Eclesiastes 6:1-12
6 Wala ni sakey a makapaermen a nanenengneng ko diad dalin, a kaslakan a nagagawa ed saray totoo:
2 Iikdan na tuan Dios so too na saray kayamanan tan kaykayarian tan kagalangan, kanian ag-onkukulang na antokaman a pipirawaten to;* ingen ta ag-inabuloyan na tuan Dios a panliketan to iratan, noagta samay dayo. Saya et andi-kakanaan tan makapagonigon a maong.
3 No say sakey a too et maminlasus a magmaliw ya ama tan manbilay na dakel a taon tan ontatken, ingen ta sikatoy* agmanliliket ed maong iran bengatla a kayarian to antis ya onsabi ed lubok,* nibagak a say ugaw ya inatey lan niyanak et mas maong ni nen sikato.+
4 Ta andi-kakanaan so inkiyanak na sayan ugaw tan inatey diad kabilungetan, tan say ngaran to et asakbongan ed kabilungetan.
5 Anggano agton balot anengneng so agew odino anggapon balot so amta to, mas maong ni kipapasen* to nen samay inmuna.+
6 Anto so gunggonay pambilay na duan libon taon no agmakaeksperiensyay liket? Agta amin et oonla ed saksakey a pasen?+
7 Amin a pansasagpot na too et pian peselen so eges to;+ balet sikatoy agbalot napepenek.
8 Ta antoy bentaha na sakey a marunong ed sakey a makulangkulang?+ Odino antoy gunggona a say sakey a pobri et amta to no panoy manbilay?
9 Magmaong nin panliketan na sakey so nanenengneng na mata to nen say manliberliber pian anapen iray pilalek* to. Saya met et andi-kakanaan, a panguusil ed dagem.
10 Antokaman a wadia et nginaranan la, tan amta la no anton talaga so too; tan agto sarag so misuppiatan* ed samay mas makapanyari nen sikato.
11 No kapigan ondadakel iray salita,* diman met ondadakel so andi-kakanaan a bengatla; tan antoy niiter dan gunggona ed sakey a too?
12 Siopay makaamta no antoy sankaabigan a gawaen na sakey a too ed bilay to legan na daiset ya agew na andi-kakanaan a bilay to, ya onlalabas a singa anino?+ Ta siopay makapangibagad too no antoy nagawa diad dalin no sikatoy naandi la?
