Natalonaan Tayo so Antokaman a Subok!

KASIN walay pakasusubokan yo natan ed bilay? Kasin naaandian kayo lay ilalo, tan agyo la nasungdoan itan? Kasin momoriaen yo no maminsan a nikadkaduma so problema yo tan anggapo lay solusyon ed satan? No ontan, manpakpel kayo! Antokaman iray subok a sasagmaken tayo, papaseguroan itayo na Biblia a tulongan itayo na Dios pian matalonan nasungdoan iratan.

Bibidbiren na Biblia a saray lingkor na Dios so “napelag . . . ed nambabangil a katuksoan.” (Santiago 1:2) Imanoen pa so salitan “nambabangil” (Griego poi·kiʹlos). Unong ed kadaanan ya usar na satan, say orihinal a salita so mankabaliksan na “dakel tan nanduruma” odino “de-kolores” tan mangidadanet ed “panduruma na subsubok.” Diad tua, diad kaslakan a pananalita ed Ingles, satan so manunan mankabaliksan na “akoloran na nanduruma.” Kanian, say “nambabangil a katuksoan” et subsubok diad nanduruman kolor, a singa panangibaga. Anggaman ontan, susuportaan itayo nen Jehova pian natalonaan tayo so kada sakey ed saratan. Akin a segurado itayo ed satan?

‘Daakan ya Ipapagamor na Dios so Grasya To’

Inkuan nen apostol Pedro a saray Kristiano so “nagonigon . . . na saray nambabangil a katuksoan.” (1 Pedro 1:6) Diad saginonor et inkuan to ed pinuyanan a sulat to a say “grasya na Dios” so ‘nipapagamor a daakan.’ (1 Pedro 4:10) Say balikas a “daakan” so walaan na piparaan ed samay orihinal a Griegon salita. Nipaakar ed sayan balikas, oniay inkomento na sakey ya iskolar na Biblia: “Sakey iyan makapadinayew a kaisipan. . . . Say panukoy ed grasya na Dios bilang poikilos et mankabaliksan ya anggapoy antokaman a kolor na kipapasen na too ya agnadaeg na grasya na Dios.” Inyarum to ni: “Anggapoy posiblin sirkumstansya, krisis, emerhensia odino maganat a pankaukolan ya agnaresolbi, agmatalonan nasungdoan tan agnadaeg na grasya na Dios. Anggapoy antokaman ed bilay ya agnatalonaan na grasya na Dios. Sayan napno na kabaliksan a salita a poikilos so mangipanonot ed sikatayo ed dakel a kolor na grasya na Dios a peteg a magenap parad amin a bengatla.”

Nadaeg na Panangasi so Subsubok

Unong ed si Pedro, say sakey a paraan a nipapatnag so grasya odino agkanepegan a panangasi na Dios et diad panamegley na nanduruman indibidual a manutugyop ed Kristianon kongregasyon. (1 Pedro 4:11) Balang lingkor na Dios so walaan na saray espiritual a langkap, odino abilidad, a nayarin onkanan lapuan na panamaseseg parad saramay nasusubok. (Roma 12:6-8) Singa bilang, arum a membro na kongregasyon so marundunong a managbangat na Biblia. Say makatebek a paraan na pananalita ra so mamapabiskeg tan mamapakiwas ed arum a mansungdo. (Nehemias 8:1-4, 8, 12) Saray arum so regular a manggagawa na panagpastol ed saramay mankaukolan na tulong. Saratan ya idadalaw so pankanawnawa pian napaseseg, tan ‘naligliwa so kapusoan.’ (Colosas 2:2) Sano gagawaen na saray manangasikaso so ontan a makapabiskeg-pananisia iran idadalaw, manginanabang ira na espiritual a langkap. (Juan 21:16) Wala ni ingen diad kongregasyon iramay kabkabat  lapud inkaligsa ra, panangabagey da, tan inkatamoy da sano midedeneng ed saray kapananisiaan a naeermenan lapud subsubok. (Gawa 4:36; Roma 12:10; Colosas 3:10) Say pililikna tan aktibon itutulong na ontan iran maaron agagi so makanan balikas odino “kolor,” na agkanepegan a panangasi na Dios.​—Uliran 12:25; 17:17.

“Dios na Ami’ligliwa”

Manuna ed amin, si Jehova so mangiiter na ligliwa. Sikato so “Dios na ami’ligliwa. A sikato so manligliwa ed sikatayo ed amin a panermenan tayo.” (2 Corinto 1:3, 4) Say kakabatan a naromog ed pinuyanan a Salita na Dios tan say biskeg ya iiter na masanton espiritu to so manuna iran paraan na pangeebat nen Jehova ed saray ikekerew tayoy tulong diad pikakasi. (Isaias 30:18, 21; Lucas 11:13; Juan 14:16) Napabiskeg itayo na pinuyanan a sipan nen apostol Pablo. Inkuan to: “Say Dios matoor, ta agto kayo paulyan a natukso na onlabas ed nayarian yo; noag ingen pati tukso, manggawa met na dalan a paliisan, ta pian nayarian yo ya itepel.”​—1 Corinto 10:13.

On, antokaman so “kolor,” odino nengneng, na subok ed sikatayo, walan walay “kolor,” odino balikas na agkanepegan a panangasi na Dios a manaeg ed satan. (Santiago 1:17) Say nipanpanaon tan matukotukoy a suportan iiter nen Jehova ed saray lingkor to​—anggan panon lay panduruma na saray pakatuksoan tan desdes​—et sakey lambengat a paneknek na ‘amayamay a karunongan na Dios.’ (Efeso 3:10) Agkayo ta mipakna?

[Saray litrato ed pahina 31]

Tutulongan itayo nen Jehova a natalonaan iray subok ed sikatayo