Tinikeni pa kuti muye ku filimo

Tinikeni pa kuti mumone imitwe iilimo

 ICIPANDWA 34

Yesu Asala Abatumwa 12

Yesu Asala Abatumwa 12

Yesu asalile abatumwa pa numa ya mwaka umo ne myeshi 6 ukutula apo Yohane Kabatisha aebeele abantu ukuti Yesu e Mwana wa Mpaanga. Ilyo Yesu atendeke fye ukushimikila, abaume abengi aba cishinka baishileba abasambi bakwe. Bamo pali aba ni Andrea, Simone Petro, Yohane, nalimo na Yakobo (munyina Yohane), Filipi na Batolomeo (uo baleita no kuti Natanaele). Mu kuya kwa nshita, abaume na bambi abengi balitendeke ukukonka Kristu.—Yohane 1:45-47.

Nomba Yesu alefwaya ukusala abatumwa, abali no kuba ifibusa fyakwe kabili abo ali no kusambilisha umulimo. E ico aile ku lupili, nalimo ulwali mupepi na Bemba wa Galili, lwa ku Kapernahumu, uko apepele kuli Lesa ubushiku bonse pa kutila amupeele amano. Ubushiku bwakonkelepo, aitile abasambi bakwe bonse, asalapo na bali 12 abaishileba abatumwa bakwe.

Yesu asalile balya 6 abo tulandilepo pa kubala, e lyo na Mateo, uo Yesu aitile ninshi ali apo balesonkesesha imisonko. Bambi 5 abo asalile ni Yuda (uo baleita ati Tadeo nangu “umwana wa kwa Yakobo”), Simone uwacincila, Toma, Yakobo, mwana Alfeo, na Yuda Iskariote.—Mateo 10:2-4; Luka 6:16.

Ilyo Yesu asalile aba abatumwa 12, ninshi balitendeka kale ukumukonka, no kubeshiba ninshi alibeshiba bwino. Bamo pali aba bali ni balupwa wakwe. Yakobo na Yohane munyina, bafyelwe muli nkashi nankwe na Maria. Kabili nga ca cine ukuti Alfeo ali munyina Yosefe, wishi wa kwa Yesu, ninshi umutumwa Yakobo, uwali umwana wa kwa Alfeo na o ali lupwa lwa kwa Yesu.

Yesu ena talelaba amashina ya batumwa bakwe. Bushe kuti mwaibukisha amashina yabo? Cimo icingamwafwa ukwibukisha, kwishiba ukuti paali babili abaleitwa ati Simone, na bambi babili abaletiwa ukuti Yakobo e lyo na babili abaleitwa ukuti Yuda. Simone (Petro) alikwete munyina, Andrea, e lyo na Yakobo (umwana wa kwa Sebede) alikwete munyina uwaleitwa ukuti Yohane. Ifi e fingamwafwa ukulaibukisha amashina ya batumwa 8 aba kwa Yesu. Bambi bane ni (Mateo) kasonkesha wa misonko, (Toma) ulya uwatwishike Yesu, (Natanaele) uo Yesu aitile mwi samba lya muti, na (Filipi) umunankwe.

Abatumwa 11 bali bena Galili, mu citungu umo Yesu aleikala. Natanaele afumine ku Kana. Filipi, Petro, na Andrea bafumine ku Betsaida. Mu kuya kwa nshita, Petro na Andrea bakuukile ku Kapernahumu, uko Mateo afwile aleikala. Yakobo na Yohane nabo baleikala mupepi na ku Kapernahumu uko balecita ubukwebo bwe sabi. Cimoneka kwati Yuda Iskariote, uwafutwike Yesu, e mutumwa fye uwafumine ku Yudea.