Josue 10:1-43
10 Pakabati gud ni Hadi Adoni-zedek han Jerusalem nga ginsakop na ni Josue an Ai ngan ginbungkag ito, nga ginbuhat niya ha Ai ngan ha hadi hito+ an iya ginbuhat ha Jerico ngan ha hadi hito,+ ngan kon paonan-o an mga umurukoy han Gibeon nakigmurayaw ha Israel+ ngan nagpabilin ha butnga nira,
2 naalarma gud hiya,+ kay an Gibeon daku nga syudad, pariho han usa han dagku nga mga syudad nga ginmamandoan hin hadi. Mas daku ito ha Ai,+ ngan mga girriro an ngatanan nga lalaki hito.
3 Salit hi Adoni-zedek nga hadi han Jerusalem nagpadara hini nga mensahe kan Hoham nga hadi han Hebron,+ kan Piram nga hadi han Jarmut, kan Jafia nga hadi han Lakis, ngan kan Debir nga hadi han Eglon:+
4 “Buligi niyo ako, ngan sulungon naton an Gibeon, kay nakigmurayaw ito kan Josue ngan ha mga Israelita.”+
5 Salit an lima nga hadi han mga Amorita+—an hadi han Jerusalem, an hadi han Hebron, an hadi han Jarmut, an hadi han Lakis, ngan an hadi han Eglon—nagtirirok upod an ira mga kasundalohan, ngan nagmartsa hira ngan ginpalibotan an Gibeon basi makiggirra hito.
6 Katapos, an kalalakin-an ha Gibeon nagpadara hin mensahe kan Josue ha kampo ha Gilgal:+ “Ayaw pagpabay-i an* imo mga uripon.+ Pakadi dayon! Talwasa kami ngan buligi kami! An ngatanan nga hadi han mga Amorita tikang ha kabukiran nagtirirok kontra ha amon.”
7 Salit hi Josue sinagka tikang ha Gilgal upod an ngatanan nga sundalo ngan magkusog nga girriro.+
8 Katapos hi Jehova nagsiring kan Josue: “Ayaw kahadlok ha ira,+ kay igintubyan ko na hira ha imo.+ Waray bisan usa ha ira nga makakapirde ha imo.”+
9 Hi Josue tigda nga sinulong ha ira katapos magmartsa ha bug-os nga gab-i tikang ha Gilgal.
10 Ginpahinabo ni Jehova nga magsaramok hira ha atubangan han mga Israelita,+ ngan ginpamatay han mga Israelita an damu ha ira ha Gibeon, ngan ira ginlanat hira ha dalan nga tipasagka ha Bet-horon ngan ginpamatay hira tubtob ha Azeka ngan Makeda.
11 Samtang namamalagiw hira tikang ha mga Israelita ngan nakadto ha dalan nga tipalugsad tikang ha Bet-horon, hi Jehova nagpauran tikang ha langit ngada ha ira hin dagku nga mga yelo tubtob ha Azeka, ngan nagkamatay hira. Ha pagkamatuod, mas damu an nagkamatay tungod han uran nga yelo kay han nagkamatay pinaagi han espada han mga Israelita.
12 Hito nga panahon, ha adlaw nga ginpirde ni Jehova an mga Amorita ha atubangan han mga Israelita, hi Josue nagsiring kan Jehova ha atubangan han mga Israelita:
“Adlaw, hunong+ ha igbaw han Gibeon,+Ngan bulan, ha igbaw han Walog* han Aijalon!”
13 Salit an adlaw hinunong ngan an bulan waray magkiwa tubtob nga an nasud makabulos ha mga kaaway hito. Diri ba iginsurat ito ha libro ni Jasar?+ An adlaw hinunong ha butnga han langit ngan waray matunod ha bug-os nga adlaw.
14 Waray gud adlaw nga pariho hito, antes man o katapos hito, han namati hi Jehova ha tingog han usa nga tawo,+ kay hi Jehova nakikig-away para ha Israel.+
15 Katapos hito hi Josue upod an ngatanan nga Israelita binalik ha kampo ha Gilgal.+
16 Hito liwat nga panahon an lima nga hadi namalagiw ngan nanago ha lungib ha Makeda.+
17 Katapos, ini an iginsumat kan Josue: “An lima nga hadi hin-agian nga nananago ha lungib ha Makeda.”+
18 Salit hi Josue nagsiring: “Pagpakaliding kamo hin dagku nga mga bato ngadto ha ganggang han lungib ngan pagsugo kamo hin mga lalaki nga magbabantay ha ira.
19 Pero an iba pa ha iyo diri sadang umundang. Lanata an iyo mga kaaway ngan atakeha hira tikang ha luyo.+ Ayaw hira tuguti nga makasulod ha ira mga syudad, kay igintubyan na hira ni Jehova nga iyo Dios ha iyo mga kamot.”
20 Katapos pamatayon ni Josue ngan han mga Israelita an damu gud ha ira, nga haros mapoo hira labot la han pipira nga nakatalwas, nga namalagiw ngan sinulod ha pinader nga mga syudad,
21 an ngatanan nga katawohan binalik nga talwas ngadto kan Josue ha kampo ha Makeda. Waray bisan usa nga tawo nga nangahas pagyakan hin pulong* kontra ha mga Israelita.
22 Katapos, hi Josue nagsiring: “Abrihi niyo an ganggang han lungib ngan igawas ha lungib an lima nga hadi ngan dad-a ha akon.”
23 Salit gindara nira ha iya tikang ha lungib inin lima nga hadi: an hadi han Jerusalem, an hadi han Hebron, an hadi han Jarmut, an hadi han Lakis, ngan an hadi han Eglon.+
24 Han gindara nira kan Josue ini nga mga hadi, iginpatawag niya an ngatanan nga lalaki ha Israel ngan ginsidngan an mga kumander han mga sundalo nga inupod ha iya: “Daop kamo. Tamaki niyo an mga liog* hini nga mga hadi.” Salit dinaop hira ngan gintamakan an ira mga liog.+
25 Katapos, hi Josue nagsiring ha ira: “Ayaw kamo kahadlok o kalisang.+ Magin maisugon kamo ngan marig-on, kay ini an bubuhaton ni Jehova ha ngatanan niyo nga kaaway nga ha ira nakikiggirra kamo.”+
26 Katapos, ginpamatay hira ni Josue ngan ginpanbitay ha lima nga kahoy,* ngan nagpabilin hira nga nakabitay ha mga kahoy tubtob ha pagsirom.
27 Han natutunod na an adlaw nagsugo hi Josue nga kuhaon hira ha mga kahoy+ ngan ilabog ha lungib nga ira gintagoan. Katapos, ginbutangan hin dagku nga mga bato an ganggang han lungib, ngan aada pa ito tubtob gud hini nga adlaw.
28 Hito nga adlaw ginsakop ni Josue an Makeda+ ngan ginpamatay pinaagi han espada an katawohan hito. Iya ginpatay an hadi hito ngan an ngatanan nga tawo* didto, ngan waray hiya iginsalin nga buhi.+ Iya ginbuhat ha hadi han Makeda+ an iya ginbuhat ha hadi han Jerico.
29 Katapos, tikang ha Makeda hi Josue upod an ngatanan nga Israelita kinadto ha Libna ngan nakiggirra ha Libna.+
30 Ito ngan an hadi hito iginhatag liwat ni Jehova+ ha kamot han mga Israelita, ngan ira gin-atake pinaagi han espada an ngatanan nga tawo* didto, ngan waray hira iginsalin nga buhi. Salit ira ginbuhat ha hadi hito an ira ginbuhat ha hadi han Jerico.+
31 Sunod, tikang ha Libna hi Josue upod an ngatanan nga Israelita kinadto ha Lakis+ ngan nagkampo didto ngan nakiggirra hito.
32 Iginhatag ni Jehova an Lakis ha kamot han mga Israelita, ngan ira ito ginsakop han ikaduha ka adlaw. Ira gin-atake pinaagi han espada an ngatanan nga tawo* didto,+ sugad han ira ginbuhat ha Libna.
33 Katapos, hi Horam nga hadi han Gezer+ sinagka ha Lakis basi buligan ito, kondi hiya ngan an iya katawohan ginpamatay ni Josue tubtob nga waray bisan usa nga nahisalin nga buhi.
34 Katapos, tikang ha Lakis hi Josue upod an ngatanan nga Israelita kinadto ha Eglon+ ngan nagkampo didto ngan nakiggirra hito.
35 Ira ito ginsakop hito nga adlaw ngan ginpamatay pinaagi han espada an katawohan hito. Hito nga adlaw ira ginpoo an ngatanan nga tawo* didto, sugad han ira ginbuhat ha Lakis.+
36 Katapos, tikang ha Eglon hi Josue upod an ngatanan nga Israelita sinagka ha Hebron+ ngan nakiggirra hito.
37 Ira ginsakop ito ngan an mga bungto hito ngan ginpamatay pinaagi han espada an hadi hito ngan an ngatanan nga tawo* didto, ngan waray hira iginsalin nga buhi. Sugad la han iya ginbuhat ha Eglon, iya ito ginbungkag ngan ginpoo an ngatanan nga tawo* didto.
38 Ha kataposan, hi Josue upod an ngatanan nga Israelita kinadto ha Debir+ ngan nakiggirra hito.
39 Iya ginsakop ito, an hadi hito, ngan an ngatanan nga bungto hito, ngan ira hira ginpamatay pinaagi han espada; ira ginpoo an ngatanan nga tawo* didto,+ ngan waray hira iginsalin nga buhi.+ Iya ginbuhat ha Debir ngan ha hadi hito an iya ginbuhat ha Hebron ngan ha Libna ngan ha hadi hito.
40 Ginsakop ni Josue an bug-os nga tuna ha kabukiran, ha Negeb, ha Sefela,+ ngan ha mga bakilid, ngan ginpamatay an ngatanan nga hadi hito, ngan waray hiya iginsalin nga buhi; iya ginpoo an ngatanan nga tawo,*+ sugad han iginsugo ni Jehova nga Dios han Israel.+
41 Ginsakop ito ni Josue tikang ha Kades-barnea+ tubtob ha Gaza+ ngan ha bug-os nga tuna han Gosen+ ngan tubtob ha Gibeon.+
42 Ha usa la ka panahon, ginbihag ni Josue ini ngatanan nga hadi ngan ginsakop an ira tuna, kay hi Jehova nga Dios han Israel an nakikig-away para ha Israel.+
43 Katapos, hi Josue upod an ngatanan nga Israelita binalik ha kampo ha Gilgal.+
Mga footnote
^ Lit., “ig-ubos an imo kamot tikang ha.”
^ O “Hamubo nga Kapatagan.”
^ Lit., “nagpatarom han iya dila.”
^ Karuyag sidngon, an luyo han liog.
^ O “mga poste.”
^ O “an tagsa nga kalag.”
^ O “an tagsa nga kalag.”
^ O “an tagsa nga kalag.”
^ O “an tagsa nga kalag.”
^ O “an tagsa nga kalag.”
^ O “an tagsa nga kalag.”
^ O “an tagsa nga kalag.”
^ Lit., “tagsa nga ginhawa.”
