Jobe 19:1-29
19 Jobe o ne a araba a re:
2 “Lo tla nna lo ntshera ka lobaka lo lo kae,+Lo ntlhaba ka mafoko?+
3 Lo nkgalemetse* ka makgetlo ano a le lesome;Ga lo tlhabisiwe ditlhong ke go ntshwara makgwakgwa.+
4 Mme fa e le gore tota ke dirile phoso,Molato wa me ga o lo ame ka gope.
5 Fa lo nnela go inkgodisetsa,Lo ithaya lo re kgobo e ke lebaneng le yone e ntshwanetse,
6 Jaanong itseng gore Modimo ke ene a ntimeditseng,E bile o ntshwere ka letlowa la gagwe la go tsoma.
7 Ke nna ke goa ka gonne ke boga, mme ga go na yo o nkarabang;+Ke nna ke kopa thuso, mme ga go na yo o nthusang.+
8 Modimo o thibile tselana ya me ka lobota lwa maje, mme ga ke kgone go feta;O tswaletse ditsela tsa me ka lefifi.+
9 O nkapotse kgalalelo ya meE bile o tlositse serwalo mo tlhogong ya me.
10 O fedisa botshelo jwa me go fitlha ke nyelela;O kumola tsholofelo ya me jaaka setlhare.
11 Bogale jwa gagwe bo a ntukela,Mme o ntsaya ke le mmaba wa gagwe.+
12 Mephato ya gagwe ya masole e kopana mmogo e bo e nkokoanela,Mme e kampa go dikologa tente ya me.
13 O leleketse bomorwarre kgakala le nna,Mme ba ba nkitseng ba katogetse kgakala le nna.+
14 Ba ke atamalaneng thata le bone* ga ba tlhole ba le teng,Le ba ke ba itseng sentle ba ntebetse.+
15 Baeng ba ba mo ntlong ya me+ le malata a me ba ntsaya ke le motho o sele;Ke motswakwa mo matlhong a bone.
16 Ke bitsa motlhanka wa me, mme ga a nkarabe;Tota le fa ke mo kopa gore a ntlhomogele pelo.
17 Mosadi wa me+ o ila mohemo wa me,E bile ke sebodu mo go bomorwarre.*
18 Tota le bana ba babotlana ba a nnyatsa;Fa ke ema, ba simolola go ntshotla.
19 Ditsala tsa me tsotlhe tse ke ntshanang seinong le tsone di ntlhoile,+Le ba ke neng ke ba rata ba mphetogetse.+
20 Marapo a me a ngaparetse letlalo le nama ya me,+Mme ke batlile ke swa.*
21 Nkutlweleng botlhoko, ditsala tsa me, nkutlweleng botlhoko,Gonne seatla sa Modimo se nkgomile.+
22 Goreng lo nnela go mpogisa fela jaaka Modimo a dira,+Lo ntlhasela lo sa kgaotse?*+
23 E kete mafoko a me a ka bo a kwadilwe,E kete a ka bo a kwadilwe mo bukeng!
24 E kete a ka bo a gabilwe mo lefikeng ka bosakhutleng,Ka pene e e gabang ya tshipi le ka lloto!
25 Gonne ke itse sentle gore mogolodi* wa me+ o a tshela;O tla tla moragonyana a bo a ema mo godimo ga lefatshe.*
26 Fa letlalo la me le sena go senngwa jalo,Fa ke sa ntse ke tshela, ke tla bona Modimo,
27 Yo ke tla mo iponelang,Yo matlho a me a tla mmonang, mme e seng a motho yo mongwe.+
Mme ke imetswe mo teng!*
28 Gonne lwa re, ‘Ke ka tsela efe re mmogisang?’+
E re ka e le nna modi wa bothata.
29 Boifang tšhaka,+Gonne fa lo dira diphoso, lo tla otlhaiwa ka tšhaka;Lo tshwanetse go itse gore go na le moatlhodi.”+
Dintlha Tse di Kwa Tlase
^ Kgotsa “ntlhapaditse.”
^ Kgotsa “Ba masika a me.”
^ Seheb., “barwa ba popelo ya me,” go tewa popelo e e ntshotseng (popelo ya ga mmê).
^ Seheb., “ke falola ka letlalo la meno a me.”
^ Seheb., “Mme lo sa kgotsofadiwe ke nama ya me?”
^ Kgotsa “morekolodi.”
^ Seheb., “mo godimo ga (mo) lerole.”
^ Kgotsa “Diphilo tsa me di koafetse mo teng ga me.”
