Josue 14:1-15
14 Ini an ginkuha han mga Israelita sugad nga panurundon ha tuna han Canaan, nga iginhatag ha ira ni Eleazar nga saserdote ngan ni Josue nga anak ni Nun ngan han mga ulo han mga panimalay* han mga tribo han Israel basi nira mapanunod.+
2 Iginpaagi ha pagripa an ira panurundon,+ sugad han iginsugo ni Jehova pinaagi kan Moises para ha siyam ngan tunga nga tribo.+
3 Iginhatag na ni Moises an panurundon han duha ngan tunga nga tribo didto ha tabok* han Jordan,+ ngan an mga Levita waray niya tagi hin panurundon ha butnga nira.+
4 An katulinan ni Jose gintagad nga duha nga tribo,+ an Manases ngan an Efraim;+ ngan an mga Levita waray nira tagi hin malon ha tuna, labot la han mga syudad+ nga uukyan ngan han mga panabsaban hito para ha ira kabakahan ngan ha ira mga panon.+
5 Salit ginbahin-bahin han mga Israelita an tuna sugad han iginsugo ni Jehova kan Moises.
6 Katapos, an kalalakin-an han Juda dinaop kan Josue ha Gilgal,+ ngan hi Caleb+ nga anak ni Jefune nga Kenizita nagsiring ha iya: “Maaram ka gud kon ano an ginsiring ni Jehova+ kan Moises nga surugoon han tinuod nga Dios+ mahitungod ha imo ngan ha akon ha Kades-barnea.+
7 Kwarenta anyos ako han hi Moises nga surugoon ni Jehova nagsugo ha akon tikang ha Kades-barnea basi mag-espiya ha tuna,+ ngan binalik ako nga may tangkod nga sumat.*+
8 Bisan kon an akon kabugtoan nga sinagka kaupod ko nagin hinungdan nga mahadlok an katawohan,* bug-os-kasingkasing* nga ginsunod ko hi Jehova nga akon Dios.+
9 Hito nga adlaw hi Moises nanumpa pinaagi ha pagsiring: ‘An tuna nga imo ginlaktan magigin permanente nga panurundon mo ngan han imo mga anak nga lalaki, kay bug-os-kasingkasing nga ginsunod mo hi Jehova nga akon Dios.’+
10 Yana sugad la han iya iginsaad,+ gintipigan ako nga buhi ni Jehova+ ha sulod hinin 45 ka tuig tikang han iginsaad ini ni Jehova kan Moises han an mga Israelita naglakat ha kamingawan;+ buhi pa ako tubtob yana nga adlaw, ngan 85 anyos na ako.
11 Ngan yana nga adlaw makusog la gihapon ako pariho han adlaw nga ginsugo ako ni Moises. An akon kusog yana pariho la gihapon hadto, para ha pakiggirra ngan ha iba nga mga buruhaton.
12 Salit ihatag ha akon ini nga kabukiran nga iginsaad ni Jehova hito nga adlaw. Bisan kon hito nga adlaw nakabati ka nga may mga Anakim+ didto nga may dagku nga pinader nga mga syudad,+ sigurado nga makakaupod ko hi Jehova,+ ngan paiiwason ko hira, sugad han iginsaad ni Jehova.”+
13 Salit ginbendisyonan ni Josue hi Caleb nga anak ni Jefune ngan iginhatag ha iya an Hebron sugad nga panurundon.+
14 Amo nga an Hebron panag-iya ni Caleb nga anak ni Jefune nga Kenizita sugad nga panurundon tubtob hini nga adlaw, kay bug-os-kasingkasing nga ginsunod niya hi Jehova nga Dios han Israel.+
15 An ngaran han Hebron hadto Kiriat-arba+ (hi Arba an prominente nga lalaki hadto ha mga Anakim). Ngan an tuna nakapahuway ha girra.+
