Eclesiastes 6:1-12

  • May panag-iya pero diri nalilipay hito (1-6)

  • Pahimulsi an may-ada ka yana (7-12)

6  May nakita ako nga usa pa nga makasurubo nga butang* ha ilarom han adlaw, ngan komon ito ha mga tawo:  Gintatagan han tinuod nga Dios an usa nga tawo hin mga bahandi ngan hin materyal nga mga panag-iya ngan hin kadungganan, salit diri hiya nagkukulang hin bisan ano nga iya ginhihingyap;* kondi diri hiya gintatagan han tinuod nga Dios hin higayon nga maglipay hito, lugod estranghero an gintutugotan nga maglipay hito. Waray ini pulos ngan makasurubo gud.  Kon an usa nga tawo magin tatay hin 100 ka beses ngan mabuhi hin damu ka tuig ngan malagas, pero diri hiya* nalilipay ha iya mag-opay nga mga butang antes hiya umabot ha lubnganan,* masisiring ko nga mas maopay pa ha iya an bata nga natawo nga patay na.+  Kay waray pulos an paggawas hini nga bata ngan binaya hiya ngadto ha kasisidman, ngan an iya ngaran napuputos han kasisidman.  Pero bisan kon waray gud hiya makakita han adlaw* o makahibaro hin bisan ano, mas maopay pa gihapon hiya* hito nga tawo.+  Ano an kapulsanan han pagin buhi hin duha ka yukot ka tuig pero waray man makaeksperyensya hin kalipay? Diri ba uusa la nga lugar an kakadtoan han ngatanan?+  An usa nga tawo nagpipinaniguro ha pagtrabaho basi pun-on an iya baba;+ kondi diri gud natatagbaw an iya hingyap.*  Ano an bentaha han maaramon nga tawo ha lurong nga tawo,+ o ano an kapulsanan han pagin maaram han pobre nga tawo ha pag-atubang ha kinabuhi?*  Mas maopay na la an pagpahimulos ha nakikita han mga mata kay ha paghingyap han mga butang nga diri makukuha.* Ini liwat waray pulos, paglinanat la ha hangin. 10  An anoman nga naeksister yana ginngaranan na hadto, ngan hinbaroan na kon ano an tawo; ngan diri hiya makakahimo pakiglantugi* ha iya nga mas gamhanan kay ha iya. 11  Samtang nagtitikadamu an mga pulong,* nagtitikaduro an kawaray-pulos hito; ngan ano nga kapulsanan an iginhahatag hito ha tawo? 12  Hin-o an maaram kon ano an pinakamaopay nga buhaton han usa nga tawo ha iya kinabuhi durante han pipira nga adlaw han iya halipot* nga kinabuhi, nga nalabay pariho hin lambong?*+ Kay hin-o an makakasumat ha tawo kon ano an mahitatabo ha ilarom han adlaw kon waray na hiya?

Mga footnote

O “kapakyasan.”
O “diri hiya nagkukulang hin bisan ano para ha iya kalag.”
O “an iya kalag.”
O “ngan bisan an lubnganan waray niya magin panag-iya.”
Ha iba nga lugar, “sudang.”
Lit., “mas may kapahuwayan hiya.”
O “kalag.”
Lit., “ha paglakat ha atubangan han mga buhi.”
O “kay ha paglinakat-lakat han kalag.”
O “pagdepensa han iya kalugaringon.”
O posible nga “mga butang.”
O “waray pulos.”
Ha iba nga lugar, “dagaw.”