Proverbios 17:1-28

  • Mu chopoluk xapak sutel li kʼusi leke (13)

  • «Yoʼ to mu xlik li kʼope, jaʼ lek batan» (14)

  • «Li melel amigoile skotol ora chakʼ ta ilel ti chkʼanvane» (17)

  • «Li oʼontonal ti xmuyubaj noʼoxe jaʼ lekil poxil» (22)

  • «Li buchʼu oy lek spʼijile snaʼ spajtsan li kʼusi chale» (27)

17  Jaʼ mas lek ti bu oy jun oʼontonale* akʼo mi jpech noʼox takin pan oy,+jaʼ altik mi oy kʼop akʼo mi oy-o kʼin* li ta nae.+   Li jun jtunel ti oy spʼijile tspas ta mantal li xnichʼon yajval ti kʼexlal sba kʼusitik tspase;jech xtok, ta xichʼ xrexto* jech kʼuchaʼal ta xichʼik li xnichʼnab yajvale.   Li pʼin ti chlekubtasvane* jaʼ sventa li platae xchiʼuk li ornoe jaʼ sventa li oroe,+pe li Jeovae jaʼ chchaj ta kʼelel li oʼontonaletike.+   Li buchʼu toj chopole tstsʼet chikinta li kʼusitik chichʼ alel ti chyayijesvane,li jloʼlavanej vinike ta xchikinta li kʼusitik chopol chalik yantike.+   Buchʼuuk noʼox ti tslaban li povree jaʼ chchopol kʼopta li Jpasvanej yuʼune+xchiʼuk buchʼuuk noʼox ti xmuyubaj ta skoj ti chil svokol yantike persa ta xichʼ kastigo.+   Li buchʼutik oy xa sjabilalike jaʼ chkʼot ta skoronaik li smamobtakike,li totiletike* jaʼ yutsilalik li skerem stsebike.*   Li lekil* kʼopojele mu sta-o li buchʼu bole.+ ¡Mas to li ajvalile* mu sta-o ti mu meleluk xkʼopoje!+   Li jun matanale xkoʼolaj kʼuchaʼal ton ti ep sbalil chil li yajvale;+buyuk noʼox ti chbat li yajvale lek kʼusi chkʼot ta stojolal yuʼun.+   Buchʼuuk noʼox ti chchʼay* mulile chakʼ ta ilel kʼanelal,+pe li buchʼu te xnopnun-o xchiʼuk jtosuk kʼusie ta xchʼak sba yuʼun li buchʼu yamigo tajek sbaike.+ 10  Akʼo mi jun noʼox velta xichʼ tukʼibtasel li buchʼu xaʼibe smelolale,+ mas chkʼot ta yoʼonton,jaʼ muʼyuk chkʼot ta yoʼonton akʼo mi sien ta velta xichʼ majel li buchʼu bole.+ 11  Li chopol vinike jaʼ noʼox tskʼan tstoy sba,pe li j-almantal ti muʼyuk xkʼuxul yoʼontone ta xichʼ takel batel sventa xakʼbe kastigo.+ 12  Mas to xuʼ mi la anup ta be jkotuk meʼ oso ti laj yichʼ pojbel yalabe,jaʼ chopol mi la anup ta be li buchʼu bol ti spatoj yoʼonton ta sbolil stuke.+ 13  Mi oy buchʼu chopol tspak sutel li kʼusi leke,te chkom-o ta sna li kʼusi chopole.+ 14  Mi laj yichʼ likesel kʼope, xkoʼolaj kʼuchaʼal chichʼ jambel stiʼ li voʼ ti bu makbil yoke;yoʼ to mu xlik li kʼope, jaʼ lek batan.+ 15  Buchʼuuk noʼox ti chal ti muʼyuk smul li buchʼu toj chopole xchiʼuk buchʼuuk noʼox ti chal ti oy smul li buchʼu tukʼe:+xchaʼtosal toj chopol chil li Jeovae. 16  ¿Kʼusi stu mi oy ta yok skʼob ti xuʼ sta spʼijil li buchʼu bole,pe mi muʼyuk ta yoʼonton tskʼan tsaʼe?*+ 17  Li melel amigoile skotol ora chakʼ ta ilel ti chkʼanvane+xchiʼuk jaʼ jchiʼiltik ta vokʼel chkʼot kʼalal oy jvokoltike.+ 18  Li jun vinik ti muʼyuk yichʼoj spʼijile* chakʼ skʼob sventa tspas jun trato,tspas jun trato sventa jaʼ tsvaʼan sba ta chʼom ta yeloval li xchiʼile.+ 19  Li buchʼu skʼanoj li saʼkʼope skʼanoj li mulile.+ Buchʼuuk noʼox ti xtoyet chaʼi sbae* tsaʼ slajebal stuk.+ 20  Li buchʼu chopol yoʼontone muʼyuk kʼusi lek chkʼot ta stojolal*+xchiʼuk li buchʼu chloʼlavane ta onoʼox sta svokol. 21  Li totil ti bol xnichʼone ta svul yoʼonton;muʼyuk xmuyubaj li totil ti muʼyuk spʼijil xnichʼone.+ 22  Li oʼontonal ti xmuyubaj noʼoxe jaʼ lekil poxil,*+pe mi kʼux li koʼontontike, tslajes kipaltik.*+ 23  Li buchʼu toj chopole ta mukul chchon sba ta takʼin*sventa mu xichʼ pasel li kʼusi tukʼe.+ 24  Li pʼijilale te oy ta yeloval li buchʼu oy kʼusi lek snabe skʼoplale,jaʼuk li sat buchʼu bole xtal xbat noʼox kʼalal to ta spajeb balumil.+ 25  Li bol nichʼonile chakʼbe yatel yoʼonton li stotexchiʼuk chakʼbe svokol ti buchʼu vokʼesate.+ 26  Muʼyuk lek ti xichʼ akʼbel kastigo* li buchʼu tukʼexchiʼuk mu tukʼuk ti xichʼ tsitsel* li bankilaletike. 27  Li buchʼu oy lek spʼijile snaʼ spajtsan li kʼusi chale+xchiʼuk li buchʼu oy kʼusi lek snabe skʼoplale te noʼox tsʼijil chkom.*+ 28  Mi te noʼox tsʼijil chkom li buchʼu bole, oy spʼijil chichʼ ilelxchiʼuk li buchʼu muʼyuk kʼusi chakʼ lokʼuk ta yee oy kʼusi snabe skʼoplal chichʼ ilel.

Tsʼibetik ta yok vun

O «mi tsʼijilutik noʼoxe».
Literal «milbil matanaletik».
O «spukulal; sparte».
Jaʼ jpʼej lumal pʼin ti chunijesik-o xchiʼuk tslekubtasik-o platae.
O «totil meʼiletike».
O «yalab xnichʼnabike».
O «tukʼil».
O «bankilale».
Literal «chpix».
O «muʼyuk yichʼoj spʼijile».
Literal «muʼyuk yoʼontone».
O «Buchʼuuk noʼox ti toyol tsmeltsan li ochebal yuʼune».
Literal «muʼyuk tsta kʼusi lek».
O «lek xpoxtavan».
O «tstakijes jbakiltik».
O «ta mukul tstsak michʼob kʼabal».
O «xichʼ kʼanbel multa».
O «akʼbel nukul».
Literal «stsʼijet noʼox stalelal».