LUKA 1:34-56

  • MARIA ATANDALILA ELISABETE, LUPWA LWAKWE

Ilyo malaika Gabriele aebele umukashana Maria ukuti ali no kufyala umwana umwaume uukaba Imfumu umuyayaya, uo akenika ati Yesu, Maria aipwishe malaika ati: “Bushe cikaba shani ici, pantu nshatalakumanapo no mwaume?”—Luka 1:34.

Gabriele ayaswike ati: “Umupashi wa mushilo ukesa pali iwe, na maka ya Wapulamo yakakufimba. E mulandu wine uukafyalwa aketilwa uwa mushilo, Umwana wa kwa Lesa.”—Luka 1:35.

Apo Gabriele alefwaya ukuti Maria etwishika ifyo amwebele, asosele no kuti: “Mona! lupwa lobe Elisabete, uo batila ni ng’umba, na o mu bukote bwakwe naimita umwana umwaume, kabili uno e mweshi walenga 6; pantu takuli ico Lesa alanda ico engafilwa ukucita.”—Luka 1:36, 37.

Maria alandile amashiwi ayalanga ukuti alisumiine ifyo Gabriele amwebele. Atile: “Moneni! Ndi musha mwanakashi uwa kwa Yehova! Nacibe ifyo fine ukulingana ne fyo mwasosa.”—Luka 1:38.

Ilyo Gabriele aile, Maria apekenye ukuyatandalila Elisabete, uwaleikala no mwina mwakwe mu mpili sha Yudea, mupepi na Yerusalemu. Ukufuma ku Nasarete uko Maria aleikala ukuyafika ukwaleikala Elisabete, bwali bulendo bwa nshiku shitatu nelyo shine.

Maria asukile afika ku ng’anda ya kwa Sekaria. Ilyo aingile mu ng’anda aposeshe Elisabete, lupwa lwakwe. Ilyo line fye, Elisabete aiswilemo umupashi wa mushilo kabili aebele Maria ati: “Walipaalwa pa banakashi bonse, kabili alipaalwa umwana uo ukafyala! Nga kanshi nashuka shani ica kuti nyina wa kwa Shikulu ese kuli ine? Pantu mona! ilyo nacumfwa fye wamposha, umwana mwi fumo aciciluka no kwanga nga nshi.”—Luka 1:42-44.

Pa kwasuka, Maria alandile amashiwi ya kutasha aya kuti: “Ndelumbanya Yehova, no mutima wandi teti ufilwe ukusansamukila nga nshi Lesa Umupusushi wandi; pantu nalolesha pa musha wakwe umulanda. Pantu, moneni! ukutula nomba abantu ba mu nkulo shonse bakalatila nalishuka; pantu uwa maka nancitila ifipapwa.” Nangu ca kuti Maria alipaalilwe muli uyu musango, taali na cilumba lelo acindike Lesa. Atile: “Ishina lyakwe lya mushilo; no luse lwakwe lwa muyayaya ku bamutiina.”—Luka 1:46-50.

Maria akonkenyepo ukulumbanya Lesa ati: “Alibomba ifipapwa ku kuboko kwakwe, alisalanganya abalanga ukuti ba matutumuko mu mapange ya mu mitima yabo. Alikisha aba maka pa fipuna fya bufumu no kusansabika abalanda; aba nsala abalenga ukwikuta ifisuma na bali ne fyuma abaleka baya iminwe nkutwa. Nayafwa Israele umubomfi wakwe, ku kulanga ukuti alebukisha ubulayo bwakwe ubwa kulanga uluse umuyayaya, nga filya fine asosele ku fikolwe fyesu, kuli Abrahamu na ku mwana wakwe.”—Luka 1:51-55.

Maria aikele na Elisabete pa myeshi itatu. Nalimo inshita yonse iyi aleafwilishako Elisabete uwashele fye ne milungu iinono pa kuti apaape. Calilingile ukuti aba abanakashi ba cishinka babili abali no kukwata abana, abo Lesa abapeele mu cipesha amano, bekale pamo pali iyi inshita!

Kabili moneni ifyo Yesu acindikwe na lintu fye talafyalwa. Elisabete amwitile ati: “Shikulu” kabili akanya akali mwi fumo lyakwe ‘kalicilwike no kwanga nga nshi’ ilyo Maria aingile fye mu ng’anda. Nga fintu twalamona, ifi fyalipusene sana ne fyo abantu pa numa bacitile kuli Maria na ku mwana wakwe ilyo afyelwe.