Eclesiastes 2:1-26
2 Inkuan kod sarilik:* “Salien ko pay manliket tan nengnengen ko no antoy maabig a nagawa.” Balet saya met et andi-kakanaan.
2 Inkuan ko nipaakar ed panelek, “Kaambagelan!”
Tan nipaakar ed panliket, “Antoy gunggona na satan?”
3 Sigpot-puso ak a nanusisa, a pinenek koy sarilik ed alak,+ tan legan na satan et pinansiansiak so karunongan ko; sinalik ni ingen so manggaway inkamakulangkulang pian nanengneng ko no antoy sankaabigan a gawaen na totoo legan na daiset ya agew na bilay da diad silong na tawen.
4 Nanggawa ak na angkakabaleg a kimey.+ Angipaalagey ak na saray abung ko;+ nantanem ak na kaubasan ko.+
5 Nanggawa ak na sarilik iran hardin tan parke, tan nantanem ak ditan na amin a klase na kiew a manbubunga.
6 Nanggawa ak na saray tiponan na danum ko, pian naparanuman ko ray taneman na mabunan kakiewan.
7 Awalaan ak na saray lingkor a lalaki tan bibii,+ tan wala ray lingkor kon inyanak ed sankaabungan* ko. Awalaan ak met na dakdakel ya ayayep—saray baka tan karnero+—a mas dakel ni nen saray ayayep na amin ya akauna ed siak diad Jerusalem.
8 Nantipon ak na pilak tan balitok parad siak,+ saray kayamanan na* saray arari tan saray probinsya.+ Wala ray lalaki tan bibiin komakansion ko, ontan met ed samay panliliketan a maong na ananak na totoo—say bii, on, dakdakel a bibii.*
9 Kanian nagmaliw ak a mas makapanyari nen say siopaman ya akauna ed siak diad Jerusalem.+ Tan nansiansia ed siak so karunongan ko.
10 Agko sinibletan so sarilik na antokaman a pinirawat ko.*+ Agko pinokpokan so pusok ed anggan anton liket, ta say pusok et nanggayaga lapud amin a sagpot ko, tan saya so tumang* ko ed amin a sagpot ko.+
11 Balet sanen ninodnonot koy amin a kimey a ginawa na saray limak tan amin a mairap a kimey a nansagpotan kon sumpalen,+ anengneng ko ya amin a bengatla et andi-kakanaan tan panguusil ed dagem;+ anggapoy bengatlan peteg a makana* diad dalin.+
12 Insan inteen koy imanok ed karunongan tan kaambagelan tan inkamakulangkulang.+ (Ta antoy nagawaan na too ya onsublay ed ari? Saman labat lay agawaan la.)
13 Tan atalosan ko a mas maabig so karunongan nen say inkamakulangkulang,+ no panon a mas maabig so liwawa nen say kabilungetan.
14 Say mata na marunong et walad ulo to;*+ balet samay makulangkulang et manaakar ed kabilungetan.+ Amoriak met a saksakey so pansumpalan dan amin.+
15 Insan inkuan kod sarilik: “Samay nagagawa ed makulangkulang et nagawa met ed siak.”+ Anto sirin so agunggonak diad alablabas ya inkarunong ko? Kanian inkuan kod sarilik: “Saya met et andi-kakanaan.”
16 Ta say pakanodnonotan ed samay marunong odino ed samay makulangkulang et agmanbayag.+ Diad onsabi iran agew, balang sakey et nalingwanan. Tan panon so ipatey na marunong? Singa met ed makulangkulang.+
17 Kanian binusol ko so bilay,+ lapud amin a gagawaen diad dalin et makapagonigon ed siak, ta amin a bengatla et andi-kakanaan,+ a panguusil ed dagem.+
18 Binusol ko so amin a nansagpotan kon maong diad dalin,+ lapud itilak ko lanlamang itan ed samay toon onsublay ed siak.+
19 Tan siopay makaamta no sikatoy magmaliw a marunong odino makulangkulang?+ Ingen ta uleyan toy amin a bengatlan agamoran ko diad dalin ed panamegley na baleg a sagpot tan karunongan ko. Saya met et andi-kakanaan.
20 Kanian naandiay ilalo so pusok ed amin a kimey a nansagpotan kon maong diad dalin.
21 Ta nayarin mansagpot a maong so sakey a too, ya iwawanwan na karunongan tan kakabatan tan abilidad, balet iter to lanlamang so nabebetangan to* ed samay toon agnansagpot ed satan.+ Saya met et andi-kakanaan tan makapaermen a maong.
22 Anton talagay nagunggona na too ed amin a pansasagpot to tan ambisyon to a mamapakiwas ed sikato* pian mansagpot a maong diad dalin?+
23 Ta diad amin ya agew to et puro sakit na liknaan tan pakadismaya so iiter na kimey to,+ tan anggan diad labi et agmakakapainaway puso to.+ Saya met et andi-kakanaan.
24 Anggapo lay mas maabig ed sakey a too nen say mangan tan oninum tan manliket ed* pansasagpot to.+ Amoriak met a saya et nanlapud lima na tuan Dios,+
25 ta siopay mas maabig so kakanen tan iinumen to nen say siak?+
26 Say toon makapaliket ed tuan Dios et iikdan to na karunongan tan kakabatan tan paliliketen to,+ balet say iiter ton kimey ed makasalanan et say pantipon tan pankolekta labat pian iter ed samay toon makapaliket ed sikato.+ Saya met et andi-kakanaan, a panguusil ed dagem.
Paimanod leksab
^ Literal, “pusok.”
^ Literal, “ananak a lalaki ed abung.”
^ Odino “say kayarian a wala labat ed.”
^ Odino “sakey a bii, on, saray bibii.”
^ Literal, “a kinerew na saray matak.”
^ Odino “betang.”
^ Odino “bengatlan makagunggona.”
^ Odino “et akalukas.”
^ Odino “so amin a bengatla.”
^ Literal, “tan ed panseseet na puso to.”
^ Odino “say inengneng na kamarerwa to ed maong lapud.”
