Jobe 34:1-37
34 Ka jalo, Elihu o ne a tswelela a re:
2 “Reetsang mafoko a me, lona ba ba botlhale;Ntshekegeleng tsebe, lona ba lo nang le kitso.
3 Gonne tsebe e tlhatlhoba mafokoFela jaaka loleme* lo utlwa dijo.
4 A re itshekatshekeleng se se siameng;A rona re direng tshwetso ya gore ke eng se se molemo.
5 Gonne Jobe o ne a re, ‘Ga ke na molato,+Mme Modimo ga a mpontshe tshiamiso.+
6 A nka bua maaka ka go re katlholo ya me e tla nna efe?
Ntho ya me ga e fole, le fa gone ke sa dira boleo.’+
7 Ke motho ofe yo mongwe yo o tshwanang le Jobe,Yo o nwang tshotlo jaaka e kete o nwa metsi?
8 O tlwaelane le badirabosulaE bile o tsalane le batho ba ba sa siamang.+
9 Gonne o ne a re, ‘Motho ga a solegelwe molemo ke sepeKa go leka go itumedisa Modimo.’+
10 Ka jalo, ntheetsang lona banna ba ba nang le temogo:*
Ga go kgonege gore Modimo wa boammaaruri a dire bosula,+Gore Mothatayotlhe a dire se se sa siamang!+
11 Gonne o tla duela motho go ya ka se a se dirang+E bile o tla mo tlisetsa se se mo tshwanetseng go ya ka ditsela tsa gagwe.
12 Ruri Modimo ga a dire bosula;+Mothatayotlhe ga a sokamise tshiamiso.+
13 Ke mang yo o mmeileng gore a laole lefatshe,E bile ke mang yo o mo tlhomileng gore a okamele lefatshe lotlhe?
14 Fa a tlhoma mogopolo wa gagwe* mo go bone,Fa a phuthela moya wa bone le mohemo wa bone kwa go ene,+
15 Batho* botlhe fela ba ka swa,Mme batho ba ka boela mo loroleng.+
16 Ka jalo, fa e le gore o a tlhaloganya, reetsa seno ka kelotlhoko;Tlhwaela tsebe se ke se buang.
17 A mongwe yo o tlhoileng tshiamiso o tshwanetse go laola,Kgotsa a o ka bona yo o siameng molato le fa a na le maatla?
18 A o ka raya kgosi o re, ‘Ga o na molemo wa sepe,’
Kgotsa a o ka raya batlotlegi o re, ‘Lo bosula’?+
19 Go na le Yo o sa tseyeng letlhakore la dikgosanaLe yo o sa tseeleng bahumi kwa godimo ga bahumanegi,*+Gonne botlhe ke tiro ya diatla tsa gagwe.+
20 Ba ka nna ba swa ka tshoganyetso+ mo gare ga mpa ya bosigo;+Ba roroma thata ba bo ba nyelela;Tota le ba ba maatla ba a tlosiwa, mme e se ka diatla tsa batho.+
21 Gonne matlho a Modimo a mo ditseleng tsa motho,+E bile o bona sengwe le sengwe se a se dirang.
22 Ga go na lefifi kgotsa moriti o montshoKwa badirabosula ba ka iphitlhang gone.+
23 Gonne Modimo ga a beele motho ope nako e e tlhomilwengGore a tle fa pele ga gagwe mo tshekong.
24 O robaganya ba ba maatla a sa tlhoke go batlisisaA bo a tlhoma ba bangwe mo boemong jwa bone.+
25 Gonne o itse se ba se dirang;+O ba ribegetsa go le bosigo, mme ba a gatakwa.+
26 O ba iteela bosula jwa boneMo lefelong le ba ka bonwang ke batho botlhe,+
27 Ka gonne ba tlogetse go mo sala morago+E bile ga ba tlotle ditaelo dipe tsa gagwe;+
28 Ba dira gore bahumanegi ba lelele kwa go ene,Mo a feleletsang a utlwa selelo sa ba ba sa kgoneng go itshireletsa.+
29 Fa Modimo a didimala, ke mang yo o ka mmonang molato?
Fa a fitlha sefatlhego sa gagwe, ke mang yo o ka mmonang?
A ka tswa a se fitlhela setšhaba kgotsa motho, diphelelo tsa teng di a tshwana,
30 Gore motho yo o sa dumeleng mo Modimong* a se ka a busa+Kgotsa a beela batho dirai.
31 Mme gone, a mongwe a ka raya Modimo a re,‘Ke otlhailwe, le fa gone ke sa dira phoso epe;+
32 Nthute se ke sa kgoneng go se lemoga;Fa e le gore ke dirile sengwe se se phoso, ga nkitla ke se boeletsa’?
33 A o tla go duela go ya kafa o batlang ka gone fa o gana katlholo ya gagwe?
Ke wena o tshwanetseng go dira tshwetso, e seng nna.
Ka jalo, mpolelele se o se itseng.
34 Banna ba ba nang le temogo*Le ba ba botlhale ba ba nkutlwang ba tla nthaya ba re
35 ‘Jobe o bua ka go tlhoka kitso,+Mme mafoko a gagwe ga a na temogo.’
36 A Jobe a lekwe* ka botlaloKa gonne dikarabo tsa gagwe di tshwana le tsa batho ba ba bosula!
37 O oketsa boleo jwa gagwe ka botlhanogi;+O opa diatla tsa gagwe ka tshotlo fa pele ga ronaE bile o bua mafoko a mantsi a a nyatsang Modimo wa boammaaruri!”+
Dintlha Tse di Kwa Tlase
^ Seheb., “magalapa.”
^ Seheb., “pelo.”
^ Seheb., “pelo ya gagwe.”
^ Seheb., “Nama.”
^ Kgotsa “batlotlegi kwa godimo ga ba maemo a a kwa tlase.”
^ Kgotsa “motlhanogi.”
^ Seheb., “pelo.”
^ Kgotsa gongwe “Rra, a Jobe a lekwe.”
