Tinikeni pa kuti muye ku filimo

Tinikeni pa kuti mumone imitwe iilimo

 ICIPANDWA 82

Yesu Ashimikila mu Perea

Yesu Ashimikila mu Perea

LUKA 13:22–14:6

  • TULINGILE UKUBOMBESHA PA KWINGILA PA MWINSHI WA KAMFYEMFYE

  • YESU ALINGILE UKUFWILA MU YERUSALEMU

Yesu alitwalilile ukusambilisha no kundapa abantu mu Yudea na mu Yerusalemu. Lyena ayabwike Umumana wa Yordani kabili atendeke ukusambilisha abantu mu misumba yalekanalekana iya mu citungu ca Perea. Lelo pa numa ya nshita iinono, alibweleelemo ku Yerusalemu.

Ilyo Yesu aali mu Perea, umwaume umo amwipwishe ati: “Mwe Shikulu, bushe abakapusuka banono?” Uyu mwaume afwile alishibe ukuti intungulushi sha mapepo shalekansana nga ca kuti abakapusuka bakaba abengi nelyo abanono. Yesu talandile pa mpendwa ya bakapusuka, lelo alandile pa fyo umuntu afwile ukucita pa kuti akapusuke. Atile: “Bombesheni na maka pa kwingila pa mwinshi wa kamfyemfye.” Ca cine, umuntu afwile ukubombesha pa kuti akapusuke. Mulandu nshi? Yesu atile: “Abengi bakafwaya ukwingila lelo bakafilwa.”—Luka 13:23, 24.

Pa kulanga ukuti ukubombesha kulafwaikwa, Yesu asosele ukuti: “Ilyo fye umwine wa ng’anda aima no kukomako ku ciibi, kabili mwaiminina pa nse no kulakonkonsha ku ciibi, amuti, ‘Mukwai, twiswileniko.’ Na o akamwasuka ati, ‘Nshishibe uko mufumine. . . . Fumeni apa, bonse imwe mwe bacita ifyabipa!’”—Luka 13:25-27.

Ici cilangililo calelanda pa muntu uwacelelwe ukufika pa mulandu wa kuti alikwete ifya kucita fimbi, kabili asangile iciibi nacikomwa. Alingile ukwisa bwangu nangu ca kuti alikwete fimbi ifya kucita. Ifi fine e fyo cali na ku bengi abaali no kunonkelamo mu fyo Yesu alesambilisha ilyo aali nabo. Balipanishe ishuko ilikalamba ilya kuba bakapepa ba cine. Abantu abengi tabatetekele Yesu nangu ca kuti eo Lesa atumine ku kupususha abantu. Yesu atile ‘bakalalila no kusumanya ameno,’ ilyo bakapooswa ku nse. Lelo abantu “abakafuma ku kabanga na ku masamba na ku kapinda ka ku kuso na ku kapinda ka ku kulyo,” mu nko shonse, “bakekala no kulya pe tebulo mu Bufumu bwa kwa Lesa.”—Luka 13:28, 29.

Yesu atile: “Bamo aba kulekelesha [pamo nga abashali abaYuda e lyo na baYuda abatitikishiwe] bakaba aba ntanshi, kabili bamo aba ntanshi [intungulushi sha mapepo abaYuda abaletwanga ukuti bali bana ba kwa Abrahamu] bakaba aba kulekelesha.” (Luka 13:30) Abakaba aba “kulekelesha,” ni balya abashamutetekeele, abashakengile mu Bufumu bwa kwa Lesa.

AbaFarise bamo baishile kuli Yesu no kumweba abati: “Fuma kuno kabiye, pantu Herode [Antipa] alefwaya ukukwipaya.” Nalimo Imfumu Herode yine e yatendeke ukukubanya ili ilyashi pa kuti Yesu afulumuke mu cifulo umo ali. Herode afwile aletiina ukuti akakumwako ku mfwa ya kwa kasesema na umbi, nga filya akumineko ku mfwa ya kwa Yohane Kabatisha. Lelo Yesu aebele abaFarise ati: “Kebeni ulya muntu uwacenjela nga mumbwe, amuti, ‘Mona! lelo na mailo ndefumya ifibanda no kuposha, kabili pa bushiku bwalenga shitatu e po  nkapwisha umulimo wandi.’” (Luka 13:31, 32) Filya Yesu aitile Herode ukuti “mumbwe,” aloseshe kuli filya bamumbwe bacenjela. Lelo takwali uwalingile ukupatikisha Yesu ukufuma bwangu muli cilya cifulo, nangu ni fye ni Herode takwete isho insambu. Ali no kubomba umulimo uo Wishi amupeele pa nshita iyo Lesa alefwaya, te pa nshita iyo abantu balefwaya.

Yesu alitwalilile no lwendo lwakwe ulwa kuya ku Yerusalemu pantu atile, “kasesema tafwile ukwipaiwa ku nse ya Yerusalemu.” (Luka 13:33) Apo mu Baibolo tamwaba ubusesemo nangu bumo ubwalanda ukuti Mesia afwile ukufwila mu Yerusalemu, cinshi Yesu alandiile ukuti ali no kufwila mu Yerusalemu? Ni co Yerusalemu e wali umusumba ukalamba, kabili e mwali icilye icikalamba ica Sanhedrini umwali bashicilye 71, kabili muli ici cilye e mo balelubulwishisha abo baletunganya ukuti ni bakasesema ba bufi. Mu Yerusalemu mwine e mo baletuulila amalambo ya nama. E ico Yesu alimwene ukutila te kuti ciwame afwila kumbi.

Yesu aliilishenye ati: “We Yerusalemu, We Yerusalemu, we wipaya bakasesema kabili we upoola amabwe abatumwa kuli iwe, ifyo imiku iingi nafwaile ukulonganika abana bobe filya nankoko alonganika utwana twakwe mu mapindo yakwe, lelo imwe mwalikeene! Moneni! Ing’anda yenu yashala icibolya.” (Luka 13:34, 35) Ulu luko lwalikeene Umwana wa kwa Lesa, kanshi lwalingile ukukandwa!

Ilyo Yesu ashilafika ku Yerusalemu, intungulushi ya baFarise yalimwitile ku ng’anda ku ca kulya pe Sabata. Abantu bambi abo baitile ku ca kulya balefwaisha ukumona nga ca kuti Yesu alaundapa umwaume uwalwele ulusuku (ulusuku bulwele ubulenga maka maka ulufumo, amolu na makasa ukufimba pa mulandu wa menshi ukwisulila mu lufumo). Yesu aipwishe abaFarise na baishibishe Amafunde ati: “Bushe calisuminishiwa ukundapa pe Sabata nelyo iyo?”—Luka 14:3.

Tapaali uwayaswike. Yesu alyundepe uyu mwaume kabili abepwishe ati: “Nani pali imwe uushingafumya umwana wakwe nga awila mu cishima nangu ing’ombe yakwe nga yawilamo pa bushiku bwe Sabata?” (Luka 14:5) Balifililwe ukwasuka ne ci cine icipusho.