Jeremaea 41:1-18
41 Long namba 7 manis, Ismael+ we i boe blong Netania mo i smol bubu blong Elisama, we i kamaot long laen blong king* mo i wan long ol impoten man blong king, hem i kam wetem ten narafala man blong luk Gedalia we i boe blong Ahikam long Mispa.+ Taem oli sidaon tugeta oli stap kakae long Mispa,
2 Ismael we i boe blong Netania mo ol ten man ya we oli stap wetem hem, oli girap mo oli kilim i ded Gedalia we i boe blong Ahikam mo i smol bubu blong Safan, long naef blong faet. Yes, hem i kilim i ded man ya we king blong Babilon i bin putumap hem blong i lukaot long kantri ya.
3 Mo tu, Ismael i kilim i ded olgeta man Jiu we oli stap wetem Gedalia long Mispa, wetem ol soldia blong ol man Koldia tu we oli stap long ples ya.
4 Long seken dei afta we oli kilim Gedalia i ded, mo bifo we eni man i save samting ya,
5 i gat 80 man oli kam, oli kamaot long Sekem,+ long Silo,+ mo long Sameria.+ Oli sevemaot mustas blong olgeta, oli terem ol klos blong olgeta, oli katkatem bodi blong olgeta,+ mo oli karem ol sid ofring mo ol frangkinsens+ long han blong olgeta blong karem i go long haos blong Jehova.
6 Ale Ismael boe blong Netania i aot long Mispa blong i go mitim olgeta. Hem i stap krae taem hem i stap wokbaot i go. Taem hem i kasem olgeta, hem i talem long olgeta se: “Yufala i kam luk Gedalia boe blong Ahikam.”
7 Be taem oli kam insaed long taon, Ismael boe blong Netania mo ol man blong hem, oli kilim olgeta mo oli sakem olgeta i go insaed long hol blong wota.
8 Be i gat ten man long olgeta we oli talem long Ismael se: “Yu no kilim mifala i ded, from mifala i gat ol wit, bale, oel, mo hani we mifala i haedem olgeta long garen.” Taswe hem i no moa kilim olgeta oli ded wetem ol brata blong olgeta.
9 Nao Ismael i sakem olgeta dedbodi blong ol man ya we hem i kilim olgeta, i go insaed long wan bigfala hol blong wota, hemia hol blong wota we King Asa i mekem from King Bahasa blong Isrel.+ Hol blong wota ya nao, Ismael boe blong Netania i fulumap dedbodi blong ol man ya long hem.
10 Ismael i tekem olgeta narafala man we oli stap yet long Mispa+ oli go kalabus. Olgeta wetem ol dota blong king mo olgeta man we oli stap yet long Mispa, we Nebusaradan lida blong ol gad i putum olgeta i stap aninit long Gedalia+ boe blong Ahikam. Ismael boe blong Netania i tekem olgeta ya oli go kalabus, mo oli aot i go, blong oli gokros i go long ol man Amon.+
11 Taem Johanan+ boe blong Karea mo olgeta lida blong ol ami we oli stap wetem hem, oli harem nius blong ol nogud samting ya we Ismael boe blong Netania i bin mekem,
12 oli tekem olgeta man mo oli aot i go blong faet agensem Ismael boe blong Netania, mo oli faenem hem klosap long bigfala wota* long Gibeon.
13 Olgeta man we oli stap wetem Ismael, oli glad taem oli luk Johanan boe blong Karea mo olgeta lida blong ol ami we oli stap wetem hem.
14 Ale olgeta man ya we Ismael i tekem olgeta long Mispa+ oli go kalabus, oli tanemraon oli gobak wetem Johanan boe blong Karea.
15 Be Ismael boe blong Netania mo eit long ol man blong hem, oli ronwe long Johanan mo oli go long ol man Amon.
16 Johanan boe blong Karea mo olgeta lida blong ol ami we oli stap wetem hem, oli tekem olgeta we oli stap yet long Mispa, hemia olgeta we oli bin tekemaot olgeta long Ismael boe blong Netania afta we hem i kilim i ded Gedalia+ boe blong Ahikam, oli go wetem olgeta. Oli tekem ol man, ol soldia, ol woman, ol pikinini, mo ol haeman ya long Gibeon i gobak.
17 Ale oli go mo oli stap long haos blong Kimam we i stap narasaed long Betlehem,+ from oli plan blong go kasem Ijip+
18 from ol man Koldia. Oli fraet long olgeta from we Ismael boe blong Netania i kilim i ded Gedalia boe blong Ahikam, we king blong Babilon i bin putumap hem blong i lukaot long kantri ya.+
