Jeremaea 37:1-21
37 Mo King Jedekia+ boe blong Josaea i stat blong rul long ples blong Konia*+ boe blong Jehoeakim, from King Nebukadnesa* blong Babilon i mekem hem i kam king long kantri ya Juda.+
2 Be hem mo ol man blong wok blong hem, mo ol man blong kantri ya oli no lesin long ol tok ya blong Jehova we profet ya Jeremaea i bin talemaot.
3 Mo King Jedekia i sanem Jehukal+ boe blong Selemia mo Sefanaea+ boe blong pris ya Mahasea, i go long profet ya Jeremaea, blong talem long hem se: “Plis yu prea long Jehova God blong yumi, long bihaf blong yumi.”
4 Jeremaea i fri, i stap wokbaot wetem ol man, from oli no putum hem long prisen yet.+
5 Long taem ya, ol ami blong Fero oli aot long Ijip finis,+ mo ol ami blong ol man Koldia we oli stap hivap raon long Jerusalem, oli harem nius blong olgeta. Ale oli lego Jerusalem oli no moa faet agensem.+
6 Biaen tok blong Jehova i kamtru long profet ya Jeremaea se:
7 “Hemia samting we Jehova God blong Isrel i talem, i se: ‘Hemia samting we yufala i mas talem long king blong Juda we i sanem yufala i kam long mi blong faenemaot tingting blong mi: “!Yu luk! Ol ami blong Fero we oli stap kam blong givhan long yu, bambae oli mas gobak long kantri blong olgeta, Ijip.+
8 Mo ol man Koldia bambae oli kambak, mo oli faet agensem taon ya mo oli holem mo oli bonem long faea.”+
9 Hemia samting we Jehova i talem, i se: “Yufala i no mas giaman long yufala* bakegen se: ‘I sua se ol man Koldia bambae oli gowe, oli no faet agensem yumi,’ from we bambae oli no gowe.
10 Nating sipos yufala i kilim evri ami blong ol man Koldia we oli stap faet agensem yufala, mo ol man blong olgeta we oli gat kil nomo oli stap yet, be bambae oli mas girap oli aot long ol tent blong olgeta, mo oli kam bonem taon ya long faea.”’”+
11 Taem ol ami blong ol man Koldia oli lego Jerusalem oli no moa faet agensem, from we ol ami blong Fero oli stap kam,+
12 Jeremaea i aot long Jerusalem i go long graon blong Benjamin,+ blong i kasem olting blong hem longwe we i stap wetem ol man blong hem.
13 Be taem hem i kasem Get Blong Benjamin, man we i stap lukaot long gad, we nem blong hem Iraejah we i boe blong Selemia boe blong Hanania, i holem profet ya Jeremaea mo i se: “!Yu yu stap ronwe i go long ol man Koldia!”
14 Be Jeremaea i talem se: “!I no tru! Mi mi no stap ronwe i go long ol man Koldia.” Be hem i no lesin long hem. Ale, Iraejah i arestem Jeremaea mo i tekem hem i go long ol prins.
15 Ol prins oli kros tumas long Jeremaea,+ mo oli wipim hem mo oli putum hem long prisen,*+ long haos blong Jehonatan we i sekretari, we oli mekem i kam prisen.
16 Oli putum Jeremaea insaed long prisen aninit long graon,* long ol rum ya we oli sat gud, mo hem i stap long ples ya plante dei.
17 Biaen King Jedekia i sanem toktok from hem i kam, mo king i askem kwestin long hem haed nomo, insaed long haos* blong hem.+ Hem i askem se: “?I gat eni toktok we i kam long Jehova?” Jeremaea i se: “!Yes, i gat!” mo hem i gohed se: “!Bambae oli putum yu long han blong king blong Babilon!”+
18 Jeremaea i talem tu long King Jedekia se: “?Mi mi mekem sin agensem yu mo ol man blong wok blong yu mo ol man ya olsem wanem, mekem se yufala i putum mi long prisen?
19 Nao, ?wehem ol profet blong yufala we oli stap talem profet tok long yufala se: ‘King blong Babilon bambae i no kam agensem yufala mo agensem kantri ya’?+
20 O king, masta blong mi, plis yu lesin. Plis, i gud yu letem mi mi kasem samting we mi askem, yu kaen long mi. Yu no sanem mi mi gobak long haos blong Jehonatan+ we i sekretari, sipos no bambae mi ded longwe.”+
21 Ale, King Jedekia i givim oda blong oli putum Jeremaea i stap kalabus nomo long Yad Blong Ol Gad,+ mo oli stap givim ol raon lof blong bred long hem evri dei, we oli kam long rod blong ol man blong kukum bred,+ gogo kasem we ol bred long taon i finis.+ Mo Jeremaea i stap nomo long Yad Blong Ol Gad.
Ol futnot
^ Narafala nem blong hem Jehoeakin mo Jekonia
^ PT: “Nebukadresa,” narafala rod blong spelem.
^ NT: “sol blong yufala.”
^ PT: “oli putum hem insaed long haos blong ol hankaf.”
^ PT: “long haos blong wel.”
^ NT: “pales.”
