YOHANE 2:23–3:21

  • YESU ALANSHANYA NA NIKODEMO

  • UMO “UKUFYALWA LIBILI” KWALOLA

Ilyo ali ku Yerusalemu ku Ca Kucilila mu 30 C.E., Yesu alicitile ifipesha amano. Ici calengele abantu abengi ukumutetekela. Ifipesha amano ifyo Yesu alecita fyalipapwishe Nikodemo, umuFarise uwali mu cilye cikalamba ica baYuda, ica Sanhedrini. Apo Nikodemo alefwaya ukwishibilapo na fimbi, atandalile Yesu ninshi napafiita. Ico ailiile ubushiku ni co nalimo aletiina ukuti intungulushi shinankwe isha baYuda nga shamumona shalamusuula.

Nikodemo aebele Yesu ati: “Rabi, twalishiba ukuti ni mwe kasambilisha uwafuma kuli Lesa; pantu takuli umuntu uwingacita ifipesha amano ifyo mucita kano Lesa ali nankwe.” Yesu aebele Nikodemo ukuti umuntu te kuti engile mu Bufumu bwa kwa Lesa nga “tafyelwe libili.”—Yohane 3:2, 3.

Lelo, bushe umuntu kuti afyalwa shani libili? Nikodemo aipwishe Yesu ati: “Bushe kuti aingila mwi fumo lya kwa nyina na kabili, no kufyalwa?”—Yohane 3:4.

Ifi te fyo cipilibula ukufyalwa libili. Yesu aebele Nikodemo ukuti: “Umuntu nga tafyelwe ku menshi na ku mupashi, te kuti engile mu Bufumu bwa kwa Lesa.” (Yohane 3:5) Ilyo Yesu abatishiwe, umupashi wa mushilo waikile pali ena, kabili ilyo ico cacitike, e lyo afyelwe “ku menshi na ku mupashi.” Pali iyi inshita, ishiwi lyafumine mu muulu no kutila: “Uyu e Mwana wandi, uwatemwikwa, uo nsekelamo.” (Mateo 3:16, 17) Aya mashiwi yalangile ukuti Yesu nomba ali mwana wa kwa Lesa uwasubwa no mupashi no kuti akengila mu Bufumu bwa mu muulu. Lyena pa Pentekoste ya mu 33 C.E., umupashi wa mushilo walipongolwelwe pa basambi bambi ababatishiwe, e ico nabo bene balisubilwe no mupashi kabili baishileba abana ba kwa Lesa.—Imilimo 2:1-4.

Nikodemo alifililwe ukumfwa ifyo Yesu alemusambilisha pa Bufumu. E ico Yesu aebele Nikodemo ifyo Lesa amutumine ukwisacita pano calo ngo Mwana wakwe umuntunse. Yesu atile: “Filya Mose aimishe insoka mu matololo, e fyo no Mwana wa muntu bakamwimya, pa kuti onse uumutetekela akabe no mweo uwa muyayaya.”—Yohane 3:14, 15.

Kale, abena Israele abasuminwe ku nsoka sha busungu balelolesha ku nsoka ya mukuba pa kuti bapusuke. (Impendwa 21:9) Kanshi abantu bonse balingile ukucetekela Umwana wa kwa Lesa pa kuti bakakwate umweo wa muyayaya. Lyena Yesu aebele Nikodemo pa fyo Yehova acitile pa kutulanga ukuti alitutemwa. Atile: “Lesa atemenwe nga nshi aba pano calo ica kuti apeele Umwana wakwe uwafyalwa eka, ukuti onse uumutetekela ekonaika lelo akabe no mweo wa muyayaya.” (Yohane 3:16) Kanshi ilyo papitile imyeshi 6 ukutula apo atendekele umulimo wa kushimikila mu Yerusalemu, Yesu alengele abantu baishiba ukuti muli ena e mo abantunse bakapusukila.

Yesu aebele Nikodemo ati: “Lesa tatumine Umwana wakwe mu calo ku kupingula icalo.” Kanshi Yesu taishile mu kupingula abantu ukuti bakonaulwe, lelo ico aishiile “ni mu kuti aba mu calo bakapusukile muli ena.”—Yohane 3:17.

Nikodemo ali no mwenso kabili aile kuli Yesu ubushiku ninshi napafiita. Kanshi yalimukumine sana amashiwi Yesu amwebele pa kulekelesha aya kuti: “Ico abantu bapingwilwapo ni ci, ulubuuto [ulwaishiile muli Yesu, ukupitila mu fyo alecita na mu fyo alesambilisha] lwaisa pano calo lelo abantu batemwa imfifi ukucila ulubuuto, pantu imilimo yabo ibi. Pantu uucita ifyabipa apata ulubuuto kabili tesa ku lubuuto, pa kuti ifyo acita fisokoloka. Lelo uucita ifisuma esa ku lubuuto, pa kuti ifyo acita fimoneke ukuti filomfwana ne fyo Lesa afwaya.”—Yohane 3:19-21.

Nikodemo, kasambilisha wa mu Israele umuFarise, aliyumfwilile ifyo Yesu alandile. Kanshi cashalile umwine ukutontonkanyapo pa fyo Yesu ali no kucita pa kuti ubufwayo bwa kwa Lesa bukafikilishiwe.