An Siyahan nga Libro han mga Hadi 18:1-46
18 Katapos hin pipira ka panahon, ha ikatulo ka tuig,+ an pulong ni Jehova inabot kan Elias, nga nasiring: “Lakat, pakadto kan Ahab, ngan magpapauran ako ha tuna.”+
2 Salit hi Elias kinadto kan Ahab, samtang uraura an gutom+ ha Samaria.
3 Hito liwat nga panahon, iginpatawag ni Ahab hi Obadias, nga amo an tinaporan ha panimalay. (Hi Obadias may daku nga kahadlok kan Jehova,
4 ngan han ginpamatay* ni Jezebel+ an mga propeta ni Jehova, ginkuha ni Obadias an 100 nga propeta ngan gintago hira nga tag-50 ha lungib, ngan iya ginsuplayan hira hin tinapay ngan hin tubig.)
5 Katapos, hi Ahab nagsiring kan Obadias: “Latasa an tuna, pakadto ha ngatanan nga burabod han tubig ngan ha ngatanan nga walog.* Bangin makaagi kita hin igo nga mga banwa basi matipigan nga buhi an mga kabayo ngan mga mula* ngan diri magkamatay an ngatanan naton nga hayop.”
6 Salit ginbahin nira an tuna nga ira kakadtoan. Hi Ahab kinadto ha usa nga direksyon nga hiya la, ngan hi Obadias kinadto ha lain nga direksyon nga hiya la.
7 Samtang naglalakat hi Obadias dida ha dalan, nakadto hi Elias basi tapoon hiya. Nakilala dayon niya hiya ngan linuhod nga nahapa ngan nagsiring: “Ikaw ba ini, Elias nga akon ginoo?”+
8 Binaton hiya: “Ako ini. Pakadto ngan sumati an imo ginoo: ‘Aanhi hi Elias.’”
9 Pero nagsiring hiya: “Ano nga sala an akon nabuhat nga sadang mo itubyan an imo surugoon ngadto kan Ahab basi patayon ako?
10 Sugad nga buhi hi Jehova nga imo Dios, waray nasud o ginhadian nga waray pakadtui han akon ginoo basi pamilngon ka. Katapos nira sumiring, ‘Waray hiya dinhi,’ ginpapasumpa niya an ginhadian ngan an nasud nga waray hira makaagi ha imo.+
11 Yana nasiring ka, ‘Pakadto ngan sumati an imo ginoo: “Aanhi hi Elias.”’
12 Pagbaya ko ha imo, dadad-on ka han espiritu ni Jehova+ ngadto ha lugar nga diri ko hibabaroan, ngan kon sumatan ko hi Ahab ngan diri ka niya maagian, sigurado nga papatayon ako niya. Pero an imo surugoon may-ada kahadlok kan Jehova tikang ha iya kabata.
13 Waray ba sumati an akon ginoo mahitungod han akon ginbuhat han ginpamatay ni Jezebel an mga propeta ni Jehova, kon paonan-o ko gintago an 100 nga propeta ni Jehova nga 50 an kada grupo ha usa nga lungib ngan padayon nga ginsuplayan hira hin tinapay ngan hin tubig?+
14 Pero yana nasiring ka, ‘Pakadto ngan sumati an imo ginoo: “Aanhi hi Elias.”’ Sigurado nga papatayon ako niya.”
15 Pero, hi Elias nagsiring: “Sugad nga buhi hi Jehova han mga hugpo nga akon gin-aalagaran,* yana nga adlaw makadto ako ha iya.”
16 Salit hi Obadias linarga basi makigkita kan Ahab ngan ginsumatan hiya, ngan hi Ahab nakigkita kan Elias.
17 Pakakita gud ni Ahab kan Elias, hiya nagsiring ha iya: “Ikaw ba ini nga nagdadara hin daku nga problema* ha Israel?”
18 Binaton hiya: “Diri ako an nagdara hin problema ha Israel, lugod ikaw ngan an panimalay han imo tatay, tungod ha pagsalikway han mga sugo ni Jehova ngan tungod ha pagsunod ha mga Baal.+
19 Ngan yana ipatawag an bug-os nga Israel ngadi ha akon ha Bukid Carmel,+ sugad man an 450 nga propeta ni Baal ngan an 400 nga propeta han sagrado nga poste,*+ nga nangangaon ha lamesa ni Jezebel.”
20 Salit hi Ahab nagpadara hin mensahe ha ngatanan nga katawohan han Israel ngan gintirok an mga propeta didto ha Bukid Carmel.
21 Katapos, hi Elias hinirani ha ngatanan nga katawohan ngan nagsiring: “Tubtob san-o kamo magkikimpang-kimpang ha duha nga magkaiba nga opinyon?*+ Kon hi Jehova an tinuod nga Dios, sunod kamo ha iya;+ pero kon hi Baal, sunod kamo ha iya!” Pero an katawohan waray iginbaton ha iya nga bisan usa ka pulong.
22 Ngan hi Elias nagsiring ha katawohan: “Ako na la an nahibilin nga propeta ni Jehova,+ samtang an mga propeta ni Baal 450 nga lalaki.
23 Tagi kami niyo hin duha nga turilyo nga baka, ngan papilia hira hin usa nga turilyo nga baka ngan tadtaron ito ngan ibutang ito dida ha sungo, pero kinahanglan diri nira ito suritan. Iaandam ko an usa pa nga turilyo nga baka, ngan ibubutang ko ito dida ha sungo, pero diri ko ito susuritan.
24 Katapos, matawag kamo ha ngaran han iyo dios,+ ngan matawag ako ha ngaran ni Jehova. An Dios nga bumaton pinaagi hin kalayo amo an tinuod nga Dios.”+ Ngan an ngatanan nga katawohan binaton: “Maopay an imo ginsiring.”
25 Yana hi Elias nagsiring ha mga propeta ni Baal: “Pagpili kamo hin usa nga turilyo nga baka ngan kamo an siyahan nga mag-andam hito, kay kamo an mas damu. Katapos, tawag kamo ha ngaran han iyo dios, pero ayaw niyo ito suriti.”
26 Salit ira ginkuha an turilyo nga baka nga ira ginpili, ngan gin-andam ito, ngan nagtinawag hira ha ngaran ni Baal tikang ha aga tubtob ha udto, nga nasiring: “O Baal, batona kami!” Pero waray tingog ngan waray bisan usa nga nabaton.+ Padayon nga nagkimpang-kimpang hira ha palibot han halaran nga ira ginhimo.
27 Han mga udto na, hi Elias nagyaangyaang* ha ira ngan nagsiring: “Guliat kamo hin daku! Tutal, usa hiya nga dios!+ Bangin namamalandong hiya o kinadto hiya ha kasilyas.* O bangin nakaturog hiya ngan kinahanglan nga may magpukaw ha iya!”
28 Nan-gugliat hira hin daku ngan nagsinamad han ira kalugaringon gamit an mga pisaw* ngan mga sugob, sumala ha ira kustomre, tubtob nga nagdurugo na hira.
29 Nakalabay na an udto ngan padayon nga ginios hira pariho hin mga lurong* tubtob nga inabot an oras ha paghalad han lugas nga iginhahalad ha pagsirom, pero waray tingog ngan waray bisan usa nga nabaton; waray bisan usa nga naghatag hin atensyon.+
30 Ha urhi, hi Elias nagsiring ha ngatanan nga katawohan: “Hirani kamo ha akon.” Salit an ngatanan nga katawohan hinirani ha iya. Katapos, iya gin-ayad an naguba nga halaran ni Jehova.+
31 Kahuman, hi Elias nagkuha hin 12 nga bato nga katugbang han kadamu han mga tribo han mga anak ni Jacob, nga ha iya nagsiring hi Jehova: “Israel na an imo magigin ngaran.”+
32 Ginhimo niya an mga bato nga halaran+ ha ngaran ni Jehova. Katapos, naghimo hiya hin kanal ha palibot han halaran, nga an kahaluag igo sabwagan hin duha ka seah* nga liso.
33 Katapos hito, iya ginplastar an mga sungo, gintadtad an turilyo nga baka, ngan iginbutang ito dida ha mga sungo.+ Yana nagsiring hiya: “Pun-a hin tubig an upat nga tadyaw ngan igbubo ito ha halad nga sinunog ngan ha mga sungo.”
34 Katapos hiya nagsiring: “Buhata ito utro.” Salit ira ito ginbuhat utro. Nagsiring na liwat hiya: “Buhata ito ha ikatulo ka beses.” Salit ira ito ginbuhat ha ikatulo ka beses.
35 Ngan inawas an tubig ha palibot han halaran, ngan ginpuno liwat niya hin tubig an kanal.
36 Han inabot an oras ha paghalad han lugas nga iginhahalad ha pagsirom,+ hi Elias nga propeta hinirani ha halaran ngan nagsiring: “O Jehova, nga Dios nira Abraham,+ Isaac,+ ngan Israel, yana nga adlaw imo unta ipahibaro nga ikaw an Dios ha Israel ngan ako an imo surugoon ngan ginbubuhat ko ini ngatanan uyon ha imo pulong.+
37 Batona ako, O Jehova! Batona ako basi ini nga katawohan makakilala nga ikaw, Jehova, amo an tinuod nga Dios ngan imo ginpapabalik an ira kasingkasing ngada ha imo.”+
38 Katapos hito, nahulog tikang ha igbaw an kalayo ni Jehova ngan gin-ugtang* an halad nga sinunog,+ an mga sungo, an mga bato, ngan an tapotapo, ngan ginpahubas hito an tubig ha kanal.+
39 Pakakita hito han ngatanan nga katawohan, linuhod dayon hira nga nahapa ngan nagsiring: “Hi Jehova an tinuod nga Dios! Hi Jehova an tinuod nga Dios!”
40 Katapos, hi Elias nagsiring ha ira: “Dakpa niyo an mga propeta ni Baal! Ayaw pabay-i nga makapalagiw an bisan usa la ha ira!” Ira dayon hira ginpandakop, ngan gindara hira ni Elias ngadto ha sapa* han Kison+ ngan ginpamatay hira didto.+
41 Yana hi Elias nagsiring kan Ahab: “Sagka, kaon ngan inom, kay may-ada haganas han makusog nga uran.”+
42 Salit hi Ahab sinagka basi kumaon ngan uminom, samtang hi Elias sinagka ha bawbaw han Carmel ngan linuhod ha tuna, nga an iya nawong aada ha butnga han iya mga tuhod.+
43 Katapos, nagsiring hiya ha iya kabulig: “Alayon, sagka ngan pagkita ngadto ha dagat.” Salit sinagka hiya ngan nagkita ngan nagsiring: “Waray gud bisan ano.” Pito ka beses nga nagsiring hi Elias, “Balik.”
44 Han ikapito ka beses, an iya surugoon nagsiring: “Kitaa! May gutiay nga dampog pariho hin kamot han tawo nga nagtitipaigbaw tikang ha dagat.” Yana nagsiring hiya: “Lakat, sumati hi Ahab, ‘Andama an imo karuwahe! Lugsad na basi diri ka malangan han uran!’”
45 Hito liwat nga panahon, an langit nagsirom tungod han mga dampog, hinuyop an hangin, ngan inuran hin makusog;+ ngan hi Ahab padayon nga nagbiyahe sakay han karuwahe ngan kinadto hiya ha Jezreel.+
46 Pero ginios an gahum* ni Jehova kan Elias, ngan iginsuksok niya an ubos nga bahin han iya bado* ha iya baliatang ngan nagdinalagan, ngan nahiuna pa hiya kan Ahab ngadto ha Jezreel.
Mga footnote
^ Lit., “ginpangutod.”
^ An Hebreo nga pulong nagtutudlok ha anak han asno nga lalakí ngan kabayo nga babayé.
^ Lit., “ha iya atubangan natindog ako.”
^ O “nagin hinungdan nga mawara an pag-uyon.”
^ O “ha duha nga saklay.”
^ O posible nga “nagbiyahe hiya.”
^ Ha iba nga lugar, “nagtamay.”
^ Ha iba nga lugar, “dipang.”
^ O “ginios hira pariho hin mga propeta.”
^ Ha iba nga lugar, “ginpugdang.”
^ Lit., “kinada an kamot.”
^ O “nagtakgong hiya.”
