Agosto
Savado 1 yuʼun agosto
Chtal mukʼta tsatsal vokolil ti muʼyuk bu jech kʼotem-o ta pasel kʼalal lik tal li balumil kʼalal to avie (Mat. 24:21).
Ta jkʼanbetik vokol Jeova ti akʼo xchikintaik mantal li krixchanoetike xchiʼuk ti x-ayanuk ta yoʼontonik xtunik ta stojolal Jeova eke. Pe ¿kʼusi chkʼot ta stojolal li buchʼutik mu skʼan xchikintaik li pʼijubtasel avie? Xuʼ van kuxul ch-iktaatik yuʼun Jeova li buchʼu tsjel to stalelalik kʼalal mi laj yilik ti chichʼ lajesel li Mukʼta Babiloniae. Taje tskoltautik ta yaʼibel smelolal ti tsots skʼoplal skʼan jech-o jpʼijubtastik batel li krixchanoetike. Li krixchanoetike xuʼ van xvul ta sjolik ta tsʼakal li kʼusi chkalbetik avie (koʼoltaso xchiʼuk Esekiel 33:33). Li pʼijubtasel chkalbetike xuʼ xvul ta sjolik ta tsʼakal, vaʼun chlokʼ ta yoʼontonik chtunik ta stojolal Jeova yoʼ to oy yorail yuʼunike. Jech kʼuchaʼal li jchabichukinab ta Filipos ti jaʼ to la xchʼam mantal kʼalal echʼ tsatsal nikele, avie oy van krixchanoetik ti mu skʼan xchikintaik mantal eke, pe xuʼ van jaʼ to xchʼamik kʼalal mi laj yilik ti chichʼ lajesel li Mukʼta Babiloniae (Ech. 16:25-34). w24.05 17 par. 9, 10
Jaʼ slajeb Mantal li Kristoe (Rom. 10:4).
Oy kʼusi chakʼ jchantik li kʼusi laj yalbe batel j-ebreoetik li jtakbol Pabloe. Junantike muʼyuk xa ox chakʼ yipalik sventa xchʼiik ta mantal. Jaʼ yuʼun, xi laj yalanbee: «Yaʼlel chuʼil to chakʼanik yan velta, maʼuk chakʼanik li tsatsal veʼlile» (Ebr. 5:12). Muʼyuk laj yakʼ ta yoʼontonik li kʼusitik achʼ laj yakʼ ta chanel Jeova li ta tsobobbaile (Prov. 4:18). Kalbetik junuk skʼelobil. Ep yajtsʼaklomtak Kristo ti jaʼik judaetike jech-o chalik ti skʼan xchʼunik li Smantal Moises akʼo mi echʼem xa ox 30 jabil slajesojbe skʼoplal Kristo kʼalal laj yakʼ ta matanal xkuxlejale (Tito 1:10). Ti jech la stsʼibabe batel karta judaetik li Pabloe, jaʼ sventa skoltaan yoʼ xchʼamik li chanubtaseletik ti tsotsik skʼoplale. Li karta tsʼibabatik batele koltaatik-o sventa xilik ti mas xa lek ti kʼu yelan chichʼik ta mukʼ Jeova jech kʼuchaʼal laj yakʼ ta chanel li Jesuse. Jech xtok, jaʼ tsatsubtasbat-o yoʼontonik xchiʼuk koltaatik sventa jechuk-o xcholik mantal (Ebr. 10:19-23). w24.04 6 par. 15
Chchaʼkuxiik li buchʼutik tukʼike xchiʼuk li buchʼutik muʼyuk tukʼike (Ech. 24:15).
Ti kʼu xa sjalil la stoy sbaik ta stojolal Jeova li Satanas, Adan xchiʼuk Evae, ta smiyonal xa noʼox krixchanoetik chamemik. ¿Kʼusi chkʼot ta stojolalik li buchʼutik chamemike? Li 144 mil ti jaʼik yajtsʼaklomtak Kristoe chchaʼkuxiik ta vinajel xchiʼuk muʼyuk xa bu chchamik (Apok. 14:1). Jech xtok, oy epal viniketik xchiʼuk antsetik ti skʼanojik Jeovae ta xichʼik chaʼkuxesel xchiʼuk chkuxiik ta sbatel osil ta balumil mi jech-o tukʼ chakʼ sbaik li ta Jmil Jabil kʼalal jaʼo ch-ajvalilaj li Kristoe xchiʼuk li ta slajeb prevae (Dan. 12:13; Ebr. 12:1). Li ta Jmil Jabile, «li buchʼutik muʼyuk tukʼik» ti te skʼoplal li buchʼutik muʼyuk tunik ta stojolal Jeova o ti jaʼ la spasik li kʼusitik chopole, xuʼ to me xjel stalelalik xchiʼuk xlik yichʼik ta mukʼ li Diose (Juan 5:29; Luk. 23:42, 43). Jech xtok, oy junantik krixchanoetik ti toj chopol echʼike muʼyuk xa ta xichʼik chaʼkuxesel (Luk. 12:4, 5). w24.05 2 par. 3; 5 par. 15; 6 par. 17
Ta yeik noʼox chichʼikun ta mukʼ, pe li yoʼontonike nom tajek oy ta jtojolal (Is. 29:13).
Li ta Salmo 15:2 chal ti buchʼu te oy ta skarpana li Jeovae «melel kʼusi chal ta [yoʼonton]», maʼuk noʼox ti mu snaʼ sjut kʼope. Li Jeovae tskʼan ti meleluk xijkʼopoj xchiʼuk ti jechuk xvinaj ta jtalelaltik ta skotol orae (Ebr. 13:18). Taje toj tsots skʼoplal, yuʼun li Jeovae chopol chil «li buchʼu muʼyuk stukʼil kʼusi tspase, yan li buchʼu tukʼe lek tajek xil sba xchiʼuk» (Prov. 3:32). Li buchʼu «melel kʼusi chal ta yoʼontone» maʼuk noʼox me ta xchʼunbe smantaltak Jeova kʼalal te oy xchiʼuk li yantike, pe ti muʼyuk xa chchʼun kʼalal stuk te oye. Taje muʼyuk lek, jaʼ yuʼun mu jkʼan jech jpastik. ¿Kʼuxi xuʼ jech xkʼot ta stojolal junuk krixchano taje? Xuʼ van jaʼo kʼalal ta snop ti mu masuk lek li smantaltak Jeovae (Sant. 1:5-8). Xuʼ van muʼyuk ta xchʼun li kʼusitik chichʼ albel ti mu toj tsotsuk skʼoplal chile. Mi laj yakʼ venta ti muʼyuk kʼusi chopol la snuptan ta skoj ti muʼyuk la xchʼun li mantale, xuʼ van mas to chopol kʼusitik chlik spas. Akʼo mi tsnop ti chichʼ ta mukʼ li Diose, li Jeovae muʼyuk ta xchʼam (Ekl. 8:11). Li voʼotike skʼan me xvinaj ta jkʼopojeltik xchiʼuk ta jtalelaltik ti melel jnaʼ xijkʼopoj ta skotol orae. w24.06 10 par. 7, 8
Tsotsanik-o me, teuk me lek chukul ta achʼutik jech kʼuchaʼal jun chukil li kʼusi melele (Efes. 6:14).
Li yajtunelutik Jeovae oy tajek ta koʼontontik li kʼusi melel chal ta Skʼop Diose, yuʼun kʼalal ta jchantike tstsatsub-o li xchʼunel koʼontontike (Rom. 10:17). Jech xtok, jnaʼojtik lek ti Jeovae jaʼ laj yakʼ li stsobobbail yajtsʼaklomtak Kristo ti xkoʼolaj ta yoyal xchiʼuk ta yik li kʼusi melele (1 Tim. 3:15). Li Satanase oy tajek ta yoʼonton ti mu xa jpat koʼontontik li ta Vivliae o li beiltaseletik chakʼbutik tal li s-organisasion Jeovae (Efes. 4:14). Li Diabloe poʼot xa xlik yal jutbil kʼopetik sventa skontrainik Jeova li jteklumetike (Apok. 16:13, 14). Jech xtok, jnaʼojtik ti Satanase mas xa chakʼ yipal sventa sloʼla li yajtuneltak Jeovae (Apok. 12:9). Jaʼ yuʼun, tsots skʼoplal ti xkakʼtik venta li kʼusi melele xchiʼuk li kʼusi mu jaʼuke, vaʼun jaʼuk jchʼuntik li kʼusi melele (Rom. 6:17; 1 Ped. 1:22). Mi jech ta jpastike, tskoltautik sventa kuxul xijkom mi tal li mukʼta tsatsal vokolile. w24.07 8 par. 1-3
Li mantal yakal chkalbot avie mu toj tsotsuk ta chʼunel, mu toj nomuk oy ta atojolal (Deut. 30:11).
Kʼalal la spas ta steklumal j-israeletik li Jeovae, la spas jun trato xchiʼukik. Li Jeovae laj yalanbe ti chchabiane xchiʼuk ti chakʼbe bendision mi la xchʼunik li mantaletik chakʼe. Pe mi lik stoy sbaik ta stojolal jech kʼuchaʼal ti xlik yichʼik ta mukʼ yan diosetike, muʼyuk xa lek ch-ilatik xchiʼuk chil svokolik. ¿Mi jaʼ van skʼan xal ti muʼyuk xa lek chil-o sbaik xchiʼuk li Diose? Moʼoj, yuʼun li Mantal akʼbatike chal ti xuʼ sutik ta stojolal li Diose xchiʼuk ti xchikintabeik li kʼusi chale (Deut. 30:1-3, 17-20). Taje jaʼ skʼan xal ti xuʼ sutes yoʼontonike. Mi jech la spasike, xuʼ sutik talel yan velta ta stojolal li Jeovae xchiʼuk ti x-akʼbatik bendision yan veltae. Li steklumal Jeovae ep ta velta la stoy sbaik ta stojolal. Ta skoj taje, laj yil-o svokolik. Pe li Jeovae muʼyuk la snop ti mu xa kʼusi stakʼ pasel ta stojolalike, yuʼun ep ta velta la stakbe batel j-alkʼopetik sventa sutes yoʼontonik xchiʼuk ti sutik talel ta stojolale (2 Rey. 17:13, 14). w24.08 9 par. 4, 5
Lik jun tsatsal kontrainel ta stojolal li tsobobbail ta Jerusalene (Ech. 8:1).
Kʼalal cham li Jesuse, li yajtsʼaklomtak Kristo ti jaʼik j-ebreoetike oy jayibuk jabil ti tsots laj yil svokolike. Jech xtok, kʼalal mu toʼox jaluk slikel li tsobobbail ta Jerusalene, tsots laj yichʼik kontrainel. Te van 20 jabil ta mas tsʼakale, li yajtsʼaklomtak Kristo ta Judeae tsots laj yilik viʼnal, ta skoj taje, jaʼ van laj yil-o svokolik ta takʼin (Ech. 11:27-30). Li ta sjabilaltik 61, li yajtsʼaklomtak Kristoe jun toʼox yoʼontonik kʼuk sjalil, pe poʼot xa ox kʼusi tsots snuptanik. Li vaʼ orae, jaʼo takbatik batel li karta la stsʼiba li jtakbol Pabloe, ta yorail lek kʼot. Li Karta sventa j-ebreoetike ta yorail noʼox kʼot, yuʼun muʼyuk xa ox jal jun yoʼontonik. Li Pabloe laj yalbe batel mantal yajtsʼaklomtak Kristo ti kʼusi xuʼ xkoltaatik sventa xkuch yuʼunik li kʼusi poʼot snuptanike. w24.09 8 par. 1, 2
Jaʼ tspatbeikun tajek koʼonton (Kol. 4:11).
Kʼalal chkil jvokoltike, li Jeovae tstunes ermanoetik sventa xakʼbutik ta ilel ti skʼanojutike. Kʼalal chaʼibutik smelolal kʼu yelan chkaʼi jbatik o kʼalal te xchiʼinojutike, jaʼ jech tspat koʼontontik. Jech xtok, xuʼ van spatbutik koʼontontik kʼalal tskʼelbutik junuk teksto ta Vivlia o ti spasik orasion ta jtojolaltike (Rom. 15:4). Yikʼaluk van oy junuk ermano o ermana ti tsvules ta joltik ti kʼu yelan chil Jeova li kʼusi ta jnuptantike, vaʼun jaʼ tskoltautik ti junuk noʼox koʼontontike. Li kermanotaktik xtoke xuʼ skoltautik kʼalal oy kʼusitik tspas ta jtojolaltike, jech kʼuchaʼal ti chichʼik batel jveʼeltike. Sventa xavichʼ koltaele, yikʼaluk van skʼan xaval ti chakʼan koltaele (Prov. 17:17). Yikʼaluk van mu onoʼox snaʼik ti kʼu yelan chavaʼi abae o li kʼusitik chtun avuʼune (Prov. 14:10). Albo kʼu yelan chavaʼi aba li avamigotak ti yijik ta mantale. Lek me ti xavalbe ti kʼusi xuʼ spasik ta atojolale. Jech xtok, xuʼ xachiʼin ta loʼil junuk o chaʼvoʼuk moletik ta tsobobbail ti apatoj avoʼonton ta stojolale. Junantik ermanaetike mas lek chaʼiik ti jaʼ xchiʼinik ta loʼil li ermanaetik ti oy xa sjabilalik xchiʼuk ti yijik ta mantale. w24.10 10 par. 15, 16
Tsta xkuxlejal sbatel osil li buchʼu xojtikin lek li Nichʼonile xchiʼuk ti xakʼ xchʼunel yoʼonton ta stojolale (Juan 6:40).
Epal krixchanoetike tskʼel lek li kʼusi tslajesike xchiʼuk tspasik ejersisio sventa lekuk noʼox oyik. Akʼo mi jech, snaʼojik onoʼox ti chmalubik xchiʼuk ti chchamike, yuʼun tsnopik ti mu onoʼox stakʼ xijkuxi ta sbatel osile. Pe li Jesuse laj yal ti tstaik kuxlejal sbatel osil li krixchanoetike, jech kʼuchaʼal chal ta Juan 3:16 xchiʼuk 5:24. Li Jesuse la smakʼlin ta pan xchiʼuk ta choyetik ta smilal noʼox krixchanoetik. Toj labal sba li kʼusi la spase, pe mas to labal sba li kʼusi laj yal ta yokʼomale. Li epal krixchanoetike bat staik Jesus ta Kapernaum ti te xkom ta stiʼil nab Galileae. Te laj yalanbe ti xuʼ xchaʼkuxiik li krixchanoetike xchiʼuk ti xkuxiik ta sbatel osile (Juan 6:39, 40). Li kʼusi laj yal Jesuse chakʼ kiltik ti xuʼ xchaʼkuxiik talel li epal krixchanoetike xchiʼuk ti xuʼ xakuxi sbatel osil xchiʼuk li avutsʼ avalale. w24.12 8 par. 1, 2
Malaliletik, ichʼik me ta mukʼ kʼuchaʼal jun vaso ti jaʼ mas kʼune, ti jaʼ li antse (1 Ped. 3:7).
Achʼtik toe li Organización Mundial de la Salud laj yal ti epal malaliletike tsmaj yajnilik, kʼuxik kʼusi chalbeik o oy kʼusitik yan tspasik yoʼ chopoluk xaʼi sba yuʼunike. Yikʼaluk van lek xa tskʼoponik yilel li ta yeloval yantike, pe kʼalal stuk oyike, chilbajinik. ¿K’u yuʼun oy junantik malaliletik chilbajin li yajnilike? Jaʼ van ta skoj ti jech stalelal li stotike, jech oxal tsnopik ti stalel onoʼox ti jech chichʼik ilbajinel li antsetike. Junantik xtoke jaʼ te nakalik ti bu nopem xaʼiik ti jaʼ tspas mantal li vinike. Taje jaʼ la sventa xakʼik ta ilel ti vinik xaʼi sbaike. Junantik xtoke, muʼyuk xchanubtasatik ta spajesel li skapemal sjolike. Ta skoj ti tskʼelik pornografia jlom malaliletike, chopol xa kʼusi tsnopik ta stojolal li antsetike xchiʼuk tsnopik ti jaʼ noʼox sventa xchiʼinik ta vayele. Jech xtok, junantik krixchanoetik ti jaʼ chchanbeik skʼoplal taje chalik ti mas to laj yichʼik ilbajinel li ajnilaletik kʼalal jaʼo lik li chamel COVID-19, pe taje maʼuk srasonal sventa xichʼik ilbajinel li antsetike. w25.01 8 par. 2, 3
Ta skoj ti laj yil svokol ta sbekʼtal li Kristoe, li voʼoxuk eke chapano abaik sventa jechuk xanopik jech kʼuchaʼal tsnop li Kristoe (1 Ped. 4:1).
Li Jesuse jamal laj yalbe skʼoplal li mantal mas tsots skʼoplal ti te chal ta Smantal Moisese, xi laj yale: «Skʼan xakʼan ta sjunul avoʼonton li Jeova Dios avuʼune, ta sjunul akuxlejal, ta sjunul anopben xchiʼuk ta sjunul avipal» (Mar. 12:30). Jaʼ yuʼun, skʼan jkʼantik Jeova ta sjunul jkuxlejaltik, jaʼ xkaltik, ta skotol li kʼusi x-ayan kuʼuntike. Taje te smakoj li kʼusi oy ta koʼontontike, ti kʼu yelan chkaʼi jbatike xchiʼuk li kipaltike. Jech xtok, te smakoj ti kʼuxi ta jtunes li jnopbentike, jaʼ xkaltik, li kʼusitik ta jnoptike. Ta skoj ti jkʼanojtik li Jeovae, jaʼ tstij koʼontontik sventa jchanbetik ti kʼu yelan tsnope. Melel onoʼox, mu onoʼox xkaʼibetik smelolal skotol ti kʼu yelan li snopbene, pe li kʼusi xuʼ skoltautike jaʼ mi la jchanbetik li snopben Kristoe, yuʼun li stuke lek tajek la xchanbe ti kʼu yelan tsnop li Stote (1 Kor. 2:16). w25.03 8 par. 1
La skoltautik Dios yoʼ jtatik pojelal ta sventa li xchʼichʼel Xnichʼone, jech, la jtatik perton ta skoj li jmultike, jaʼ ta skoj li skʼulejal slekil yutsil yoʼontone (Efes. 1:7).
Li Jesuse jaʼ jun tukʼil vinik jech kʼuchaʼal li Adan kʼalal muʼyuk toʼox spasoj smule (1 Kor. 15:45). Jaʼ yuʼun, kʼalal cham li Jesuse, laj yichʼ tael yan velta li kʼusi chʼay yuʼun li Adane (Rom. 5:19). Vaʼun, jaʼ jech kʼot ta slajeb Adan li Jesuse. Mu xa persauk xtal yan tukʼil krixchano sventa stoj li kʼusi chʼay yuʼun li Adane, yuʼun li Jesuse laj yakʼ xkuxlejal ta «jun noʼox velta ta j-echʼel» (Ebr. 7:27; 10:12). Vaʼun chaʼa, ¿kʼusi sjelbenal li matanal sventa skʼanel perton xchiʼuk li pojelale? Li matanal sventa skʼanel pertone jaʼ li kʼusi la spas Dios sventa lekuk xil sbaik xchiʼuk li krixchanoetike. Yan li pojelale jaʼ li stojol sventa xichʼ tupʼbel smul li krixchanoetike. Li stojol taje jaʼ skʼoplal li xchʼichʼel Jesus ti laj yichʼ malel ta jtojolaltike (Ebr. 9:14). w25.02 5 par. 12, 13
Tukʼ li Diose, muʼyuk chakʼ ti akʼo xavichʼik akʼel ta preva mi mu stsʼik avuʼunike, akʼo mi yakal chavichʼik akʼel ta preva, li Diose chakʼ avilik xtok kʼuxi xuʼ xakolik sventa xkuch avuʼunik (1 Kor. 10:13).
Kʼalal ta jnuptantik prevaetike, jaʼ me skʼan xkakʼ ta koʼontontik li kʼusi mas tsots skʼoplale. Li Diabloe chal ti chkiktatik komel Jeova mi la jnuptantik vokoliletike. Jaʼ yuʼun, li kʼusi ta jpastik kʼalal ta jnuptantik junuk prevae, xuʼ me xmuyubaj-o kuʼuntik o xat-o yoʼonton kuʼuntik li Jeovae (Job 1:10, 11; Prov. 27:11). Jaʼ yuʼun, mi tukʼ chkakʼ jbatike, chkakʼtik ta ilel ti jkʼanojtik li Jeovae xchiʼuk chkakʼtik ta ilel ti jaʼ jun jutkʼop li Satanase. ¿Mi yakal chavichʼ kontrainel yuʼun ajvalil, mi chavil avokol ta takʼin, mi mu skʼanik mantal li krixchanoetike o mi oy yan kʼusi yakal chanuptan? Mi jaʼ jeche, teuk ta ajol ti mi tukʼ laj avakʼ abae, xuʼ me xmuyubaj avuʼun li Jeovae. Mu xchʼay xavaʼi ti muʼyuk chakʼ akʼo xavichʼ akʼel ta preva mi chil ti mu stsʼik avuʼune. Ta me xakʼ avipal sventa xkuch avuʼun. w24.06 22 par. 9
Ta jujuntal chichʼik akʼel ta preva kʼalal tijbil yoʼontonik xchiʼuk loʼlabilik ta skoj li kʼusi tskʼan yoʼonton stukike (Sant. 1:14).
¿Mi oy jtosuk preva ti vokol chavaʼi ta stsalele? Xibal me sba mi chanop ti muʼyuk chapʼaj ta jtosuk prevae o mi chanop ti lek tsotsot ta mantale (1 Juan 1:8). Li Pabloe laj yal ti skʼan lek vikʼil satik sventa mu xpʼajik ta jtosuk preva li buchʼutik yijik ta mantale (Gal. 6:1). Kʼuchaʼal chkakʼtik ventae, skʼan onoʼox jkʼeltik ti kʼu kelantike xchiʼuk ti xkakʼtik venta ti oy kʼusi vokol chkaʼitik stsalele (2 Kor. 13:5). ¿Kʼusi skʼan jpastik mi laj xa kakʼtik venta kʼusi ti vokol chkaʼitik stsalele? Jaʼ ti xkakʼ kipaltik jchabi jbatike. Kalbetik junuk skʼelobil. Li ta voʼnee, ¿kʼusi ti skʼan mas xchabiik li ta jun jteklum ti joyol ta muroe? Jaʼ li stiʼtake. Taje jaʼ li kʼusi skʼan mas xchabiike. Jaʼ jech li voʼotik eke, skʼan jkʼeltik lek li kʼusi vokol chkaʼitik stsalel yoʼ mu xijyal ta prevae (1 Kor. 9:27). w24.07 15 par. 5-7
Jech-o tsatin batel lek avuʼunik li lekil abtelale xchiʼuk ti xavojtikin batel mas li Diose (Kol. 1:10).
Jech kʼuchaʼal chal li teksto avie, li jun lekil abtelale jaʼ li xcholel batel li lekil aʼyejetike. Kʼalal ta jchantik xchiʼuk ta jnopbetik skʼoplal li Skʼop Diose, tstsatsub li xchʼunel koʼontontik ta stojolal Jeovae xchiʼuk chkaʼibetik lek smelolal ti kʼu yuʼun skʼan jpuktik batel li lekil aʼyejetik ta sventa li Ajvalilale. Sventa xatabe lek sbalil li Skʼop Diose, mu me ta aniluk xakʼel o ti ta anil xa chanopbe skʼoplale. ¿Kʼusi xuʼ xapas ti mi la ata junuk versikulo ta Vivlia ti vokol ta aʼibel smelolale? Sabo lek smelolal kʼusi smakoj li ta Índice de las publicaciones Watch Tower o li ta Saʼobil sventa xchanik mas li stestigotak Jeovae. Mi la achʼakbe lek yorail sventa xachanunaje, mas to me chapat avoʼonton li ta Skʼop Diose (1 Tes. 5:21). Mi mas xa ox achʼunoj lek li kʼusi chal Vivliae, mas me chakʼupin yalbel yantik li kʼusi yakal chachane. w24.04 15 par. 4, 5
Ti jech la jtsʼibaboxuk tal li jkartae jaʼ sventa chkakʼ venta mi chachʼunik skotol li mantale (2 Kor. 2:9).
Li Davide xi laj yale: «Toj lek avoʼonton xchiʼuk chapalot sventa xachʼay mulil» (Sal. 86:5). Li Mikease xi la stsʼibae: «¿Mi oy yan Dios jech kʼuchaʼal li voʼote ti chchʼay ta yoʼonton li mulile [ . . . ]?» (Mik. 7:18). Li Isaias eke xi laj yale: «Akʼo skomtsan sbe li buchʼu toj chopole xchiʼuk akʼo yikta kʼusi tsnop li jpaschoplejale; akʼo sutuk tal ta stojolal li Jeova ti jaʼ chkʼuxubinate, akʼo sutuk tal ta stojolal li Jdiostike, yuʼun muʼyuk spajeb ch-akʼvan ta perton» (Is. 55:7). Sventa xakʼik ta ilel ti chchanbeik stalelal Jeova li tsobobbail ta Korintoe, laj yichʼik albel ti skʼan ta sjunul yoʼonton xchʼamik li vinik ti sutesoj xa yoʼontone xchiʼuk ti xakʼbeik ta ilel ti skʼanojike. Mi jech la spasike, jaʼ jech chakʼik ta ilel ti yakal chchʼunik skotol li mantale. Akʼo mi oy onoʼox van jayibuk u laj yichʼ lokʼesel ta tsobobbail li vinike, la xchʼam li tukʼibtasele, vaʼun la sutes yoʼonton. Jaʼ yuʼun, li moletike muʼyuk srasonal yuʼunik sventa jal to smalaik yoʼ sut ta mantale (readmitir). w24.08 17, 18 par. 12, 13
Li june ch-ikʼat batel, li yane te ch-iktaat komel (Mat. 24:40).
Li avie oy kʼusitik toj labalik sba chkʼot ta pasel, yuʼun li Jesuse jutuk xa skʼan xchapan skotol li krixchanoetike. ¿Kʼuxi jnaʼojtik ti poʼot xa tajek xkʼot ta pasel taje? Yuʼun li Jesuse laj yalbe yajchankʼoptak jun albil kʼop ti jaʼ «senyail» ti liʼ xa oye manchuk mi mu xkiltik xchiʼuk ti jaʼ senyail ti «poʼot xa xlaj skotol li kʼusitik oy ta balumile» (Mat. 24:3). Li albil kʼop taje te ta jtatik li ta kapitulo 24 xchiʼuk 25 ta Mateo, ta kapitulo 13 ta Markos xchiʼuk ta kapitulo 21 ta Lukas. Li Jesuse laj yalbe skʼoplal oxib lokʼol kʼopetik ti chtun kuʼuntik sventa spʼijubtasutike: li lokʼol kʼop ta sventa li chijetik xchiʼuk li tentsunetike, li lajunvoʼ tojol tsebetike xchiʼuk li talentoetike. Li ta jujun skʼelobile, te chkakʼtik venta ti kʼalal chchapanvan li Jesuse tstsak ta venta kʼu yelan stalelal ta jujuntal li krixchanoetike. w24.09 20 par. 1, 2
Ta kʼanelaluk me xapasik skotol li kʼusitike (1 Kor. 16:14).
Li buchʼu lek xuʼ jchanbetike jaʼ li Jesukristoe. Li stuke jaʼ tijbat yoʼonton li kʼanelale, yuʼun skʼanoj li Stote xchiʼuk skʼanoj li krixchanoetike. Taje jaʼ tijbat yoʼonton sventa skolta li yantike xchiʼuk spas abtelaletik ti mu toj masuk tsots skʼoplale (Mat. 20:28; Juan 13:5, 14, 15). Ermanoetik, mi jaʼ tstij avoʼonton li kʼanelal eke, li Jeovae ta me xakʼbot sbendision xchiʼuk ta me skoltaot sventa xata li kʼusi oy ta avoʼonton stael ta mantale, jech kʼuchaʼal ti xakʼot ta siervo ministeriale (1 Ped. 5:5). Li ta balumile lek chichʼ ilel li buchʼu tstoybe sba skʼoplal stuke. Pe mu jechuk li ta s-organisasion Jeovae. Li ermano ti snaʼ xkʼanvan jech kʼuchaʼal la spas li Jesuse muʼyuk oy ta yoʼonton ti spas ta mantal li yantike o ti tsotsuk xa skʼoplal x-ilate. Mi oy junuk ermano ti jaʼ noʼox tskʼan ichʼel ta mukʼ kʼalal chichʼ biiltasel ta siervo ministeriale, muʼyuk tspas li abtelaletik ti mu masuk tsots skʼoplale o yan kʼusitik ti skʼan pasel sventa xichʼ chabibel li xchijtak Jeovae. Yuʼun xuʼ van pekʼel xa skʼoplal chaʼi sba mi jech la spase (Juan 10:12). w24.11 15 par. 6, 7
Li chʼul espiritue jaʼ svaʼanojoxuk kʼuchaʼal jkʼelvanejetik (Ech. 20:28).
Ta spʼejel balumile chtun mas ermanoetik sventa xkoltavanik li ta tsobobbailetike (Efes. 4:8). Mi avichʼoj xa voʼe, ¿mi oy ta avoʼonton jech spasel? (Prov. 3:27). ¿Mi yakal chavakʼ persa sventa xakʼot ta siervo ministerial? Mi siervo ministerialot xae, ¿mi oy ta avoʼonton chatun ta mol ta tsobobbail? ¿Mi xuʼ van oy kʼusitik xajel ta akuxlejal sventa xabat li ta Chanob vun sventa j-al lekil aʼyejetik yuʼun Ajvalilal yuʼun Diose? Mi labat li ta chanob vun taje, mas to me oy kʼusi xuʼ xakʼ abain li Jesuse. Mi mu spas avuʼun chavaʼie, albo li Jeovae. Kʼanbo xchʼul espiritu sventa spas avuʼun kʼusiuk noʼox abtelal ti xa-akʼbat abaine (Luk. 11:13). Li viniketik ti tsots ch-abtejik ti akʼbilik kʼuchaʼal matanale jaʼ svinajeb ti jaʼ yakal tsbeiltasutik Jesus li avi kʼakʼale (Mat. 28:20). Li Ajvalil kuʼuntike skʼanojutik tajek, chakʼ ta ilel slekil yoʼonton, te sat kʼusi chtun kuʼuntik xchiʼuk tstunes ermanoetik sventa skoltautik. ¿Mi mu jechuk ti oy ta koʼontontik ta jtojbetik ta vokole? w24.10 23 par. 16, 17
Muʼyuk xa chichʼ tael ta naʼel li kʼusitik kʼotemik ta pasel ta voʼnee (Is. 65:17).
¿Kʼusi xuʼ xkaltik ta stojolal li yajtuneltak Diose? ¿Kʼusi chkʼot ta pasel ta sventa li svokolike? Xi jamal chal li Jeovae: «Muʼyuk xa chichʼ tael ta naʼel li vokoliletik oy toʼox ta voʼnee; ta xichʼ lokʼesel batel ta yeloval jsat» (Is. 65:16). Li Jeovae chchʼaybe skʼoplal li vokoliletike xchiʼuk ta kʼunkʼun tstupʼ batel ta jnopbentik li kʼusitik chopol jnuptanojtike. Li avie xuʼ me jech chkaʼi jbatik kʼalal chijbat ta tsobajeletike. Yuʼun kʼalal te oyutike, muʼyuk ta jnopbetik skʼoplal li kʼusi ta jvul-o koʼontontike. ¿Kʼusi xuʼ jpastik sventa jechuk-o oyuk jun oʼontonal li ta paraiso ta mantale? Jaʼ ti xkakʼtik ta ilel ta jkuxlejaltik li talelaletik chakʼ chʼul espiritue, jech kʼuchaʼal li kʼanelale, li xkuxetel oʼontonale, li jun oʼontonale, li slekil oʼontonale xchiʼuk li manxoale (Gal. 5:22, 23). ¡Jaʼ jun mukʼta matanal ti oyutik ta s-organisasion Diose! Mi te oyutik-o li ta paraiso ta mantale, ta me xkiltik tspas Dios skotol li kʼusi yaloje: ti tspas jun achʼ vinajel xchiʼuk achʼ balumile. w24.04 22 par. 9, 10
Jaʼ jun petsʼ ta stojolal jun vinik mi ta anil noʼox oy kʼusi jamal chalbe Diose xchiʼuk ti ta tsʼakal to tsnopbe skʼoplal li kʼusi laj yakʼ ye tspase (Prov. 20:25).
Kʼupil sba k’alal oy buchʼu chlik snovioin sbaike, pe maʼuk me jun tajimol, yuʼun li kʼusi oy ta yoʼontonike jaʼ ti xnupunike. Mi kʼot yorail chnupunike, li buchʼu snovio sbaike chak’ yeik ta stojolal Jeova ti tskʼan sbaik xchiʼuk ti chichʼ sbaik ta muk’ ti k’u sjalil kuxulike. Kʼalal skʼan to’ox jech spasik taje o mi oy kʼusi yan chakʼ yeik spasele, skʼan baʼyuk lek snopik. K’alal tsnovioin sbaike, jaʼ chkoltaatik-o sventa xojtikin sbaik lek xchiʼuk sventa lekuk kʼusi xkʼot ta nopel yuʼunik. Li kʼusi chkʼot ta nopel yuʼunik bakʼintike jaʼ ti chnupunike o bakʼintike jaʼ ti chikta sbaike. Mi laj yikta sbaike, maʼuk me skʼan xal ti muʼyuk sbalil ti laj yojtikin sbaike, yuʼun koltaatik-o sventa lekuk kʼusi xkʼot ta nopel yuʼunik. Skʼan xkaʼibetik smelolal ti k’u yuʼun chlik snovioin sbaike, yuʼun li jun kerem o jun tsebe muʼyuk onoʼox buchʼu chlik yojtikin mi muʼyuk oy ta yoʼonton chnupun xchiʼuke. w24.05 26, 27 par. 3, 4
Mu me xakʼexav ta xcholbel skʼoplal li Kajvaltike (2 Tim. 1:8).
Junantik kerem tsebetik ti jaʼik yajtsʼaklomtak Kristoe vokol chaʼiik spakbel skʼoplal li kʼusitik xchʼunojike. Li bu vokol chaʼiik o ti chkʼexavik-oe jaʼo kʼalal chchapbeik smelolal ti kʼu yuʼun muʼyuk xchʼunojik ta sventa li evolucione. Yuʼun oy junantik maestroetike chalik ti ta melel onoʼox la ti ta kʼunkʼun lijkʼataj talele. ¿Kʼuxi xuʼ xakolta avalab anichʼnabik sventa tsotsuk yoʼonton spakbeik skʼoplal li kʼusi xchʼunojike? Albo ti muʼyuk srasonal sventa xkʼexavik ti xchʼunojik ti oy jun Jpasvaneje. ¿Kʼu yuʼun? Yuʼun oy ep sientifikoetik xchʼunojik ek ti mu ta jechuk noʼox tal li kuxlejale. Kʼalal tskʼelik ti labal sba tajek ti kʼu yelan pasbilutike, chakʼik venta ti oy jun Jpasvanej ti pʼij tajeke. Jaʼ yuʼun, muʼyuk chchʼunik ti ta jech noʼox kʼataj talel li kuxlejale. Jech xtok, li kerem tsebetike xuʼ me xkoltaatik-o sventa masuk to stsatsub xchʼunel yoʼontonik mi tsnopbeik skʼoplal kʼusi koltaatik-o yan ermanoetik sventa xchʼunik ta melel ti oy jun Jpasvaneje. w24.12 18 par. 14, 15
Xkuxet tajek yoʼonton ta sventa chʼul espiritu (Luk. 10:21).
Li Jesuse snaʼoj ti oy krixchanoetik ti chchikintaik li lekil aʼyejetike. Ti jech la snope jaʼ koltaat-o sventa xchol mantal ta sjunul yoʼonton. Li ta slajebaltik sjabilal 30, li Jesuse laj yakʼ venta ti oy krixchanoetik ti oy ta yoʼontonik chchikintaik li lekil aʼyejetike. Jaʼ yuʼun, la skoʼoltas ta tsʼunobil ti jaʼ xa yorail skʼan tsobbel sate (Juan 4:35). Tetik van jun jabil ta mas tsʼakale, xi laj yalbe li yajchankʼoptake: «Toj ep kʼusitik tsʼunbil ti skʼan tsobbel sate» (Mat. 9:37, 38). Xi to laj yal ta mas tsʼakal xtoke: «Ta melel, toj ep kʼusitik tsʼunbil ti skʼan tsobbel sate, […] kʼanbeik vokol li Yajval Abtel ti akʼo stak tal mas j-abteletik ta stsobbel sat li kʼusitik tsʼunbile» (Luk. 10:2). Li Jesuse te onoʼox ta sjol ti oy krixchanoetik ti tskʼan chchikintaik li lekil aʼyejetike xchiʼuk xmuyubaj tajek kʼalal oy buchʼu chchʼam mantale. Li Jesuse laj yakʼbe yil yajchankʼoptak ti skʼan teuk ta sjolik ti oy onoʼox buchʼutik chchikintaik li mantale. Taje jaʼ koltaatik-o sventa xcholik mantal ta sjunul yoʼontonik. w25.03 18, 19 par. 15, 16
Li Jdiose jaʼ li mukʼta ton kuʼun sventa jnakʼobbaile (Sal. 94:22).
Li Jeovae jaʼ jnakʼobbailtik. Kʼalal chtal mukʼta ikʼaloʼ ti xibal sbae, xuʼ xbat jnakʼ jbatik ta junuk chʼen o ta yolon jpʼejuk mukʼta ton. Jaʼ jech li Jeova eke, kʼalal oy kʼusitik tsots ta jnuptantike, xuʼ xbat jnakʼ jbatik ta stojolal. Ta xchabiutik xchiʼuk tskoltautik sventa mu xkil jvokoltik ta sbatel osil. Pe maʼuk noʼox taje, yuʼun jamal yaloj ti ta jelavele chakʼbe slajeb skotol li kʼusi chakʼ jvokoltike xchiʼuk li kʼusitik mu xa junuk koʼontontik yuʼune (Esek. 34:25, 26). Jtos ti kʼusi xuʼ jpastik sventa xkʼot ta jnakʼobbailtik li Jeovae, jaʼ ti jkʼopontike. Kʼalal jech ta jpastike, li Diose chakʼbutik jun oʼontonal sventa xchabi li koʼontontike xchiʼuk li jnopbentike (Filip. 4:6, 7). Li Jeovae te-o skotol ora sventa skoltautik. Xuʼ jpat koʼontontik ta stojolal, yuʼun «jaʼ li Mukʼta Ton ti te oy-o sbatel osile» (Is. 26:3, 4). Li stuke kuxul-o, jaʼ yuʼun xuʼ xkʼot ta pasel yuʼun li kʼusitik yaloje, ti xchikinta li j-orasiontike xchiʼuk xuʼ skoltautik. Jech xtok, xuʼ jpat koʼontontik ta stojolal, yuʼun tukʼ chakʼ sba ta stojolal li yajtuneltake (2 Sam. 22:26). Muʼyuk me chchʼay ta sjol li kʼusitik ta jpastik ta stojolale xchiʼuk jech-o me chakʼ jmotontik (Ebr. 6:10; 11:6). w24.06 27 par. 4-6
Li kʼusi mas tsots skʼoplal skʼan xachabie jaʼ li avoʼontone, yuʼun jaʼ sniʼoal li akuxlejale (Prov. 4:23).
Skʼan jkʼel jbatik ti mu chopoluk li kʼusi ta jchʼay-o koʼontontike, ti mu jaʼuk xbat ta koʼontontik li kʼulejale xchiʼuk ti mu jchiʼintik li chopol amigoiletike. Mi laj kakʼtik venta ti jech xa yakal ta jpastike, skʼan me oy kʼusi jpastik ta anil (Mat. 5:29, 30). Skʼan jkʼel jbatik ti mu xijnamaj ta stojolal Jeova o ti maʼuk xa ta sjunul koʼonton chijtun ta stojolale. Xuʼ me jloʼla jba jtuktik ti lek chilutik Dios mi ep xa kʼusitik ta jpastik ta mantale xchiʼuk ti mu xa persauk jchabi jbatik ta sventa li kʼusi chopole. Sventa xkaʼibetik smelolale, jnopbetik skʼoplal liʼe: ¿kʼusi van chapas kʼalal jaʼo lokʼemot ti oy tajek sik xchiʼuk ti tsots ikʼe? Kʼalal chakʼot ta anae, chalap lek pim akʼuʼ. Pe ¿mi jamal van chavikta li stiʼ anae? Moʼoj. Yuʼun mi jamal chaviktae, jech-o chalaj ta sik. Taje oy kʼusi chakʼ jchantik, ti mu baluk noʼox ti oy kʼusitik jpastik ta mantal sventa nopol oyutik ta stojolal li Jeovae. Yuʼun skʼan jmaktik li tiʼ nae, jaʼ xkaltik, ti jkʼel jbatik sventa mu jtikʼ ta koʼontontik xchiʼuk ta jnopbentik li kʼusi xuʼ sokes ti kʼu yelan xkil jbatik xchiʼuk li Jeovae (Efes. 2:2). w24.07 21 par. 6, 7
Kʼanik-o me li avajkontratakike xchiʼuk pasik-o me orasion ta stojolal li buchʼutik chilbajinoxuke (Mat. 5:44).
Mu xa noʼox albajuk ti kʼu to xkʼuxul laj yaʼi li Jesuse. ¡Chopol tajek kʼusi pasbat! Akʼo mi jech, li Jesuse jech-o skʼanoj xchiʼuk tukʼ-o laj yakʼ sba ta stojolal Jeova akʼo mi tsots tajek laj yil svokol. Muʼyuk la skʼanbe Jeova ti akʼo xakʼbe kastigo li soltaroetik ti jokʼanvanik ta jtel teʼe, yuʼun xi noʼox laj yale: «Tot, paso ta perton skotolik, yuʼun mu snaʼ li kʼusi tspasike» (Luk. 23:34). Kʼalal ta jpastik orasion ta stojolal li buchʼutik chopol kʼusi tspasbutike, mas jun koʼontontik, muʼyuk kapem-o joltik xchiʼuk muʼyuk ta jnakʼ skʼakʼal koʼontontik. Avi ti kuxulutik to ta mol balumile, xuʼ onoʼox me oy kʼusi chopol xkichʼtik pasbel. Pe mu ventauk li kʼusi jnuptantike, jechuk-o me jkʼanbetik koltael li Jeovae. Jech xtok, kakʼtik persa jchanbetik stalelal Jesus kʼalal oy kʼusi chopol chkichʼtik pasbele xchiʼuk ti jechuk-o xkakʼ ta jkuxlejaltik li beiltaseletik ta Vivliae. Mi jech la jpastike, ta me xakʼbutik bendision li Jeovae (1 Ped. 3:8, 9). w24.11 6 par. 16; 7 par. 17, 19
Maʼukot jun Dios ti lek chavil li choplejale; muʼyuk buchʼu chopol te chkom-o ta atojolal (Sal. 5:4).
Li Jeovae muʼyuk lek chil skotol li kʼusitik chopol chichʼ pasele, yuʼun spʼajoj li buchʼutik tspas smule (Sal. 5:4-6). Li stuke tskʼan ti jtsaktik ta venta li mantaletik ta Vivliae, pe taje maʼuk skʼan xal ti tukʼ xa chbat ta pasel kuʼuntik skotole, yuʼun snaʼoj ti jpasmulilutike (Sal. 130:3, 4). Akʼo mi jech, spʼajoj li «chopol viniketik ti tsjoypʼinbeik skʼoplal li slekil yutsil yoʼonton Jdiostik ta skoj ti toj kʼexlal sba li stalelalike» (Jud. 4). Li Vivliae chal ti Diose tslajesbe skʼoplal ta Armajedon li krixchanoetik ti toj chopolike (2 Ped. 3:7; Apok. 16:16). Li Jeovae «mu skʼan ti oy buchʼu xbat ta lajelal junuke». Li Vivliae chal li kʼusi oy ta yoʼonton Diose: ti sutes yoʼonton skotol li krixchanoetike (2 Ped. 3:9). Li moletik ta tsobobbaile jaʼ jech chchanbeik stalelal li Jeova eke, yuʼun oy smalael yuʼunik kʼalal tskoltaik li buchʼu tsots la spas smul yoʼ sutes yoʼontone xchiʼuk ti lekuk xil sbaik xchiʼuk Jeova yan veltae. w24.08 26 par. 1, 2
Chajam li akʼobe xchiʼuk chavakʼbe kʼusi tskʼan yoʼontonik skotol li kʼusitik kuxajtike (Sal. 145:16).
Jech kʼuchaʼal skʼanojutik li Jeovae, jaʼ jech jkʼanojtik li yantik eke, jaʼ yuʼun oy ta koʼonton chkakʼtik li kʼusi x-ayan kuʼuntike. ¿Mi oy avabinojbe skʼoplal junuk ermano ti vokol chaʼi stael li kʼusitik tslajese o ti chʼabal lek skʼuʼ spokʼe? Xuʼ me stunesot Jeova sventa xakʼbe li kʼusi chtun yuʼune. Li yajtunelutik Jeovae ojtikinbilutik ta skoj ti lek koʼontontik kʼalal oy kʼusi tsots chkʼot ta pasel ta anile. Jnoptik avaʼi kʼusi kʼot ta pasel kʼalal tal li tsatsal chamel COVID-19. Ep ermanoetike laj yakʼbeik sveʼel yan ermanoetik, skʼuʼ spokʼik xchiʼuk yan kʼusitik chtun yuʼunik. Jech xtok, ep buchʼutik laj yakʼik matanal takʼin ta sventa li abtelal ta spʼejel balumile sventa xichʼik koltael li ermanoetik ti laj yil svokolike. Jaʼ laj yakʼ ta xkuxlejalik li kʼusi chal Ebreos 13:16, ti xi chale: «Mu me xchʼay ta ajolik spasel li kʼusi leke xchiʼuk ti xavakʼbeik yantik li kʼusi oy avuʼunike, yuʼun lek tajek chil Dios li milbil matanaletik taje». w24.09 27 par. 6, 7
Sventa xanaʼik stʼujel li kʼusitik mas tsots skʼoplale (Filip. 1:10).
Nopbo skʼoplal ti yakal chasaʼ avabtel sventa xuʼ xamakʼlin li avutsʼ avalale, vaʼun la ata chib abtelal. Chasabe lek skʼoplal ti kʼu yelan li abtele, jayib ora cha-och, jayib ora chalokʼ, ti kʼu snamal xavile o yan kʼusitik. Li abtelaletik taje muʼyuk chal Vivlia ti chopole. Yikʼaluk van lek chavil junuk li abtelal taje ta skoj ti chakʼupine o ti jaʼ mas lek tojolile. Pe oy to me kʼusitik yan skʼan xatsak ta venta yoʼ to mu xachʼam li abtelal taje. Li abtelaletik taje, ¿mi oy van junuk ti tsmakot sventa mu xabat ta junantik tsobajele? ¿Mi xakʼ to van yorail xakʼel avutsʼ avalal sventa chabibiluk xaʼi sbaik, ti xmuyubajikuk xchiʼuk ti nopol xaʼi sbaik ta stojolal Jeovae? Kʼalal jech chanopbe skʼoplal taje, jaʼ tskoltaot sventa jaʼuk xapas li kʼusi mas tsots skʼoplale, jaʼ xkaltik, li yichʼel ta mukʼ Jeovae xchiʼuk ti xavakʼbe li kʼusi chtun yuʼun avutsʼ avalale, ti maʼuk xbat ta avoʼonton li saʼel takʼine. Mi jech la apase, lek me chil Jeova li kʼusi chkʼot ta nopel avuʼune xchiʼuk chakʼbot sbendision. w25.01 17 par. 11-13
Nopol oy Jeova ta stojolal li buchʼutik muʼyuk xa te tsakal chaʼi li yoʼontonike (Sal. 34:18).
Akʼo mi oy buchʼutik ti chopol kʼusi la spasbote, teuk ta ajol ti skʼanojot tajek li Jeovae xchiʼuk ti ep abalil chilote. Mi chavat avoʼontone, teuk me ta ajol ti jaʼ la skʼel alekil talel li Jeovae xchiʼuk ti xakʼot ta yajtunele (Juan 6:44). Li Jeovae tskʼan tskoltaot-o, yuʼun skʼanojot tajek. Li kʼusitik la spas Jesuse jaʼ tskoltautik ta yaʼibel smelolal ti kʼu yelan chaʼi sba li Jeovae. Kʼalal ay ta balumile, laj yakʼ venta ti kʼu yelan pʼajbilik li krixchanoetike, vaʼun la xkʼuxubinan (Mat. 9:9-12). Kalbetik skʼoplal jun ants ti tsots ip ti mu xmak xchamele. Nopaj batel ta stojolal Jesus xchiʼuk la spikbe skʼuʼ sventa xpoxtaj, vaʼun patbat yoʼonton yuʼun li Jesuse xchiʼuk kʼupil kʼoptaat ta skoj ti oy xchʼunel yoʼontone (Mar. 5:25-34). Ti kʼu yelan stalelal li Jesuse jaʼ me jech stalelal li Stot eke (Juan 14:9). Jaʼ yuʼun, jpʼeluk me ta avoʼonton ti ep abalil chilot li Jeovae xchiʼuk ti chil li alekil talelale, jech kʼuchaʼal ti oy xchʼunel avoʼonton ta stojolale xchiʼuk ti akʼanoje. w24.10 7 par. 4, 5
Chʼamo li yaʼlel jsat ta yav voʼ avuʼun ti pasbil ta nukule (Sal. 56:8).
Ti kʼu sjalil kuxi li Davide ep tajek laj yil svokol ti okʼ-oe. Ep buchʼutik ti la spʼajike xchiʼuk oy junantik yutsʼ yalal xchiʼuk junantik yamigotak ti chopol kʼusi la spasbeike. Jech xtok, muʼyuk tukʼ laj yakʼ sbaik ta stojolal (1 Sam. 19:10, 11; 2 Sam. 15:10-14, 30). Kʼalal jaʼo chil tajek svokole, xi la stsʼibae: «Lilub xa tajek ta jikʼ oʼonton; sjunul akʼobal ta xtʼuxij kuʼun jtem ta skoj li yaʼlel jsate; solel chekʼel ta yaʼlel jsat ti bu ta jpuchʼan jbae». ¿Kʼu yuʼun ti jech laj yaʼi sbae? Xi chal stuke: «Ta skoj li buchʼutik chilbajinikune» (Sal. 6:6). Ta skoj ti chopol tajek kʼusi pasbat li Davide, la svul-o yoʼonton xchiʼuk okʼ-o yuʼunik. Akʼo mi tsots kʼusitik la snuptan li Davide, snaʼoj lek ti kʼanbil yuʼun li Jeovae, jaʼ yuʼun xi la stsʼibae: «Chaʼibun Jeova ti kʼu yelan xi-avet ta okʼele» (Sal. 6:8). Li nichimal kʼop li ta teksto avie chakʼ ta ilel ti Jeovae skʼanojutik xchiʼuk oy ta yoʼonton ti kʼu yelan chkaʼi jbatike. Li Davide laj yal ti xkoʼolaj kʼuchaʼal tstsob yaʼlel jsatik ta yav voʼ ti pasbil ta nukule o ti yakal tstsʼiba ta jlik livroe. Li Davide snaʼoj lek ti yiloj Stot ta vinajel ti kʼu yelan chil svokole xchiʼuk ti te ta sjole. Maʼuk noʼox taje, yuʼun snaʼoj lek ti kʼu yelan chaʼi sbae. w24.12 22 par. 11, 12

