An Siyahan nga Libro han mga Hadi 16:1-34
16 An pulong ni Jehova kontra kan Baasa inabot kan Jehu+ nga anak nga lalaki ni Hanani,+ nga nasiring:
2 “Ginbangon ko ikaw tikang ha tapotapo ngan ginhimo ko ikaw nga lider han Israel nga akon katawohan,+ pero padayon nga naglakat ka ha dalan ni Jeroboam ngan ginpahinabo nga makasala an Israel nga akon katawohan salit ira ako ginpasina tungod han ira mga sala.+
3 Sisilhigon ko hi Baasa ngan an iya panimalay, ngan an iya panimalay hihimoon ko nga pariho han panimalay ni Jeroboam+ nga anak nga lalaki ni Nebat.
4 An bisan hin-o nga kan Baasa nga mamatay ha syudad, kakaunon han mga ayam; ngan an bisan hin-o nga iya nga mamatay ha uma, kakaunon han mga tamsi ha langit.”
5 Mahitungod han iba pa nga bahin han kasaysayan ni Baasa, an iya ginbuhat ngan an iya pagkagamhanan, diri ba iginsurat ito ha libro han kasaysayan han mga panahon han mga hadi han Israel?
6 Katapos, hi Baasa pinahuway kaupod han iya mga kaapoy-apoyan ngan iginlubong ha Tirza;+ ngan hi Elah nga iya anak an nagin hadi kasaliwan niya.
7 Pinaagi liwat kan Jehu nga anak ni Hanani, inabot an pulong ni Jehova kontra kan Baasa ngan ha iya panimalay, tungod han ngatanan nga karaotan nga iya ginbuhat ha pagkita ni Jehova ngan salit ginpasina hiya tungod han mga buhat han iya mga kamot, nga nagin pariho ha panimalay ni Jeroboam, ngan tungod liwat han iya pagpatay ha iya.*+
8 Ha ika-26 ka tuig ni Hadi Asa han Juda, hi Elah nga anak ni Baasa nagin hadi han Israel ha Tirza, ngan nagmando hiya hin duha ka tuig.
9 An iya surugoon nga hi Zimri, nga lider han katunga han iya nakakaruwahe nga mga sundalo, nakigkunsabo kontra ha iya samtang nakadto hiya ha Tirza nag-ininom tubtob nga nahubog ha balay ni Arza, nga gintaporan han panimalay ha Tirza.
10 Sinulod hi Zimri ngan gin-atake hiya+ ngan ginpatay hiya ha ika-27 ka tuig ni Hadi Asa han Juda, ngan nagin hadi hiya kasaliwan niya.
11 Han nagin hadi na hiya, paglingkod gud niya ha iya trono, iya ginpatay an bug-os nga panimalay ni Baasa. Waray hiya iginbilin bisan usa nga lalaki,* ha iya man mga paryente* o ha iya kasangkayan.
12 Salit ginpoo ni Zimri an bug-os nga panimalay ni Baasa, sumala han pulong ni Jehova nga iginyakan kontra kan Baasa pinaagi kan Jehu nga propeta.+
13 Tungod ini han ngatanan nga sala nga ginbuhat ni Baasa ngan han iya anak nga hi Elah ngan an ira mga sala nagin hinungdan han pakasala han Israel pinaagi ha pagpasina kan Jehova nga Dios han Israel tungod han ira waray pulos nga mga idolo.+
14 Mahitungod han iba pa nga bahin han kasaysayan ni Elah, an ngatanan nga iya ginbuhat, diri ba iginsurat ito ha libro han kasaysayan han mga panahon han mga hadi han Israel?
15 Ha ika-27 ka tuig ni Hadi Asa han Juda, hi Zimri nagin hadi hin pito ka adlaw ha Tirza samtang an mga sundalo nagkakampo kontra han Gibeton,+ nga sakop han mga Filisteo.
16 Ha urhi, an mga sundalo nga nagkampo nakabati hini nga ginsiring: “Hi Zimri nakigkunsabo ngan ginpatay liwat niya an hadi.” Salit ginhimo han bug-os nga Israel hi Omri,+ an lider han kasundalohan, nga hadi han Israel hito nga adlaw didto ha kampo.
17 Hi Omri ngan an bug-os nga Israel nga upod niya sinagka tikang ha Gibeton ngan ginpalibotan an Tirza.
18 Han nakita ni Zimri nga nasakop na an syudad, kinadto hiya ha marig-on nga torre ha balay* han hadi ngan ginsunog an balay samtang nakadto hiya ha sulod, ngan namatay hiya.+
19 Tungod ini han iya mismo mga sala nga iya ginbuhat pinaagi han pagbuhat han maraot ha pagkita ni Jehova pinaagi ha paglakat ha dalan ni Jeroboam ngan han sala nga nabuhat han Israel tungod ha iya.+
20 Mahitungod han iba pa nga bahin han kasaysayan ni Zimri ngan han iya pakigkunsabo, diri ba iginsurat ito ha libro han kasaysayan han mga panahon han mga hadi han Israel?
21 Ito an panahon nga nabahin an katawohan han Israel ha duha nga grupo. An usa nga grupo han mga tawo nagin sumurunod ni Tibni nga anak ni Ginat, karuyag nira nga himoon hiya nga hadi, ngan an usa pa nga grupo sinunod kan Omri.
22 Pero an mga tawo nga sinunod kan Omri nagdaog kontra han mga tawo nga sinunod kan Tibni nga anak ni Ginat. Salit namatay hi Tibni, ngan nagin hadi hi Omri.
23 Ha ika-31 ka tuig ni Hadi Asa han Juda, hi Omri nagin hadi ha Israel, ngan nagmando hiya hin 12 ka tuig. Ha Tirza nagmando hiya hin unom ka tuig.
24 Ginpalit niya an bukid han Samaria tikang kan Semer hin duha ka talanton* nga silber, ngan nagtukod hiya hin syudad dida ha bukid. Iya ginngaranan an syudad nga iya gintukod hin Samaria,*+ uyon ha ngaran ni Semer nga tag-iya* han bukid.
25 Hi Omri padayon nga nagbuhat hin maraot ha pagkita ni Jehova, ngan mas maraot pa hiya kay han ngatanan nga nahiuna ha iya.+
26 Naglakat hiya ha ngatanan nga dalan ni Jeroboam nga anak ni Nebat ngan an sala nga nabuhat han Israel tungod ha iya pinaagi ha pagpasina kan Jehova nga Dios han Israel tungod han ira waray pulos nga mga idolo.+
27 Mahitungod han iba pa nga bahin han kasaysayan ni Omri, an iya ginbuhat ngan an iya mga kadaogan ha pakig-away, diri ba iginsurat ito ha libro han kasaysayan han mga panahon han mga hadi han Israel?
28 Katapos, hi Omri pinahuway kaupod han iya mga kaapoy-apoyan ngan iginlubong ha Samaria; ngan hi Ahab+ nga iya anak an nagin hadi kasaliwan niya.
29 Hi Ahab nga anak ni Omri nagin hadi ha Israel han ika-38 ka tuig ni Hadi Asa han Juda, ngan hi Ahab nga anak ni Omri nagmando ha Israel ha Samaria+ hin 22 ka tuig.
30 Hi Ahab nga anak ni Omri mas maraot ha pagkita ni Jehova kay han ngatanan nga nahiuna ha iya.+
31 Sugad hin gutiay la nga butang para ha iya an pagsunod han mga sala ni Jeroboam+ nga anak ni Nebat, ginkuha liwat niya sugad nga asawa hi Jezebel+ nga anak ni Etbaal, an hadi han mga taga-Sidon,+ ngan nag-alagad hiya kan Baal+ ngan nagyukbo ha iya.
32 Dugang pa, naghimo hiya hin halaran para kan Baal ha balay* ni Baal+ nga iya gintukod didto ha Samaria.
33 Ginhimo liwat ni Ahab an sagrado nga poste.*+ Damu gud an ginbuhat ni Ahab nga nakapasina kan Jehova nga Dios han Israel kay han ginbuhat han ngatanan nga hadi han Israel nga nahiuna ha iya.
34 Durante han paghadi ni Ahab, gintukod utro ni Hiel nga taga-Bethel an Jerico. Namatay an iya suhag nga hi Abiram han iginpahamutang niya an pundasyon hito, ngan namatay an iya putó nga hi Segub han iginbutang niya an mga purtahan hito, sumala han pulong ni Jehova nga iginyakan pinaagi kan Josue nga anak ni Nun.+
Mga footnote
^ Karuyag sidngon, hi Nadab, an anak nga lalaki ni Jeroboam.
^ Lit., “bisan hin-o nga naihi ha pader.” Usa nga Hebreo nga ekspresyon han panamay mahitungod ha mga lalaki.
^ O “mga nabulos para han iya dugo.”
^ O “palasyo.”
^ Nangangahulogan nga “Gintatag-iya han Angkan han Semer.”
^ Lit., “ginoo.”
^ O “templo.”
