Eclesiastes 11:1-10
11 Ibantak mo* ed danum so tinapay mo,+ ta kalabas na dakel ya agew et naromog mo lamet itan.+
2 Mangiyapag ka ed pitora odino anggan diad walora,+ ta agmo amta so onsabin desyang diad dalin.
3 No saray lurem et napno la na danum, ibalasubos day uran diad dalin; tan no say sakey a kiew et natumba diad abalaten odino diad amianen, inerman so tumbaan to et diman so kawalaan to.
4 Samay banbantayan toy siplog na dagem et agmangisibwag na bini, tan samay onnenengneng ed saray lurem et agmanani.+
5 No panon ya agmo amta so ikukurang na espiritu diad saray pukel na ugaw ed eges na malukon a bii,+ agmo met amta so kimey na tuan Dios, a manggagawa ed amin a bengatla.+
6 Diad kabuasan et mangisibwag kay binim tan agmo pampapainawaen so limam anggad labi;+ ta agmo amta no dinan so ontubo, balanglan saya odino samay sakey, odino kasin pareho iran onaligwas.
7 Makapaliket so liwawa, tan maabig ed mata so pakanengneng ed agew.
8 Ta no say sakey a too et manbilay na dakdakel a taon, panliketan to komon iratan ya amin.+ Balet nepeg ton nonoten a nayarin dakel met iray agew na kabilungetan; amin ya onsabi et andi-kakanaan.+
9 Manliket ka, O kalangweran a laki, legan a wala ka nid kalangweran, tan manliket komon so pusom diad saray agew na inkatobonbalom. Tumbok moy aarapen na pusom tan la ka no iner ka itonton na matam; balet amtaen mo a say tuan Dios so mangukom* ed sika lapud sarayan amin.+
10 Kanian ekal mod pusom iray makapagonigon a bengatla, tan ipulisay mo ray bengatlan mauges ed laman mo, ta say inkatobonbalo tan kaksilan et andi-kakanaan.+
