Tinikeni pa kuti muye ku filimo

Tinikeni pa kuti mumone imitwe iilimo

 ICIPANDWA 46

Aundapwa pa Numa ya Kukumya ku ca Kufwala ca kwa Yesu

Aundapwa pa Numa ya Kukumya ku ca Kufwala ca kwa Yesu

MATEO 9:18-22 MARKO 5:21-34 LUKA 8:40-48

  • UMWANAKASHI AUNDAPWA PA NUMA YA KUKUMYA KU CA KUFWALA CA KWA YESU

Ilyo Yesu afumine ku Dekapoli, ululumbi lwalisalangene ukufika na ku baYuda abaleikala lwa ku kapinda ka kuso aka lulamba lwa Bemba wa Galili. Abengi bafwile balyumfwile ukuti Yesu alitalalike icikuuku ca mwela e lyo na menshi ya pali bemba, kabili bamo bafwile balishibe no kuti aliposeshe umwaume uwali ne fibanda. E calengele, “ibumba ilikalamba” lilongane ku lulamba lwa bemba, nalimo mu Kapernahumu, pa kuti bapokelele Yesu. (Marko 5:21) Ilyo afikile ku lulamba, asangile abantu balemuloleela kabili balefwaisha ukumona ifipesha amano.

Umwaume umo uwalefwaisha ukumona Yesu, ni Yairo, umukalamba we sunagoge, ilyali nalimo mu Kapernahumu. Awile pa makasa ya kwa Yesu no kumupaapaata nga nshi ati: “Akamwana kandi akakashana nakalwala sana. Iseni mubikepo iminwe yenu pa kuti kapole kabe akatuntulu.” (Marko 5:23) Bushe Yesu acitile shani ilyo Yairo amupaapeete ukuti ondape umwana wakwe, uwali fye ne myaka 12 kabili uo atemenwe sana?—Luka 8:42.

Ilyo aleya ku ng’anda ya kwa Yairo, kwalicitike icintu na cimbi icalengele Yesu omfwe uluse. Abantu abengi abaile pamo na Yesu balitemenwe kabili baletontonkanya ukuti nalimo alacitapo icipesha amano na cimbi. Lelo, umwanakashi umo uwali mwi bumba ena aletontonkanya pa bulwele bwabipisha ubo alwele.

Pa myaka 12, uyu umwanakashi umuYuda aliculile ku bulwele bwa kufuma umulopa. Alimonene na bashing’anga abengi kabili alibomfeshe indalama shonse isho akwete pa kuti fye ondapwe. Lelo balifililwe ukumundapa. Na kuba, e lyo “alwalileko.”—Marko 5:26.

Nga fintu twamona, ubulwele alwele tabwalemupwisha fye amaka, lelo bwalemuseebanya no kumumfwisha insoni. Banono abengalanda ku bantu pa bulwele bwa musango uyu. E lyo kabili ukulingana na Mafunde ya kwa Mose, ukufuma umulopa kwalelenga umwanakashi aba uwakowela. Uuli onse uwamwikata nelyo uwakumya ku fya kufwala fyakwe alingile ukucapa ifya kufwala no kusamba kabili aleba uwakowela ukufika icungulo.—Ubwina Lebi 15:25-27.

Ilyo uyu mwanakashi “aumfwile ifyo abantu balelanda pali Yesu,” aile mu kumufwaya. Apo ali uwakowela, apitile mwi bumba umutalalila, ninshi alelanda mu mutima wakwe ati, “Nga nakumya fye ku fya kufwala fyakwe, nalapola.” Ilyo akumishe ku nsekebele sha ca kufwala ca kwa Yesu, apo pene fye alyumfwile ukuti umulopa walilekele ukufuma! Alipolele ku “bulwele bwakwe ubwabipisha.”—Marko 5:27-29.

Yesu atile: “Nani uwankumya?” Elenganyeni ifyo umwanakashi aumfwile ilyo Yesu alandile aya mashiwi. Petro alikeene kabili aebele Yesu ati: “Amabumba nayamushinguluka kabili yalemutitikisha.” Cinshi Yesu alandiile ukuti, “Nani uwankumya?” Yesu atile: “Umuntu umo nankumya, pantu ning’umfwa amaka yafuma muli ine.” (Luka 8:45, 46) Filya umwanakashi aundepwe fyalengele amaka yamo yafuma muli Yesu.

Apo icacitike calishibikwe, umwanakashi awile pa ntanshi ya kwa Yesu ninshi ali no mwenso kabili aletutuma. Lyena pa menso ya bantu bonse, aebele Yesu fyonse pa bulwele alwele no kuti nomba alipolele. Yesu alimusansamwishe ati: “We mwana, icitetekelo cobe nacikuposha. Kabiye umutende, kabili upolelele na ku bulwele bobe ubwabipisha.”—Marko 5:34.

Ukwabula no kutwishika, Yesu uo Lesa asonta ukuteka isonde, alitutemwa, wa luse, alatusakamana nga tulecula kabili alikwata na maka ya kutwafwa!