isipen pa labat: No inmasingger ka ed sakey a baleg a grupo na totoo a bansag a mangakansion na balibali tan makapasagyat a kanta, anto so liknaan mo? Panon to no amtam a saray liriko na kanta et tudtua, a mangibabalikas na saray punton amtam ya importante, makapaliket, tan makapabiskeg? Pampilalekan mo kasi ya aralen iray liriko tan mibansag ka met? Ontan so gawaen na maslak ed sikatayo. Bueno, ipapabitar na koma-148 a Salmo a wala kayo ed ontan a kipapasen balet ta mas makapadinayew ni. Dedeskribien na satan a salmo so dakerakel ya ulop na totoo, a nankakasakey a mangidadayew ed si Jehova. Balet, legan yon babasaen iyan salmo, nayarin walay nikadkaduman naimano yo. Anto iman?
5 Dakel ed saray mangidadayew ya adeskribe ed Salmo 148 so agmakapansalita odino agmakapankatunongan. Alimbawa, nabasa tayo a say agew, bulan, bibitewen, niebe, dagem, kapalandeyan, tan pukpukdol et mangidadayew ed si Jehova. Panon itan a nagawaan na sarayan andiay-bilay a pinalsa? (Bersikulo 3, 8, 9) On, ontan met so gagawaen na saray kakiewan, pinalsa ed dayat, tan ayayep. (Bersikulo 7, 9, 10) Kasin akanengneng kayo la na alay dakep ya iseselek na agew odino atangay yo la so tibtibukel a bulan (tulaw) ya apaliberan na dakerakel a bitewen odino mankarekkek kayo ed liket lapud panggagalaw na ayayep odino mandinayew kayo ed marakdakep a lugar? Diad ontan et “nadngel” yo la so kanta na panangidayew na saratan a pinalsa. Amin a pinalsa nen Jehova so mangipapanonot ed sikatayo a sikato so makapanyarin-amin a Manamalsa, ya anggapo ed interon uniberso so ontan lan makapanyari, makabat, odino maaro.—Roma 1:20; Apocalipsis 4:11.
6, 7. (a) Antoran intelihentin pinalsa so dedeskribien na Salmo 148 a mangidadayew ed si Jehova? (b) Akin a nayarin napakiwas itayon mangidayew ed si Jehova? Iyilustra.
6 Dedeskribien met na koma-148 a Salmo iray intelihentin pinalsa a mangidadayew ed si Jehova. Diad bersikulo 2, nabasa tayon saray mangatatawen ya “armada” nen Jehova, salanti, saray anghel et mangidadayew ed sikato. Diad bersikulo 11, saray makapanyari tan maimpluensyan totoo, a singa say arari tan uko-ukom, so naimbitaan a mibiang ed panangidayew. No panliliketan na saray makapanyarin anghel so pangidayew ed si Jehova, wala ta so toon makapangibaga a sikato et importantin tuloy pian gawaen itan? Insan, diad bersikulo 12 tan 13, sikayoran kalangweran et naimbitaan a mibiang tan mangidayew met ed si Jehova. Kasin apakiwas kayo lan manggawa ed satan?
7 Konsideraen pa so sakey ya ilustrasyon. No walay maapit a kaarom a walaan na alay abig a dunong—a nayarin diad isport, art, odino musika—agmo ta itongtong itan ed kapamilyam tan arum niran kakaarom? Seguradon itongtong mo. Bueno, ontan met so nayarin epekto ed sikatayo sano naaralan tayo so amin a ginawa nen Jehova. Alimbawa, ibabaga na Salmo 19:1, 2 a say mabitewen a katawenan et mangisagyat na ‘pangibesngaw na salita.’ Parad sikatayo, sano isipen tayo iray makapakelaw a ginawa nen Jehova, seguradon ag-itayo napokpokan ya itongtong ed arum a totoo so nipaakar ed Dios tayo.
8, 9. Antoray rason no akin a labay nen Jehova a sikatoy dayewen tayo?
8 Say sananey nin alay abig a rason no akin ya idayew tayo si Jehova et lapud pagagawa to itan ed sikatayo. Akin? Kasin lapud nakakaukolan to so panangidayew na totoo? Andi. Sikatayon totoo et nayarin mankaukolan no maminsan na panangirayew, balet si Jehova so mas atagtagey nen say sikatayo. (Isaias 55:8) Anggapo so panduaruwa to nipaakar ed inkasikato odino ed saray kalidad to. (Isaias 45:5) Ingen ta labay ton sikatoy dayewen tayo tan panliketan to itan no gawaen tayo. Akin? Konsideraen tayo so duaran rason. Unona, amta to a sikatoy nakaukolan tayon dayewen. Denesinyo to itayon walaay espiritual a pankaukolan, say pankaukolan a mandayew. (Mateo 5:3) Napaliket si Jehova no nanenengneng ton pepeneken tayo itan a pankaukolan, a mipadpara ed panliket na atateng yo sano nanengneng dan kakanen yo so tagano ya amta ran masustansia parad sikayo.—Juan 4:34.
9 Komadua, amta nen Jehova a nakaukolan a narengel na arum a totoo so pangidadayew tayo ed sikato. Onia so insulat nen apostol Pablo ed malangwer nin Timoteo: “Imatonan mo so kaabigan na laman mo tan say ibabangat mo. Mansiansia ka ed sarayan bengatla; ta no gawaen mo so saraya, nilaban mo so inkasika tan saray ondengel met ed sika.” (1 Timoteo 4:16) On, sano ibangat yo so arum nipaakar ed si Jehova a Dios, a sikatoy dayewen tayo, nakabat da met si Jehova. Satan a pikakabat so mangitonton ed andi-anggaan a kilalaban da!—Juan 17:3.
10. Akin a napakiwas itayon mangidayew ed Dios tayo?
10 Wala ni so sananey a rason no akin ya idayew si Jehova. Nanonotan yo so ilustrasyon nipaakar ed marundunong a kaaro yo. No walaray narengel yon mangibaga na katilaan nipaakar ed sikato, a papaugesen da so maong a ngaran to, agta lalon determinado kayon mangibaga na positibo nipaakar ed sikato? Bueno, si Jehova et malaklaknab lan papaugesen ed sayan mundo. (Juan 8:44; Apocalipsis 12:9) Saramay mangaaro ed sikato sirin so napakiwas a mangibaga na katuaan nipaakar ed sikato, ya ipetek da so lingon impormasyon. Labay yo met kasin ipanengneng so panangaro tan apresasyon yo ed si Jehova, ya ipatnag yon sikato so labay yon Manuley imbes a say manunan kabusol to, si Satanas? Nagawaan yo itan ya amin diad pangidayew ed si Jehova. Say ontumbok a tepet sirin et no panon so pangidayew yo ed sikato.
No Panon so Impangidayew na Arum a Kalangweran ed si Jehova
11. Antoran alimbawa ed Biblia so mangipabitar ya epektibon tuloy iray kalangweran diad panangidayew ed si Jehova?
11 Ipapatnag na Biblia a saray kalangweran et epektibon tuloy diad panangidayew ed si Jehova. Alimbawa, walay sakey ya Israelitan ugaw a bii a kinautibo na saray Siryano. Sikato so makpel a nantasi ed amo ton bii nipaakar ed si Eliseo, a propeta nen Jehova. Saray imbaga to so nanresulta ed sakey a milagro, tan niiter so mapuersan pantasi. (2 Arari 5:1-17) Si Jesus so makpel met a nampulong sanen sikatoy ugaw ni. Diad amin ya ebento nipaakar ed inkatobonbalo to a nayarin ikurit komon ed Kasulatan, pinili nen Jehova imay inkagawa sanen makpel a nantepet so 12-años a Jesus ed saray relihyoson managbangat diad templo na Jerusalem tan nankelkelawan da so pakatalos to ed saray dalan nen Jehova.—Lucas 2:46-49.
12, 13. (a) Anto so ginawa nen Jesus diad templo sakbay a tuloy na impatey to, tan anto so epekto na satan ed saray totoon wadman? (b) Anto so inisip nen Jesus nipaakar ed panangidayew na saramay ugugaw a lalaki?
12 Sanen binmaleg lay Jesus, sinagyat to met iray ugugaw a mangidayew ed si Jehova. Alimbawa, pigaran agew ni sakbay na impatey to, si Jesus so angigana na panaon diad templo ed Jerusalem. Ibabaga na Biblia a sikatoy nanggawa na ‘makapakelaw iran bengatla’ diman. Pinapaway to iramay totoon nanggawa ed satan a sagradon pasen bilang ungib na matatakew. Pinaabig to met iray bulag tan piley. Amin a wadman, nagkalalo la ed saray relihyoson lider, so apakiwas komon a mangidayew ed si Jehova tan ed Anak to, say Mesias. Balet, makapaermen ta dakel a totoo ed saraman a panaon so ag-angibalikas na ontan a panangidayew. Amta ra a si Jesus et imbaki na Dios, balet ta tinmakot ira ed saray relihyoson lider. Balet, walay sakey a grupo na totoo a makpel a nansalita. Amta yo no siopa ira? Oniay ibabaga na Biblia: “Sanen saray manunaan na saray saserdote tan saray eskriba anengneng da so saray makapakelaw a bengabengatla a ginawa [nen Jesus], tan saray ugugaw a maniingal dia ed templo tan kuan da, Hosanna ed anak nen David; asanokan ira. Tan inkuan da’d [si Jesus], Narengel mo no antoy ibabaga na saraya?”—Mateo 21:15, 16; Juan 12:42.
13 Iilaloan na saratan a saserdote a patundaen nen Jesus iratan ya ugugaw a mangidadayew ed sikato. Onman kasi so ginawa to? Andin balot! Oniay inyebat nen Jesus ed saray saserdote: “On; agyo ta’n balot abasa, Dia ed sangi na saray ugugaw tan saray mansuso niyadyarim so panangigalang?” Malinew, si Jesus tan say Ama to so aliketan ed panangidayew na saratan ya ugugaw a lalaki. Ginawa na saratan ya ugugaw so nepeg komon a gawaen na amin a wadman a wala la’d edad. Anggaman ed malangwer niran kanonotan da, ompatnag a malinlinew itan ed sikara. Anengneng da iyan too a nanggawa na makapakelaw iran bengatla, nansalita tekep na inkakpel tan pananisia, tan angipatnag na pirmin panangaro ed Dios tan ed totoo to. Sikaton mismo so angikuan a sikato imay insipan ya “anak nen David,” say Mesias. Atumangan so pananisia na saraman ya ugugaw a lalaki lapud awalaan ira na pribilehyon manumpal ed propesiya.—Salmo 8:2.
14. Panon a nakinlongan iray kalangweran ed saray langkap a walad sikara pian nidayew so Dios?
14 Anto so naaralan tayo ed saratan ya alimbawa? Saray kalangweran et nayarin magmaliw ya epektibon tuloy ed panangidayew ed si Jehova. Mabetbet et walaan ira na langkap a makatalos ed katuaan diad malinew tan simplin paraan, a nibalikas da so pananisia ra tekep na inkasimoon tan seseg. Walaan met ira na langkap ya asalambit ed Uliran 20:29: “Say gayaga na saray tobonbalon lalaki sikato so biskeg da.” On, sikayoran kalangweran so apalaboan na biskeg tan kasil, a talagan mausausar ed panangidayew ed si Jehova. Panon yon espisipikon nausar iratan a langkap diad epektibon paraan?
Panon Yon Nidayew si Jehova?
15. Pian nidayew si Jehova ed epektibon paraan, anton motibo so nakaukolan?
15 Say pagmaliw ya epektibo et onggapo ed puso. Agyo nidayew si Jehova diad epektibon paraan no gagawaen yo lambengat itan lapud labay na arum a gawaen yo itan. Tandaan a say sankabalegan ed amin a ganggan et saya: “Aroen mo so Katawan a Dios mo ed masimoon a pusom, tan dia ed masimoon a kamarerwam, tan dia ed masimoon a nonot mo.” (Mateo 22:37) Kasin personal yo lan akabat si Jehova diad panaaral yon mismo ed Salita to? Say manepeg a resulta na satan a panagaral et say liknaan na panangaro ed si Jehova. Say natural a paraan pian nipatnag itan ya aro et diad pangidayew ed sikato. No say motibo yo et malinew tan mabiskeg, akaparaan kayo lan mangidayew ed si Jehova diad maligsan paraan.
16, 17. Anto so betang na kondukta diad panangidayew ed si Jehova? Iyilustra.
16 Natan, sakbay yo ni ingen a nonoten so ibaga yo, isipen la no panon so ikiwas yo. No samay Israelitan ugaw a bii ed panaon nen Eliseo et agmakalakal, agmarespeto, odino agmatua so ugali to, isipen yo kasi a saray imbaga to nipaakar ed propeta nen Jehova et dengelen na saray Siryanon angautibo ed sikato? Nayarin andi. Ontan met, sikayo so seguradon dengelen na totoo no nanengneng da a marespeto, matua, tan makalakal kayo. (Roma 2:21) Konsideraen so sakey ya alimbawa.
17 Nidunget ed pananesdes ed eskuelaan so sakey ya 11-años a bii ed Portugal pian manselebra na saray holiday a misumlangan ed nipasal ed Biblia a konsiensia to. Sikato so marespeton angipaliwawa ed maestra to no akin ya agto itan seselebraan, balet sikato so binalaw na maestra to. Diad inlabas na panaon, sikato so aminpigan pinabaingan na maestra to, a binalaw-balaw to so relihyon to. Balet, say kalangweran a bii et nansiansian marespeto. Kayari na pigaran taon, satan a malangwer ya agin bii so nanlingkor bilang regular payunir, sakey a sigpot-panaon a ministro. Diad sakey a kombension, binantayan to iray manpapabautismo tan walay abidbir to ed sikara. Samay datin maestra to! Kayari na akisan tan impanlakapan da, inkuan na maestra ed datin estudyante to ya agton balot alingwanan so marespeton ugali to. Walay sakey a Tasi a dinmalaw ed sikato, tan asaglawi na maestra so ugali na datin estudyante to. Bilang resulta et nigapo so panangiyaral na Biblia, tan sayan bii so angawat ed katuaan na Biblia. On, say kondukta yo so mapuersan tuloy a paraan pian nidayew si Jehova!
18. Anto so nayarin gawaen na kalangweran sano sikato so masuyat a mangigapoy tongtongan nipaakar ed Biblia tan ed si Jehova a Dios?
18 Kasin naiirapan kayo no maminsan diad eskuelaan a mangigapo na pantotongtong nipaakar ed pananisia yo? Ontan met so liknaan na arum a kalangweran. Balet, sarag yon pawalaen so kipapasen a nayarin mamakiwas ed arum a mantepet nipaakar ed pananisia yo. Alimbawa, no bilang ta legal tan naabuloyan met, akin ta no mangawit kayo na saray publikasyon a nibase ed Biblia tan basaen iratan legan na panangugto odino ed arum a panaon a libre itan a gawaen? Saray kaeskuelaan yo so nayarin mantepet no anto so babasaen yo. Diad pangebat tan pangibaga ed sikara no anto so abasa yon makapainteres ed artikulo odino ed libron sankabembenan yo, mainomay yo lan igapo so maabig a pantotongtong. Agyo lilingwanan so mantepet, ta pian naamtaan yo so sisiaen na saray kaeskuelaan yo. Marespeton ondengel, ya inabang ed sikato so naaralan yo ed Biblia. Unong ed ipapabitar na saray eksperiensya ed pahina 29, dakel a kalangweran so mangidadayew ed Dios diad eskuelaan. Satan so amaliket a tuloy ed sikara tan akatulong ed dakel pian makapikabat ed si Jehova.
19. Panon a magmaliw a lalon epektibo iray kalangweran diad panagkabkaabungan a ministeryo?
19 Say panagkabkaabungan a ministeryo so sankaepektiboan a paraan pian nidayew si Jehova. No agkayo ni mibibiang ed ministeryo, akin ta no iletneg yo itan bilang kalat yo? No mibibiang kayo la, kasin wala niray kalat a nayarian yon dampoten? Alimbawa, imbes ya apasakey so ibaga yo ed kada puerta, pansagpotan so onaligwas, ya onkerew na saray suhestion ed saray atateng yo tan ed arum niran eksperiensyado. Nagkalalon aralen so pangusar ed Biblia, manggawa na epektibon panagpawil, tan mangigapo na panangiyaral na Biblia. (1 Timoteo 4:15) Diad lalon pangidadayew yo ed si Jehova ed ontan iran paraan, sikayo so lalon magmaliw ya epektibo, tan lalon panggayagaan yo so ministeryo yo.
Kapigan so Igapo Yon Pangidayew ed si Jehova?
20. Akin a nepeg ya ag-isipen na saray tobonbalo ya ugaw niran tuloy pian mandayew ed si Jehova?
20 Diad taloran tepet ed sayan aaralen, sankainomayan so ebat ed sayan unor a tepet. Imanoen so direktan ebat na Biblia: “Nodnonoten mo, natan, so Baleg a Manamalsam dia ed saray agew na inkatobonbalom.” (Eclesiastes 12:1, NW) On, natan la so panaon pian igapo so pangidayew ed si Jehova. Main-inomay so pangibagay: “Uga-ugaw ak ni pian mandayew ed si Jehova. Anggapo ni so eksperiensyak. Manpatakken ak ni.” Aliwan sika so primeron akalikna ed satan. Singa bilang, oniay inkuan nen kalangweran a Jeremias ed si Jehova: “O Katawan a Jehova! Nia, agko amta so mansalita; ta ugaw ak.” Sikato so pinaseguroan nen Jehova ya anggapo so rason pian ontakot. (Jeremias 1:6, 7) Ontan met, anggapo so nepeg tayon takotan sano mandayew itayo ed si Jehova. Sigpot a napaandi nen Jehova so antokaman a mauges a nayarin onsabi ed sikatayo.—Salmo 118:6.
21, 22. Akin a niyaliling ed saray linaew iray kalangweran a mangidadayew ed si Jehova, tan akin a makapaseseg itan a panangikompara?
21 Pasesegen mi kayo sirin, sikayoran kalangweran: Agkayo masuyat a mandayew ed si Jehova! Natan la kaleganan na inkatobonbalo yo so sankaabigan a panaon pian mibiang ed sankaimportantian a kimey a gagawaen ed dalin natan. Sano gawaen yo itan, magmaliw kayon kabiangan na sakey ya alay abig a bengatla—say sankatalbaan a pamilya na saramay mangidadayew ed si Jehova. Panliketan nen Jehova a kaiba kayo ed sayan pamilya. Imanoen irayan apuyanan a salita ya imbaga na salmista ed si Jehova: “Say katooan mo yapay da so inkasikara a mabulbulos dia ed agew na pakayarim, dia ed masanton ulop: ya ompaway ed panag-anakay kabuasan wala ed sika so linaew na kaugawan mo.”—Salmo 110:3.
22 Agta masansanting a nengnengen iray linaew a mankirkirlap ed kabuasan? Makaparepresko iratan, mankirkirlap, tan amayamay. Ontan so pakanengneng nen Jehova ed sikayoran kalangweran a matoor a mangidadayew ed sikato diad sarayan maatap a panaon. Malinew, say desisyon yon mangidayew ed si Jehova so makapaliket ed puso to. (Uliran 27:11) Sirin, sikayoran kalangweran, idayew yo si Jehova!
Panon Yon Ebatan?
• Anto so pigaran importantin rason no akin ya idayew si Jehova?
• Antoran alimbawa ed Biblia so mangipabitar a saray kalangweran et epektibon tuloy ed panangidayew ed si Jehova?
• Panon so pakapangidayew ed si Jehova na saray kalangweran natan?
• Kapigan so nepeg ya igapo na saray kalangweran a mangidayew ed si Jehova, tan akin?
[Tepetepet Parad Panagaral]
[Saray litrato ed pahina 25]
No say kaarom et walaan na alay abig ya inkadunong, agta itongtong mo itan ed arum?
[Litrato ed pahina 27]
Nayarin magmaliw ya interesado iray kaparam ya estudyante ed saray sisiaen mo
[Litrato ed pahina 28]
No labay mon onaligwas so ministeryom, onkerew na saray suhestion ed sakey a mas eksperiensyadon Tasi