Josue 8:1-35
8 Katapos, hi Jehova nagsiring kan Josue: “Ayaw kahadlok o kalisang.+ Iupod an ngatanan nga sundalo ngan sagka kamo ngan sulonga an Ai. Kitaa, igintubyan ko na ha imo an hadi han Ai, an iya katawohan, an iya syudad, ngan an iya tuna.+
2 Buhata ha Ai ngan ha hadi hito an imo ginbuhat ha Jerico ngan ha hadi hito,+ kondi an mga dinag-an ngan an inataman nga mga hayop tikang hito mahimo niyo kuhaon para ha iyo kalugaringon. Pagsugo hin mga mag-aambus nga magtatago ha luyo han syudad.”
3 Salit hi Josue ngan an ngatanan nga sundalo nanagka ngan sinulong ha Ai. Nagpili hi Josue hin 30,000 nga magkusog nga girriro ngan ginpalakat hira han gab-i.
4 Ini an iya iginsugo ha ira: “Kitaa, kamo nga mag-aambus kinahanglan tumago ha luyo han syudad. Ayaw kamo paghirayo hinduro ha syudad, ngan pag-andam kamo ngatanan.
5 Ako ngan an ngatanan nga katawohan nga kaupod ko madaop ha syudad, ngan paggawas nira basi umato ha amon pariho hadto,+ maatras kami tikang ha ira.
6 Paggawas nira basi lanaton kami, ipapahirayo namon hira ha syudad, kay masiring hira, ‘Naatras hira tikang ha aton pariho hadto.’+ Ngan maatras kami tikang ha ira.
7 Katapos, kinahanglan bumuhát kamo tikang ha iyo gintatagoan ngan sakupon an syudad; itutubyan ito ha iyo ni Jehova nga iyo Dios.
8 Kahuman gud niyo masakop an syudad, sadang niyo ito suritan.+ Kinahanglan niyo buhaton an ginsiring ni Jehova. Kitaa, ginsugo ko kamo.”
9 Katapos, ginpalakat hira ni Josue, ngan nagmartsa hira ngadto ha lugar nga ira tatagoan; pinwesto hira ha butnga han Bethel ngan Ai, ha weste han Ai, samtang hi Josue nagpalabay hito nga gab-i upod han katawohan.
10 Katapos ni Josue bumuhát hin temprano ha aga ngan tirukon an mga sundalo, hiya ngan an mga tigurang han Israel nanguna ha ira tipakadto ha Ai.
11 An ngatanan nga sundalo+ nga kaupod niya nagmartsa tipasagka ha syudad ngan nagpakadto ha atubangan hito. Nagkampo hira ha norte han Ai, ngan may walog ha butnga nira ngan han Ai.
12 Ngan may ginpili na hiya nga mga 5,000 nga lalaki ngan ginsugo hira nga magtago ngan maghulat+ ha butnga han Bethel+ ngan Ai, ha weste han syudad.
13 Salit an katawohan pinwesto ha norte han syudad+ ngan an mga lalaki nga mag-aambus pinwesto ha weste han syudad,+ ngan hito nga gab-i hi Josue kinadto ha butnga han walog.*
14 Ngan pakakita gud hini han hadi han Ai, hiya ngan an kalalakin-an han syudad nagdagmit paggawas temprano han aga basi makiggirra ha Israel ha usa nga hitaas nga lugar diin nakikita an disyerto nga kapatagan. Pero diri hiya maaram nga may nananago ha luyo han syudad basi ambuson hira.
15 Han umatake an kalalakin-an han Ai, hi Josue ngan an ngatanan nga Israelita nga kaupod niya namalagiw ha dalan tipakadto ha kamingawan.+
16 Katapos, an ngatanan nga lalaki nga nakadto ha syudad gintirok basi lanaton hira; ngan samtang ginlalanat nira hi Josue nagtikahirayo hira ha syudad.
17 Waray bisan usa nga lalaki nga nahibilin ha Ai ngan Bethel nga waray maglanat ha mga Israelita. Ginbayaan nira nga abrido an syudad ngan ginlanat an mga Israelita.
18 Katapos, hi Jehova nagsiring kan Josue: “Itudlok ha Ai an bangkaw nga imo ginkakaptan,+ kay ihahatag ko ha imo kamot an syudad.”+ Salit igintudlok ni Josue ha syudad an bangkaw nga iya ginkakaptan.
19 Pag-unat gud niya han iya kamot, an mga mag-aambus binuhát dayon tikang ha ira gintatagoan ngan dinalagan ngadto ha sulod han syudad ngan ginsakop ito. Ginsuritan dayon nira an syudad.+
20 Paglingi han kalalakin-an han Ai, nakita nira nga an aso han syudad nagtitipaigbaw ha langit, ngan waray hira kusog nga pumalagiw ha bisan diin nga direksyon. Katapos, an katawohan nga namamalagiw tipakadto ha kamingawan nagkabalik basi atakehon an mga naglalanat ha ira.
21 Han nakita ni Josue ngan han ngatanan nga Israelita nga kaupod niya nga an syudad nasakop na han mga nag-aambus ngan nakita nira nga nagtitipaigbaw an aso han syudad, nagkabalik hira ngan gin-atake an kalalakin-an han Ai.
22 Ngan an iba pa nagkagawas ha syudad basi tapoon hira, salit an kalalakin-an han Ai nahibutnga kay paluyoluyo may mga Israelita, ngan ira ginpamatay hira tubtob nga waray na nahisalin nga buhi o nakapalagiw.+
23 Kondi ira ginbihag nga buhi an hadi han Ai+ ngan gindara hiya kan Josue.
24 Katapos pamatayon han mga Israelita an ngatanan nga naukoy ha Ai ha kamingawan diin nira ginlanat hira, ngan an tagsa ha ira nagkamatay na pinaagi han espada, an ngatanan nga Israelita binalik ha Ai ngan ginpamatay pinaagi han espada an mga nahibilin didto.
25 An ngatanan nga nagkamatay hito nga adlaw, lalaki ngan babaye, inabot hin 12,000, an ngatanan nga katawohan han Ai.
26 Waray iubós ni Josue an iya kamot nga nakapot han bangkaw+ tubtob nga mapoo niya an ngatanan nga naukoy ha Ai.+
27 Kondi ginkuha han mga Israelita para ha ira kalugaringon an inataman nga mga hayop ngan an mga dinag-an tikang hito nga syudad, uyon ha iginsugo ni Jehova kan Josue.+
28 Katapos, ginsunog ni Josue an Ai ngan ginhimo ito nga permanente nga bungdo han kagubaan,+ ngan aada pa ito tubtob hini nga adlaw.
29 Ginbitay niya an hadi han Ai ha kahoy* tubtob ha pagsirom, ngan han matutunod na an adlaw, nagsugo hi Josue nga kuhaon tikang ha kahoy an iya patay nga lawas.+ Katapos, ginlabog nira ito ha aragian tipasulod ha ganghaan han syudad ngan gintabonan ito hin daku nga kamada hin mga bato, nga aada pa tubtob hini nga adlaw.
30 Hito nga panahon naghimo hi Josue hin halaran ha Bukid Ebal+ para kan Jehova nga Dios han Israel,
31 sugad han iginsugo ni Moises nga surugoon ni Jehova ha mga Israelita ngan sugad han nahisurat ha libro han Balaud+ ni Moises: “Usa nga halaran nga hinimo tikang ha bug-os nga mga bato, nga waray gamiti hin puthaw nga garamiton.”+ Naghalad hira dida hito hin mga halad nga sinunog para kan Jehova ngan hin mga halad nga ginsasarosaroan.+
32 Katapos, nagsurat hiya dida ha mga bato hin kopya han Balaud+ nga iginsurat ni Moises ha atubangan han mga Israelita.+
33 An ngatanan nga Israelita, an ira mga tigurang, an mga opisyal, ngan an ira mga hukom, pati na an dayo nga mga residente,+ naninindog paluyoluyo han Arka ha atubangan han mga saserdote nga Levita nga nagpapas-an han arka han kasabotan ni Jehova. An katunga ha ira nanindog ha atubangan han Bukid Gerizim, ngan an katunga ha atubangan han Bukid Ebal+ (sugad han iginsugo hadto ni Moises nga surugoon ni Jehova),+ basi bendisyonan an katawohan han Israel.
34 Katapos hini, ginbasa niya ha daku nga tingog an ngatanan nga pulong han Balaud,+ an mga bendisyon+ ngan an mga sumpa,+ sumala ha ngatanan nga nahisurat ha libro han Balaud.
35 Waray bisan usa nga pulong ha ngatanan nga iginsugo ni Moises nga waray basaha ni Josue ha daku nga tingog ha atubangan han bug-os nga kongregasyon han Israel,+ pati na ha kababayin-an ngan kabataan ngan ha dayo nga mga residente+ nga naukoy* ha butnga nira.+
