Josue 11:1-23
11 Pakabati gud hito ni Jabin nga hadi han Hazor, nagpadara hiya hin mensahe kan Jobab nga hadi han Madon,+ ngan ngadto ha hadi han Simron, ha hadi han Acsaf,+
2 ha mga hadi nga nakadto ha kabukiran ha norte, ha mga hadi ha kapatagan* ha sur han Kineret, ha mga hadi ha Sefela ngan ha mga bakilid han Dor+ ha weste,
3 ha mga Canaanita+ ha este ngan weste, ha mga Amorita,+ mga Hiteo, mga Perizita, ngan mga Jebusita ha kabukiran, ngan ha mga Hivita+ ha ubos han Hermon+ ha tuna han Mizpa.
4 Salit nagkagawas hira upod an ngatanan nira nga mga kasundalohan, nga daku gud nga grupo nga sugad kadamu han mga baras ha baybayon, pati na an damu gud nga kabayo ngan pan-girra nga mga karuwahe.
5 Ini ngatanan nga hadi nagkauruyon nga magkirigta, ngan nagkaabot hira ngan urosa nga nagkampo hirani ha katubigan han Merom basi makiggirra ha Israel.
6 Salit hi Jehova nagsiring kan Josue: “Ayaw kahadlok tungod ha ira,+ kay ha sugad hini nga oras buwas, ihahatag ko hira ngatanan ha Israel, ngan pamamatayon gud niyo hira. An ira mga kabayo kinahanglan mo pamigtingan,*+ ngan an ira mga karuwahe kinahanglan sunugon mo ha kalayo.”
7 Katapos, hi Josue upod an ngatanan nga sundalo tigda nga sinulong ha ira ha ligid han katubigan han Merom.
8 Igintubyan hira ni Jehova ha kamot han Israel,+ ngan ira ginpirde hira ngan ginlanat hira tubtob ha Bantogan nga Sidon+ ngan ha Misrefot-maim+ ngan ha Walog han Mizpe ha este, ngan ira ginpamatay hira tubtob nga waray na nahisalin nga buhi.+
9 Katapos, ginbuhat ni Josue ha ira an iginsugo ha iya ni Jehova; iya ginpamigtingan an ira mga kabayo ngan ginsunog ha kalayo an ira mga karuwahe.+
10 Labot pa hito, hi Josue binalik hito nga panahon ngan ginsakop an Hazor ngan ginpatay an hadi hito pinaagi han espada,+ kay an Hazor an nangunguna hadto hini ngatanan nga ginhadian.
11 Ira ginpamatay pinaagi han espada an ngatanan nga tawo* didto ngan ginpoo hira.+ Waray iginsalin nga buhi.+ Katapos, iya ginsunog ha kalayo an Hazor.
12 Ginsakop ni Josue an ngatanan nga syudad hini nga mga hadi ngan ginpirde pinaagi han espada an ngatanan nga hadi hito.+ Iya ginpamatay hira,+ sugad han iginsugo ni Moises nga surugoon ni Jehova.
13 Kondi waray sunoga han Israel an bisan usa han mga syudad nga natindog ha mga bungtod labot han Hazor; ito la an ginsunog ni Josue.
14 An ngatanan nga dinag-an tikang hini nga mga syudad ngan an inataman nga mga hayop ginkuha han mga Israelita para ha ira kalugaringon.+ Pero ira ginpatay pinaagi han espada an tagsa nga tawo tubtob nga mapoo nira hira ngatanan.+ Waray hira iginsalin nga buhi.+
15 Sugad la han iginsugo ni Jehova kan Moises nga iya surugoon, ito liwat an iginsugo ni Moises kan Josue,+ ngan ito an ginbuhat ni Josue. Waray hi Jehova iginsugo kan Moises nga waray buhata ni Josue.+
16 Ginsakop ni Josue ini nga bug-os nga tuna, an kabukiran, an bug-os nga Negeb,+ an bug-os nga tuna han Gosen, an Sefela,+ an Araba,+ ngan an kabukiran han Israel ngan an Sefela hito,*
17 tikang ha Bukid Halak, nga tipasagka ngadto ha Seir, tubtob ha Baal-gad+ ha Walog han Lebanon ha ubos han Bukid Hermon,+ ngan ginbihag niya an ngatanan nga hadi hito ngan ginpirde hira ngan ginpamatay hira.
18 Maiha-iha nga nakiggirra hi Josue hini ngatanan nga hadi.
19 Waray syudad nga nakigmurayaw ha mga Israelita labot la han mga Hivita nga naukoy ha Gibeon.+ An iba pa ira ginsakop pinaagi hin girra.+
20 Hi Jehova an nagtugot nga magin matig-a an ira kasingkasing+ salit nakiggirra hira ha Israel, basi mabungkag niya hira ngan diri pakitaan hin kalooy.+ Kinahanglan hira poohon, sugad han iginsugo ni Jehova kan Moises.+
21 Hito nga panahon ginpoo ni Josue an mga Anakim+ tikang ha kabukiran, tikang ha Hebron, ha Debir, ha Anab, ngan ha ngatanan nga kabukiran han Juda ngan ha ngatanan nga kabukiran han Israel. Ginbungkag hira ni Josue pati na an ira mga syudad.+
22 Waray Anakim nga nahisalin ha tuna han mga Israelita; ha Gaza,+ Gat,+ ngan Asdod+ la may nagpabilin nga mga Anakim.+
23 Salit ginsakop ni Josue an bug-os nga tuna, sugad han iginsaad ni Jehova kan Moises,+ ngan katapos iginhatag ito ni Josue ha Israel sugad nga panurundon sumala ha ira mga malon, nga babahinbahinon ha ira mga tribo.+ Ngan an tuna nakapahuway ha girra.+
