Tinikeni pa kuti muye ku filimo

Tinikeni pa kuti mumone imitwe iilimo

 ICIPANDWA 6

Umwana Walailwe

Umwana Walailwe

LUKA 2:21-39

  • YESU BAMUSEMBULULA NO KUMUTWALA KWI TEMPELE

Yosefe na Maria baikele mu Betelehemu, tababwelelemo ku Nasarete. IIyo fye Yesu akumenye inshiku 8, balimusembulwile ukulingana ne fyo Amafunde Lesa apeele abena Israele yalelanda. (Ubwina Lebi 12:2, 3) Na kabili cimoneka kwati lwali lutambi ukwinika umwana ishina pali ubu bwine ubushiku. E ico bainike umwana ishina lya kuti Yesu nga fintu malaika Gabriele abebele.

Ilyo papitile inshiku 40 ukutula apo Yesu afyalilwe, ni kwi uko abafyashi bakwe bamutwele? Bamutwele kwi tempele mu Yerusalemu, apaali fye amakilomita ayanono ukufuma apo baleikala. Amafunde yatile nga papita inshiku 40 ukutula apo umwana umwaume afyalilwe, nyina alingile ukutuula ilambo pe tempele pa kuti basangululwe.—Ubwina Lebi 12:4-7.

Ifi fine e fyo Maria acitile. Atwele utuni tubili utwacepesha. Ici citulanga fye ukuti Yosefe na Maria bali bapiina. Ukulingana na Mafunde, umuntu alingile ukutuula akana ka mpaanga ne cuni. Lelo nga ca kuti nyina takwete impaanga, ninshi afwile ukutuula ifipeele fibili nelyo inkunda shibili. Apo Maria takwete akana ka mpaanga, atuulile ifipeele fibili nelyo inkunda shibili.

Ilyo bali pe tempele, umwaume umo umukoloci aishile kuli Yosefe na Maria. Ishina lyakwe ni Simeone. Lesa alimusokolwelele ukuti ilyo ashilafwa, akamonako umwana uo Yehova atile e ukaba Kristu nelyo Mesia. Pali ubu ubushiku umupashi wa mushilo watungulwile Simeone kwi tempele uko asangile Yosefe na Maria no mwana. Simeone abuulile umwana no kumufukatila.

Simeone atashishe Lesa ninshi nafukatila umwana. Atile: “Nomba mwe Shikulu Mulopwe, lekeni umusha wenu aye umutende nge fyo mwasosele; pantu amenso yandi nayamona uwa kupususha uo mwapekanishisha abantu bonse, ulubuuto lwa kufumya imfifi pa bena fyalo kabili ubukata bwa bantu benu abena Israele.”—Luka 2:29-32.

Yosefe na Maria balipapile ilyo baumfwile aya mashiwi. Simeone alibapaalile kabili aebele Maria ukutila, umwana wakwe “akalenga ukuti abengi mu Israele bakawe no kwima” no kuti ubulanda bukapula muli ena, ngo lupanga ulwatwa.—Luka 2:34.

Pali ubu bushiku pe tempele pali umuntu na umbi. No yu ni Ana, kasesema mwanakashi uwali ne myaka 84. Na kuba, Ana talepuswa pe tempele. Pali iyi yine nshita na o aliile ukwali Yosefe na Maria e lyo na Yesu uwali akanya. Ana atendeke ukutasha Lesa no kulanda pali Yesu kuli bonse abalefwaya ukumfwa.

Yosefe na Maria bafwile balitemenwe sana ilyo ifi fyonse fyalecitika pe tempele! Ukwabula no kutwishika, fyonse ifi fyalangile fye ukuti Yesu e wali Umwana Walailwe uwa kwa Lesa.