Jeremaea 14:1-22

  • Draetaem, hadtaem blong kasem kakae, mo naef blong faet (1-12)

  • Agensem ol giaman profet (13-18)

  • Jeremaea i talemaot ol sin blong ol man (19-22)

14  Hemia tok we Jeremaea i kasem long Jehova we i tokbaot draetaem,+ i se:   Juda i stap krae,+ mo ol get blong hem sloslo oli stap roten. Oli foldaon long graon, oli harem nogud tumas,Mo noes blong krae i stap kamaot long Jerusalem.   Mo ol masta blong olgeta oli sanem ol man blong wok blong olgeta* from wota. Oli go long ol hol blong wota,* be oli no faenem wota. Oli gobak we ol botel blong olgeta oli emti nomo. Oli sem mo oli harem nogud tumas,Mo oli kavremap hed blong olgeta.   From we graon i brobrok,From i no gat ren long kantri ya,+Ol fama oli harem nogud mo oli kavremap hed blong olgeta.   Ol woman dia long open ples tu oli lego ol pikinini blong olgeta we oli jes bonFrom we i no gat gras.   Ol wael dongki oli stap stanap long ol hil we i no gat samting long hem. Oli traehad blong pulum win olsem ol wael dog ya jakol,Ae blong olgeta i kam nogud from we i no moa gat gras.+   O Jehova, nating se ol mastik blong mifala nomo oli soemaot se mifala i rong,Be i gud yu tekem aksen from nem blong yu.+ From ol fasin we mifala i mekem blong lego yu oli plante,+Mo mifala i mekem sin agensem yu.   Yu yu hop blong Isrel, yu Sevia blong hem+ long taem blong trabol,?From wanem yu olsem wan strenja nomo long kantri ya,Mo yu olsem wan man blong travel we i kam stap long naet nomo, biaen i go?   ?From wanem yu yu olsem wan man we i sapraes tumas,Olsem wan strong man we i no save sevem man?From yu O Jehova, yu stap long medel blong mifala,+Mo ol man oli stap singaotem mifala long nem blong yu.+ Yu no lego mifala. 10  Hemia samting we Jehova i talem blong tokbaot ol man ya, i se: “Oli laekem blong wokbaot olbaot,+ oli no blokem leg blong olgeta.+ Taswe Jehova i no glad long olgeta nating.+ Naoia bambae hem i tingbaot mastik blong olgeta bakegen mo i jajem olgeta from ol sin blong olgeta.”+ 11  Biaen Jehova i talem long mi se: “Yu no mas prea blong ol man ya oli kasem wan gud samting.+ 12  Taem oli mekem fasting, mi mi no lesin long krae blong olgeta,+ mo taem oli givim ol ofring we oli bon fulwan mo ol sid ofring, mi mi no glad nating long olgeta,+ from bambae mi yusum naef blong faet, hadtaem blong kasem kakae mo strong sik blong finisim olgeta.”+ 13  Afta long tok ya, mi talem se: “!O no, Hae Masta Jehova! Naoia ol profet oli stap talem long olgeta se: ‘Bambae yufala i no luk naef blong faet, mo hadtaem blong kasem kakae bambae i no kasem yufala, be bambae mi mi givim tru pis long yufala long ples ya.’”+ 14  Nao Jehova i talem long mi se: “Ol profet oli stap yusum nem blong mi blong talem ol giaman profet tok.+ Mi mi no bin sanem olgeta, mi no givim oda long olgeta, mo mi no toktok long olgeta.+ Oli stap talemaot long yufala ol giaman vison mo ol samting blong fiuja we oli nating nomo mo ol giaman samting ya nomo we i stap long hat blong olgeta.+ 15  Taswe, hemia samting we Jehova i talem blong tokbaot ol profet ya we oli stap yusum nem blong mi blong talem ol profet tok, nating se mi no bin sanem olgeta, mo we oli talem se bambae i no gat naef blong faet no hadtaem blong kasem kakae i kamtru long kantri ya, i se: ‘Ol profet ya bambae oli ded long naef blong faet mo long hadtaem blong kasem kakae.+ 16  Mo ol man we oli stap talemaot ol profet tok ya long olgeta, bambae hadtaem blong kasem kakae mo naef blong faet bambae i mekem se oli sakem bodi blong olgeta i go long ol rod blong Jerusalem, mo i no gat man blong berem olgeta,+ hemia olgeta, ol waef blong olgeta, ol boe blong olgeta, mo ol dota blong olgeta, from bambae mi mekem trabol long olgeta, we i stret nomo blong oli kasem.’+ 17  “Yu mas talem tok ya long olgeta se:‘I gud wota blong ae blong mi i ron bigwan long dei mo long naet, i gud i no stop,+From dota blong ol man blong mi we i no save man yet, ol man oli smasem gud hem mo hem i brobrok finis,+Hem i kasem wan bigfala kil. 18  !Sipos mi go long open ples mo mi lukluk,Mi luk olgeta we oli ded long naef blong faet!+!Mo sipos mi kam insaed long taon,Mi luk ol sik we i kamaot from hadtaem blong kasem kakae!+From ol profet mo ol pris oli stap go wokbaot olbaot long wan kantri we oli no save.’”+ 19  ?Yu yu tanem baksaed fulwan long Juda, o yu* no moa laekem Saeon?+?From wanem yu kilim nogud mifala, nao mifala i no moa save kam gud bakegen?+!Oli stap wet blong i gat pis, be i no gat wan gudfala samting i kamaot!!Oli stap wet long wan taem we evri samting bambae i kam gud, be fraet nomo i stap!+ 20  O Jehova, mifala i talemaot ol rabis fasin blong mifala,Mo ol mastik blong ol olfala blong mifala,From mifala i mekem sin agensem yu.+ 21  From nem blong yu, plis yu no tanem baksaed long mifala,+Yu no lukluk nogud long gudfala tron* blong yu. I gud yu tingbaot kontrak we yu mekem wetem mifala mo yu no brekem.+ 22  ?Ol aedol blong ol nesen we oli nating nomo, oli save givim ren??No heven hem wan, i save sanem ren i folfoldaon i kamdaon?!Nogat! Yu nomo, O Jehova God blong mifala.+ Mo mifala i putum hop blong mifala long yu,From yu nomo yu mekem olgeta samting ya.

Ol futnot

NT: “sanem ol smol wan blong olgeta.”
NT: “go long ol rod blong wota; ol wel.”
NT: “sol blong yu i.”
NT: “jea blong king.”