Eclesiastes 4:1-16

  • Panalumpigos mas maraot kay han kamatayon (1-3)

  • Balanse nga pagtagad ha trabaho (4-6)

  • An bili han sangkay (7-12)

    • An duha mas maopay kay ha usa (9)

  • Kinabuhi han magmarando mahimo magin waray pulos (13-16)

4  Gintagan ko utro hin atensyon an ngatanan nga panalumpigos nga nahitatabo ha ilarom han adlaw. Nakita ko an mga luha han mga gintatalumpigos, ngan waray nagliliaw ha ira.+ Ngan an mga nagtatalumpigos ha ira may gahum, ngan waray nagliliaw ha ira.  Salit nakasiring ako nga mas maopay pa an namatay na kay han buhi pa.+  Ngan mas maopay pa kay ha ira nga duha adton waray pa matawo,+ nga waray makakita han magraot nga mga butang nga ginbubuhat ha ilarom han adlaw.+  Ngan nakita ko an duro nga pangalimbasog* ngan kaabtik ha pagtrabaho nga resulta han kompetisyon han mga tawo ha usa kag usa;+ ini liwat waray pulos, paglinanat la ha hangin.  An lurong nga tawo nagtatákop han iya mga kamot samtang nagtitikanipis an iya unod.*+  Mas maopay an gutiay* nga pagpahuway kay han duro* nga pagpinaniguro ha pagtrabaho ngan paglinanat ha hangin.+  Naghatag ako hin atensyon ha usa pa nga ehemplo han mga butang nga waray pulos ha ilarom han adlaw:  May tawo nga nag-uusahan la ngan waray gud kaupod; waray hiya anak o bugto, pero waray hunong an ngatanan niya nga pagpinaniguro ha pagtrabaho. An iya mga mata diri gud natatagbaw ha mga bahandi.+ Kondi nagpapakiana ba hiya ha iya kalugaringon, ‘Para kan kanay an akon pagpinaniguro ha pagtrabaho ngan an diri ko paghatag ha akon kalugaringon* han mag-opay nga mga butang’?+ Ini liwat waray pulos ngan makasurubo nga buruhaton.+  An duha mas maopay kay ha usa+ tungod kay may maopay nga balos an* ira pagpinaniguro ha pagtrabaho. 10  Kay kon matumba an usa ha ira, mabubuligan han usa an iya kaupod nga bumuhát. Pero ano an mahitatabo ha tawo nga natumba nga waray kaupod nga mabulig ha iya ha pagbuhát? 11  Labot pa, kon an duha mahigda nga magkaupod, magpapabilin hira nga mapaso, pero paonan-o makakapabilin nga mapaso an nag-uusahan la? 12  Ngan an usa nga tawo mahimo makapirde ha tawo nga nag-uusahan la, pero an duha nga magkaupod makakaato ha iya. Ngan an tulo nga higot nga ginlubid diri madagmit* mautod. 13  Mas maopay an bata nga pobre pero maaramon kay han hadi nga lagas na pero lurong,+ nga diri na namamati ha pahamangno.+ 14  Kay ginawas hiya* ha prisohan basi magin hadi,+ bisan kon igin-anak hiya nga pobre durante han paghadi hito nga tawo.+ 15  Ginhunahuna ko an ngatanan nga buhi nga naglalakat-lakat ha ilarom han adlaw, pati na an nahitabo ha bata nga manurunod nga sinaliwan ha hadi. 16  Bisan kon damu gud an nasuporta ha iya, an mga maabot ha urhi diri malilipay ha iya.+ Ini liwat waray pulos, paglinanat la ha hangin.

Mga footnote

O “an pagpinaniguro ha pagtrabaho.”
Lit., “ngan nakaon han iya kalugaringon nga unod.”
Lit., “an usa ka harop.”
Lit., “han duha ka harop.”
O “kalag.”
O “mas daku an ira napapahimulosan han.”
O “masayon.”
Posible nga nagtutudlok ha maaramon nga bata.