LUKA 14:25-35

  • IFIFWAIKWA PA KUBA UMUSAMBI

Yesu alisambilishe abantu amasambililo ayasuma sana ilyo alelya ica kulya mu ng’anda ya mukalamba wa baFarise. Ilyo Yesu akonkenyepo ulwendo lwa kuya ku Yerusalemu, abantu abengi balimukonkele. Mulandu nshi? Bushe balefwaisha ukuba abasambi ba kwa Yesu no kulacita fyonse ifyo umusambi afwile ukulacita?

Nalimo bamo pabo ali nabo pali ulu lwendo balipapile ilyo Yesu atile: “Umuntu nga aisa kuli ine kabili tapata wishi na nyina no mukashi na bana na bamunyina ne nkashi, nangu fye umweo wakwe, te kuti abe umusambi wandi.” (Luka 14:26) Bushe aya mashiwi yalolele mwi?

Yesu talelanda ukuti abafwile ukuba abasambi bakwe ni balya abapata balupwa wabo. Lelo aloseshe mu kuti bafwile ukutemwisha Yesu ukucila ifyo batemwa balupwa wabo. Tabafwile ukuba nga ulya umwaume wa mu cilangililo uwakeene ukuya ku mulaalilo uko bamwitile pa mulandu wa kuti e lyo aupile fye. (Luka 14:20) Baibolo itila, Yakobo, icikolwe ca baYuda ‘alipatile’ Leya lelo alitemenwe Rakele. Ici calola mu kuti alitemenwe Rakele ukucila ifyo atemenwe nkashi nankwe Leya.—Ukutendeka 29:31.

Yesu asosele no kuti, umusambi wakwe alingile ukupata fye no “mweo wakwe.” Ico alelandapo ca kuti, umusambi wa cine alingile ukutemwa Yesu ukucila ne fyo atemwa umweo wakwe kabili alingile no kuipeelesha ukufwilapo pali Yesu. Kanshi ukuba umusambi wa kwa Kristu cintu icikalamba nga nshi ico tulingile ukubikako amano no kutontonkanyapo sana.

Umuntu nga aba umusambi kuti atendeka ukukwata amafya e lyo no kucushiwa, pantu Yesu atile: “Onse uushisenda icimuti cakwe ica kucushiwilwapo no kunkonka, te kuti abe umusambi wandi.” (Luka 14:27) Umusambi wa kwa Yesu afwile ukwishiba ukuti akulapontelwa nga filya Yesu alepontelwa. Yesu asosele fye no kuti abalwani bakwe kuti baipaya umusambi wakwe.

Kanshi abaalekonka Yesu ilyo aleya ku Yerusalemu, balingile ukutontonkanyapo sana pa fyo umusambi wa kwa Kristu alingile ukuba. Yesu alilandilepo pali ici cishinka muli ici cilangililo. Atile: “Pantu nani pali imwe nga alefwaya ukukuula ulupungu tabala ekala pa nshi no kupenda ishingapooswapo, pa kuti amone nga nakwata isha kulupwishisha? Pantu kuti abika umufula wa luko uwa kukuulapo lelo afilwa ukulupwisha.” (Luka 14:28, 29) Kanshi ilyo abaalemukonka pali ulu lwendo lwa kuya ku Yerusalemu tabalaba abasambi ba kwa Yesu, baalingile ukuipeelesha ukulakonka fyonse ifyo umusambi afwile ukukonka. Pa kukomaila pali ici cishinka, abebele icilangililo na cimbi.

Atile: “Ni mfumu nshi, iileya mu kulwa inkondo ne mfumu imbi, iishibala yaikala pa nshi no kulanshanya ne mpanda mano sha iko pa kuti imone nga kuti yaya na bashilika 10,000 ku kuyalwa ne mfumu iileisa na bashilika 20,000? Na kuba, nga te kuti icite co, ninshi ilyo imfumu imbi icili ukutali, kuti yatuma inkombe no kulomba umutende.” Pa kuti bomfwikishe ico alelandapo, Yesu abebele ati: “E ico mwishibe ukuti, takuli nangu umo pali imwe uwafilwa ukusha fyonse ifyo akwata uwingaba umusambi wandi.”—Luka 14:31-33.

Yesu taleeba fye balya balemukonka pali bulya bulendo, lelo aleeba bonse abafwaya ukuba abasambi ba kwa Kristu ukuti balingile ukukonka ifyo alandile. E ico bafwile ukuipeelesha ukusha fyonse ifyo bakwata pamo nga ifyuma kabili balingile no kuipeelesha ukufwilapo pa kuba umusambi wakwe. Kanshi umuntu afwile ukutontonkanyapo sana no kupepelapo pali uyu mulandu.

Lyena Yesu alandile pa cintu na cimbi ico alandilepo na mu Lyashi lya pa Lupili, ilyo atile abasambi bakwe, “mucele wa pano isonde.” (Mateo 5:13) Afwile aloseshe mu kuti, nga filya fine umucele ulenga ifintu ukukanaonaika, abasambi bakwe nabo balikwata amaka ya kucingilila abantu ku fingonaula imibele yabo e lyo na bucibusa bwabo na Lesa. E ico apo ali mupepi no kupwisha umulimo wakwe pano calo, atile: “Kwena, umucele waliwama. Lelo umucele nga wafumuka, kuti walowa shani na kabili?” (Luka 14:34) Abo aleeba balishibe ukuti pali ilya nshita, kwali umucele uushali bwino pantu walesaakana ne cani ne loba, e ico tabaleubomfya sana.

Ico Yesu alelandapo ca kuti, na baali abasambi bakwe pa nshita ntali, tabalingile ukubwelela ku numa. Nga babwelela ku numa, te kuti babe abasambi, kuti baba ngo mucele uwafumuka. Na ba mu calo kuti babaseka. Ne cingacilapo ukubipa ca kuti Lesa kuti abakaana, e lyo kuti baleta no museebanya pe shina lyakwe. Pa kubalanga ukuti tabaalingile ukubwelela ku numa nangu panono, Yesu abebele ukuti: “Uuli na matwi ya kuumfwa, naomfwe.”—Luka 14:35.