Yesu abombele akasuba konse. Pa numa ya kwenda no bwato ukufuma ku citungu ca Dekapoli, aundepe umwanakashi uwalefuma umulopa kabili abuushishe umwana mwanakashi uwa kwa Yairo. Lelo pali ubu bushiku kwali na fimbi ifyo acitile. Ilyo Yesu alefuma pa ng’anda ya kwa Yairo, abaume babili impofu balimukonkele. Balebilikisha abati: “Tubelele uluse, Mwana Davidi.”—Mateo 9:27.

Ifi aba baume baitile Yesu ukuti “Mwana Davidi,” calangile ukuti balicetekele ukutila Yesu e wali no kupyana icipuna ca bufumu ica kwa Davidi, kabili e Mesia. Yesu acitile kwati taleumfwa, nalimo pa kuti amone nga ca kuti balatwalilila ukupaapaata. Na cine balitwalilile. Ilyo Yesu aingile mu ng’anda, aba abaume babili balimukonkele. Yesu abepwishe ati: “Bushe namutetekela ukuti ndi na maka ya kucita ici?” Bamwaswike abati: “Ee, mwe Shikulu.” Awe Yesu abakumishe pa menso no kubeba ukuti: “Nacibe ifyo fine mwe bene mutetekele.”—Mateo 9:28, 29.

Ilyo line fye balitendeke ukumona! Nga filya fine ale-eba bamo abo aleundapa, aba nabo abebele ukuti be-ebako bambi. Lelo balitemenwe sana ica kuti balyebeleko abantu abengi, kumo na baleikala ukutali.

Ilyo aba abaume babili bafuminepo, abantu baletele umwaume uwali cibulu pa mulandu wa kuti ali ne cibanda. Yesu alimufumishe icibanda kabili ilyo line fye alitendeke ukulanda. Abantu balipapile sana. Batile: “Tatwatala atumona ica musango yu mu Israele.” AbaFarise nabo e po bali. Tabatwishike ifipesha amano ifyo Yesu acitile pantu bali-imwenene abene. E ico babwekeshepo ukusosa abati: “Afumisha ifibanda ku maka ya kwa kateka wa fibanda.”—Mateo 9:33, 34.

Papitile fye inshita iinono, Yesu abwelela na ku mwabo ku Nasarete pamo na basambi bakwe. Ici cacitike ninshi palipita nalimo umwaka umo ukutula apo Yesu asambilishishe abantu mwi sunagoge kulya. Abantu pa kutendeka balitemenwe sana ifyo alandile, lelo pa numa balifulilwe pa fyo abasambilishe kabili bafwaile no kumwipaya. Yesu alyeseshe ukusambilisha abena Nasarete na kabili.

Pe Sabata, Yesu alibweleele mwi sunagoge mu kusambilisha. Abengi balipapile, baleipusha no kuti: “Bushe uyu muntu afumishe kwi aya mano ne fipesha amano ifi? Bushe uyu te mwana wa kwa kabasa? Bushe nyina te ulya batila Maria, na bamunyina te Yakobo na Yosefe na Simone na Yuda? Na bankashi yakwe, bushe tatwaba na bo bonse? Ni kwi kanshi uyu muntu afumishe fyonse ifi?”—Mateo 13:54-56.

Abantu balemona kwati Yesu ali muntu fye. Baleti: ‘Twalimumwene uko alekula, kuti aba shani Mesia?’ Nangu ca kuti balimwene amano, ne fipesha amano ifyo Yesu alecita, ifyalelanga ukuti ni Mesia, balimukeene. Apo balekula na Yesu, nangu fye ni balupwa wakwe tabamutetekele, ne ci calengele abebe ati: “Kasesema balamucindika kumbi, kano fye ku citungu ca ku mwabo na mu ng’anda mu mwakwe.”—Mateo 13:57.

Kanshi Yesu alipapile ilyo bakeene ukumutetekela. E ico tacitileko ifipesha amano kulya “lelo abikile fye iminwe yakwe pa bantu abanono abalwele no kubondapa.”—Marko 6:5, 6.