Komaduan Awaran 35:1-27
35 Sinelebraan nen Josias ed Jerusalem so Paskua+ parad si Jehova, tan pinakgeran da so ayep ya ibabagat ed Paskua+ diad koma-14 ya agew na unonan bulan.+
2 Impasen to ray saserdote ed saray betang da tan pinaseseg to ran gawaen so kimey da a panaglingkor diad abung nen Jehova.+
3 Insan inkuan tod saray Levita, saray managbangat ed interon Israel,+ saramay masanto ed si Jehova: “Iyan yo so masanton Kaban diad abung ya impaalagey nen Solomon ya anak nen David ya ari na Israel;+ agyo la ’tan kaukolan a sakbaten.+ Natan et manlingkor kayo ed si Jehova a Dios yo tan ed Israel a totoo to.
4 Tan iparaan yoy inkasikayo unong ed saray pamilya na kaamaan yo, unong ed saray grupo yo, a tumbok yoy insulat nen Arin David+ na Israel tan nen Solomon ya anak to.+
5 Alagey kayo diad masanton pasen ya agrupo-grupo kayo unong ed saray pamilya na saray agagi yo, salanti, saray arum a totoo,* ya inapag-apag met unong ed grupo na saray pamilya na saray Levita.
6 Pakgeran yo so ayep ya ibabagat ed Paskua+ tan pasantos yoy inkasikayo tan manparaan kayo parad saray agagi yo pian nasumpal yo so sinalita nen Jehova ed panamegley nen Moises.”
7 Et angiter si Josias ed saray totoo na pulok, saray kalakian a kordero tan kilaw a kanding, a 30,000 ya amin, pian ibagat ed Paskua parad amin a wadman, tan angiter met na 3,000 baka. Nanlapu iraya ed kaykayarian na ari.+
8 Angiter met iray prinsipe to na boluntaryon apay parad saray totoo, saray saserdote, tan saray Levita. Saray manangidaulo ed abung na tuan Dios a si Hilkias,+ Zacarias, tan Jehiel et angiter ed saray saserdote na 2,600 ya ayayep ya ibabagat ed Paskua tan 300 a baka.
9 Saray papangulo na Levita a si Conanias, saray agagi ton si Semaias tan Netanel, si Hasabias, Jeiel, tan Jozabad et angiter met ed saray Levita na 5,000 ayayep ya ibabagat ed Paskua tan 500 a baka.
10 Et imparaan so panlingkor, tan inmalagey iray saserdote diad saray pasen da tan saray Levita diad grupo ra,+ unong ya ingganggan na ari.
11 Pinakgeran da ray ayep ya ibabagat ed Paskua,+ tan inwalsik na saray saserdote so dala ya inawat dad sikara,+ legan a kakatatan na saray Levita iray ayep.+
12 Kayari na satan, imparaan da ray apay a popoolan pian nibunog iratan ed saray arum nin totoo ya agrupo-grupo unong ed pamilya na kaamaan da, pian niyapay iraya ed si Jehova unong a nisulat ed libro nen Moises; ontan met so ginawa rad saray baka.
13 Inluto* dad apoy so apay parad Paskua unong ed niyugali ra;+ tan saray apay a popoolan et inluto dad saray banga, kaldero, tan kawali, insan da inawit a tampol ed amin a totoo.
14 Tan angiparaan ira parad sarili da tan parad saray saserdote, lapud saray saserdote a kailalakan nen Aaron so mangiyaapay na saray bagat a popoolan tan saray taba ya anggad labi, kanian saray Levita so mangipaparaan parad sarili da tan parad saray saserdote a kailalakan nen Aaron.
15 Tan saray managkansion ya ananak nen Asaf+ et wala rad pasen da unong ed ganggan nen David,+ Asaf,+ Heman, tan Jedutun+ a mangipapasabi na pasingawey ed ari; tan saray bantay na puerta et walad nanduruman puerta.+ Agda la kaukolan a taynan so kimey da, lapud ipaparaanan ira na saray agagi ran Levita.
16 Kanian diad saman ya agew et niparaan so amin a kakaukolanen nen Jehova pian naselebraan so Paskua+ tan niyapay iray apay a popoolan diad altar nen Jehova, unong ed ganggan nen Arin Josias.+
17 Diad saman et sinelebraan na saray Israelitan wadman so Paskua tan say Piesta na Andi-lebaduran Tinapay diad loob na pitoy agew.+
18 Et anggapo ni onian impanselebray Paskua diad Israel manlapud saray agew nen propetan Samuel; tan anggapo met ni siopaman ya ari na Israel a nanselebray Paskua a singa ed impanselebra nen Josias,+ saray saserdote, saray Levita, say interon Juda tan Israel a wadman, tan saray manaayam ed Jerusalem.
19 Sayan Paskua et sinelebraan diad koma-18 taon na uley nen Josias.
20 Kayari na satan, sanen niparaan la nen Josias so templo,* si Arin Neco+ na Ehipto et linma pian milaban diad Carkemis ya abay na Eufrates. Et linmay Josias pian milaban ed sikato.+
21 Kanian sikatoy angibaki na saray mensahero tan impaibaga to: “Antoy pibabalim ed saya, O ari na Juda? Agak dia linma pian milaban ed sika, noagta sananey a nasyon so pilabanan ko, tan imbaga na Dios ya apuraen ko. Parad pankaabigan mo, agmo la susumlangen so Dios, ta sikatoy walad siak, no andi et iyakar to kad kadederal.”
22 Balet ag-inmalis si Josias, noag ingen agnampabidbir+ pian milaban ed sikato tan agto dinengel iray salita nen Neco a nanlapud sangi na Dios. Kanian sikatoy akilaban diad Patar na Megido.+
23 Et nakna na saray managpana si Arin Josias, tan inkuan tod saray lingkor to: “Ipaway yo ak dia, ta grabe sugat ko.”
24 Kanian sikatoy inyepas na saray lingkor to ed karwahe tan inlugan da ed onkokomaduan karwahe ton parad guerra tan inyakar dad Jerusalem. Et sikatoy inatey tan imponpon da diad lubok na saray inmuunan atateng to,+ tan say interon Juda tan Jerusalem et nanermenan day Josias.
25 Tan kinansionan nen Jeremias+ si Josias, tan amin a lalaki tan bibiin managkansion+ et naynay dan bibitlaen si Josias diad saray kansion da a tagleey* anggad natan; tan denesidi a kansionen iratan ed Israel, tan nisulat iratan ed libro na saray kansion a tagleey.
26 Tan saray arum nin agawa ed si Josias tan saray impatnag ton matoor a panangaro, unong ya akasulat ed Ganggan nen Jehova,
27 tan saray ginawa to, manlapud gapo ya anggad sampot, et akasulat ed Libro na Saray Arari na Israel tan Juda.+
Paimanod leksab
^ Literal, “saray ananak a lalaki na totoo.”
^ Odino posiblin, “Inkalot.”
^ Literal, “abung.”
^ Odino “saray kansion parad paneermen.”
