Josue 4:1-24
-
Mga bato magigin hinumdóman (1-24)
4 Pakatabok gud ha Jordan han bug-os nga nasud, hi Jehova nagsiring kan Josue:
2 “Kuha hin 12 nga lalaki tikang ha katawohan, usa nga lalaki tikang ha tagsa nga tribo,+
3 ngan ini an isugo ha ira: ‘Kuha kamo hin 12 nga bato ha butnga han Jordan, tikang ha lugar diin nagpabilin nga natindog an mga saserdote,+ ngan dad-a niyo ito ngan ibutang ha lugar diin kamo magpapalabay han gab-i.’”+
4 Salit gintawag ni Josue an 12 nga lalaki nga iya ginpili tikang ha mga Israelita, usa nga lalaki tikang ha tagsa nga tribo,
5 ngan hi Josue nagsiring ha ira: “Pag-una kamo ha Arka ni Jehova nga iyo Dios ngadto ha butnga han Jordan, ngan an tagsa ha iyo kinahanglan kumuha hin usa nga bato ngan pas-anon ito, sumala ha kadamu han mga tribo han mga Israelita,
6 basi magin tigaman ha butnga niyo. Kon ha urhi an iyo mga anak* magpakiana ha iyo, ‘Kay ano nga may-ada kamo hini nga mga bato?’+
7 kinahanglan sumatan niyo hira: ‘Kay an katubigan han Jordan inundang pag-awas ha atubangan han arka+ han kasabotan ni Jehova. Han tinabok ito ha Jordan, an katubigan han Jordan inundang pag-awas. Ini nga mga bato magigin hinumdóman* han katawohan han Israel ha kadayonan.’”+
8 Salit ginbuhat han mga Israelita an iginsugo ni Josue. Nagkuha hira hin 12 nga bato ha butnga han Jordan, sugad han iginsugo ni Jehova kan Josue, sumala ha kadamu han mga tribo han mga Israelita. Ira ito gindara ha lugar diin magpapalabay hira han gab-i ngan iginbutang ito didto.
9 Nagbutang liwat hi Josue hin 12 nga bato ha butnga han Jordan ha lugar nga gintindogan han mga saserdote nga nagpas-an han arka han kasabotan,+ ngan an mga bato aadto didto tubtob hini nga adlaw.
10 An mga saserdote nga nagpapas-an han Arka nagpabilin nga natindog ha butnga han Jordan tubtob nga natuman han katawohan an ngatanan nga iginsugo ni Jehova kan Josue nga buhaton nira, uyon ha ngatanan nga iginsugo ni Moises kan Josue. Durante hito nga panahon an katawohan nagdagmit pagtabok.
11 Pakatabok gud han ngatanan nga katawohan, an Arka ni Jehova ngan an mga saserdote tinabok samtang nagkikita an katawohan.+
12 Ngan an mga Rubenita, an mga Gadita, ngan an katunga han tribo ni Manases tinabok nga nakaorganisar ha pakiggirra+ nga nag-uuna ha iba nga mga Israelita, sugad han iginsugo ni Moises ha ira.+
13 Mga 40,000 nga sundalo nga armado para ha pakiggirra an tinabok ha atubangan ni Jehova ngadto ha disyerto nga kapatagan han Jerico.
14 Hito nga adlaw ginpasidunggan ni Jehova hi Josue ha atubangan han bug-os nga Israel,+ ngan nagkaada hira daku nga respeto* ha iya ha ngatanan nga adlaw han iya kinabuhi, sugad han ira pagkaada daku nga respeto kan Moises.+
15 Katapos, hi Jehova nagsiring kan Josue:
16 “Sugoa an mga saserdote nga nagpapas-an han arka+ han Pagpamatuod nga sumagka na tikang ha Jordan.”
17 Salit ginsugo ni Josue an mga saserdote: “Sagka na kamo tikang ha Jordan.”
18 Han an mga saserdote nga nagpapas-an han arka+ han kasabotan ni Jehova sinagka tikang ha butnga han Jordan ngan an ira mga rapadapa tinamak ha mamara nga tuna, an katubigan han Jordan nagtikang utro pag-awas ngan naglapwas+ pariho hadto.
19 An katawohan sinagka tikang ha Jordan ha ikanapulo ka adlaw han siyahan nga bulan ngan nagkampo ha Gilgal+ ha este nga giutan han Jerico.
20 May kalabotan ha 12 nga bato nga ira ginkuha ha Jordan, iginbutang ito ni Josue ha Gilgal.+
21 Katapos nagsiring hiya ha mga Israelita: “Ha tidaraon kon an iyo mga anak magpakiana ha iyo, ‘Ano an kahulogan hini nga mga bato?’+
22 kinahanglan niyo isaysay ha iyo mga anak: ‘An Israel tinabok ha Jordan ha mamara nga tuna+
23 han ginpahubas ni Jehova nga iyo Dios an katubigan han Jordan ha ira atubangan tubtob nga makatabok hira, sugad han ginbuhat ni Jehova nga iyo Dios ha Dagat nga Pula han iya ito ginpahubas tubtob nga makatabok kami.+
24 Ginbuhat niya ini basi mahibaro an ngatanan nga mga katawohan ha tuna nga gamhanan gud an kamot ni Jehova+ ngan basi mahadlok kamo pirme kan Jehova nga iyo Dios.’”
