Komaduan Awaran 32:1-33

  • Tinaktakot nen Senakerib so Juda (1-8)

  • Ininsulto nen Senakerib si Jehova (9-19)

  • Kinabil na anghel so armada na Asirya (20-23)

  • Impansakit nen Hezekias tan say impanpaatagey to (24-26)

  • Saray agawaan nen Hezekias tan say impatey to (27-33)

32  Kayari na sarayan bengatla tan sarayan panangipatnag na inkamatoor,+ sinmabi si Arin Senakerib na Asirya tan inataki toy Juda. Kinubkob to ray apadiran a syudad, a nononoten ton bungawen iray padir tan sakopen iratan.+  Sanen anengneng nen Hezekias a sinmabi si Senakerib tan labay toy miguerra ed Jerusalem,  kinatongtong to ray prinsipe to tan saray sundalo to, insan denesidi ton saraan iray subol a walad paway na syudad,+ tan sikatoy sinuportaan da.  Et nantitipon so dakdakel a totoo, tan sinasaraan da so amin a subol tan say kulos ya onaagus diad dalin da, a kuan da: “Agtayo labay a dakdakel a danum so naromog na saray arari na Asirya kasabi ra dia.”  Ontan met, sikatoy makpel ya angipaalagey lamet ed interon nagba a padir tan angipaalagey ditan na saray tori, tan nanggawa na sananey nin padir diad paway. Inapiger to met so Pukdol*+ na Syudad nen David, tan nanggawa na dakdakel ya armas tan panagsamper.  Insan sikatoy anuro na saray pangulo na armada a mangidaulo ed saray totoo tan tinipon to rad plaza ya asingger ed puerta na syudad tan pinaseseg to ra,* a kuan to:  “Manpakpel tan manpabiskeg kayo. Agkayo natatakot odino nakekebbiew nisengeg ed ari na Asirya+ tan ed amayamay a kaiba to, ta mas dakel ni kaiba tayo nen say kaiba to.+  Say walad sikato et taklay na too,* balet say walad sikatayo et si Jehova a Dios tayo ya ontulong ed sikatayo tan milaban ed saray guerra tayo.”+ Et apabiskeg iray totoo ed saray salita nen Arin Hezekias na Juda.+  Kayari na saya, legan a walad Lakis si Arin Senakerib na Asirya+ tan say interon pakayari na empiryo to,* imbaki tod Jerusalem iray lingkor to diad kinen Arin Hezekias na Juda tan ed amin a Judeano a walad Jerusalem,+ a kuan da: 10  “Oniay inkuan nen Arin Senakerib na Asirya, ‘Antoy panmamatalekan yo, a wala kayo nid Jerusalem anta akubkob la?+ 11  Agta papalikdoen kayo labat nen Hezekias tan iyaawat to kayo pian ompatey kayod eras tan inkapgaan, a kuan to: “Iliktar itayo nen Jehova a Dios tayo ed lima na ari na Asirya”?+ 12  Agta saya may Hezekias ya angekal ed saray atagey a pasen tan altar na Dios yo,*+ insan inkuan tod Juda tan Jerusalem: “Nepeg kayon ondakmomo ed arap na sakey ya altar tan ditan kayo manpaasewek na saray bagat yo”?+ 13  Agyo ta amta no antoy ginawak tan saray inmuunan atateng ko ed amin a totoo ed arum a dalin?+ Kasin saray dirios na saray nasyon ed arum a dalin et ayarian dan inliktar so dalin da ed limak?+ 14  Siopa ed saray dirios na sarayan nasyon ya inggana ed kadederal na inmuunan atateng ko so akapangiliktar ed totoo to ed limak, diad ontan et sarag kayo met ya iliktar na Dios yo ed limak?+ 15  Natan, agyo aabuloyan si Hezekias a palikdoen odino palingoen to kayon singa onia!+ Agyo papanisiaan, ta anggapo so dios na dinanman a nasyon odino panarian ya akapangiliktar na totoo to ed limak tan ed lima na inmuunan atateng ko. No ontan, nagkalalo lan agkayo niliktar na Dios yo ed limak!’”+ 16  Et lalo nin pinauges na saray lingkor nen Senakerib si Jehova a tuan Dios tan si Hezekias a lingkor to. 17  Nanggawa met na saray sulat+ pian insultoen si Jehova a Dios na Israel+ tan paugesen to, a kuan to: “No panon a saray dirios na saray nasyon ed arum a dalin et agda niliktar so totoo ra ed limak,+ agmet niliktar na Dios nen Hezekias so totoo to ed limak.” 18  Diad lenguahe na saray Judio et onkekelyaw ira ed saray totoo na Jerusalem a walad tapew na padir, pian taktakoten tan kebbiewen da ra, diad ontan et nasakop day syudad.+ 19  Tan pinauges da so Dios na Jerusalem a singa ed saray dirios na totoo ed dalin, a ginawa na saray lima na too. 20  Balet si Arin Hezekias tan si propetan Isaias+ ya anak nen Amoz et nantultuloy ya angipikasi ed saya tan kinmerew ira na tulong ed tawen.+ 21  Et angibaki si Jehova na anghel tan inupot ton amin iray mabibiskeg a sundalo,+ lider, tan papangulo diad kampo na ari na Asirya, kanian pinmawil so ari ed dalin to ya abaibaingan. Ag-abayag et sikatoy linmoob ed abung* na dios to tan diman et sikatoy pinatey na arum ed saray dilin ananak to diad panamegley na espada.+ 22  Kanian inliktar nen Jehova si Hezekias tan saray manaayam ed Jerusalem ed lima nen Arin Senakerib na Asirya tan ed lima na arum tan impanpainawa to ra manlapud amin ya akapaliber a kalaban da. 23  Tan dakdakel so angawit na regalo ed si Jehova diad Jerusalem tan saray sankaabigan iran bengatla ed si Arin Hezekias na Juda,+ tan kayari na satan et sikatoy nirespeton maong na amin a nasyon. 24  Diad saraman ya agew, si Hezekias et nansakit tan ngalngali la ompatey, tan sikatoy nampikasi ed si Jehova,+ ya inmebat ed sikato tan angiter na sakey a tanda.+ 25  Ingen ta ag-inapresya nen Hezekias so kamaongan a ginawad sikato, ta say puso to et nagmaliw a mapaatagey, kanian say Dios et sinmanok ed sikato tan ed Juda tan Jerusalem. 26  Anggaman ontan, nampaabeba si Hezekias ta nagmaliw lan mapaatagey so puso to,+ ontan met iray manaayam ed Jerusalem, kanian agla sinmanok si Jehova ed sikara legan na saray agew nen Hezekias.+ 27  Et awalaan si Hezekias na baleg a kayamanan tan gloria;+ tan angipaalagey na saray abung a pananginan to+ na saray pilak, balitok, mablin bato, larak a balsamo, panagsamper, tan amin a mararakep a kagawaan. 28  Sikatoy angipaalagey met na saray pasen a panagtiponay naaanin ilik, balon alak, tan larak, tan nanggawa na saray kuwadra na nanduruman klase na kokomponien ya ayayep tan saray pukokan na saray pulok. 29  Tan sikatoy awalaan met na saray sarili ton syudad, tan dakdakel a kokomponien ya ayayep, pulok, tan baka, ta sikatoy inikdan na Dios na amayamay a kaykayarian. 30  Si Hezekias so angisara na samay bandad tagey a papawayan na saray danum+ na Gihon+ tan impaarap to iratan a paleksab ed sagur a paonlad Syudad nen David,+ tan tinmalona si Hezekias ed amin a kimey to. 31  Balet sanen imbakid sikato iray pinagkasangiyan na saray prinsipe na Babilonia pian mantepet nipaakar ed tanda+ ya agawad dalin,+ sikatoy pinaulyan na tuan Dios pian sikatoy nasubok,+ ta pian naamtaan so amin a walad puso to.+ 32  Tan saray arum nin agawa ed si Hezekias tan saray impatnag ton matoor a panangaro+ et nilaktip diad akasulat a pasingawey nen propetan Isaias+ ya anak nen Amoz diad Libro na Saray Arari na Juda tan Israel.+ 33  Tan si Hezekias et nampainawa la a kaiba na saray inmuunan atateng to, tan sikatoy imponpon da diad patatdang a pasen a paonlad saray ponponan na saray ananak nen David;+ tan diad impatey to et sikatoy pinagalangan na interon Juda tan saray manaayam ed Jerusalem. Tan si Manases ya anak to so nagmaliw ya ari a kasalat to.

Paimanod leksab

Odino “Milo.” Hebreon salita a mankabaliksay “tambak.”
Literal, “akitongtong ed puso ra.”
Odino “et biskeg na too.”
Odino “interon pakayari tan karakpan na armada to.”
Literal, “saray atagey a pasen to tan saray altar to.”
Odino “templo.”