Tinikeni pa kuti muye ku filimo

Tinikeni pa kuti mumone imitwe iilimo

 ICIPANDWA 27

Yesu Aita Mateo

Yesu Aita Mateo

MATEO 9:9-13 MARKO 2:13-17 LUKA 5:27-32

  • YESU AITA MATEO, KASONKESHA WA MISONKO

  • KRISTU AYA KU MUTEBETO UKWALI NA BABEMBU PA KUTI ABAAFWE

Pa numa ya kundapa uwa bulebe, Yesu alikeleko panono ku Kapernahumu, mu cifulo icaba mu lulamba lwa Bemba wa Galili. Na kabili abantu abengi baile kuli ena, na o atendeke ukubasambilisha. Ilyo alefuma kulya, amwene Mateo uo baleita abati Lebi, naikala apa kusonkesesha imisonko. Awe Yesu amwebele ati: “Nkonka, ube umusambi wandi.”—Mateo 9:9.

Nga filya fine cali kuli Petro, Andrea, Yakobo na Yohane, Mateo na o afwile alyumfwile ifyo Yesu alesambilisha ne fipesha amano ifyo alecita. Kanshi na o taikete na ku cani ilyo Yesu amwitile, alimukonkele. Mateo alondolwele ifyo cali mwi buuku lya Mbila Nsuma ilyo alembele. Atile: “Apo pene [Mateo wine] aliimine no kumukonka.” (Mateo 9:9) E ico Mateo alilekele ukusonkesha imisonko kabili ali umusambi wa kwa Yesu.

Ilyo papitile inshita, Mateo nalimo pa kulanga ukuti alitemenwe pali ubu ubwite ubusuma, alipekenye umutebeto uukalamba mu ng’anda mu mwakwe. Ni bani bambi abo aitile kuli uyu mutebeto ukwaIi Yesu na basambi bakwe? Alitileko ne fibusa fyakwe ifya kale, e lyo na bakasonkesha ba misonko. Aba balesonkesha imisonko ya buteko bwa bena Roma ubo abantu bapatile sana. Balepoka ne misonko ku bantu abaleisa na mato pa cabu, na ku mabumba ya bantu abalepita mu misebo. Balepoka ne misonko ya fipe ifyo abantu baleshita ku fyalo fimbi. Bushe abaYuda balemona shani bakasonkesha ba misonko? Abantu balibapatile pantu ilingi line balesonkesha indalama ishingi ukucila pa sho balingile ukusonkesha. Ku mutebeto kwali na ‘babembu,’ e kuti abantu abalecita ifyabipa.—Luka 7:37-39.

Ilyo abaFarise, abaleimona ukuti balungami, bamwene Yesu alelya pamo na babembu, baipwishe abasambi bakwe abati: “Mulandu nshi kasambilisha wenu aliila pamo na bakasonkesha ba misonko na babembu?” (Mateo 9:11) Apo Yesu alyumfwile ifyo balelanda, abebele ati: “Abatuntulu tabakabila kondapa, kano abalwele. Kanshi kabiyeni, kasambilileni umo amashiwi yalola ayatila, ‘Mfwaya uluse, te malambo iyo.’ Pantu nshaisa ku kwita abalungami, kano ababembu.” (Mateo 9:12, 13; Hosea 6:6) AbaFarise baletumfya fye Yesu ilyo bamwitile abati Kasambilisha. Na lyo line, baali no kusambililako ubulungami kuli Yesu.

Mateo aitile bakasonkesha ba misonko na babembu ku mwakwe pa kuti bengakutika ku fyo Yesu alesambilisha na pa kuti Yesu abafwe ukutemwa ifya kwa Lesa, kabili ‘abengi basangwike abasambi bakwe.’ (Marko 2:15) Yesu alefwaya ukubafwa ukuba ifibusa fya kwa Lesa. Tabasuulile pantu ena taali nga baFarise abaleimona ukuti balungami. Alibomfwilile uluse ne nkumbu; kanshi kuti ayafwa bonse abacita ifyabipa pa kuti baba ifibusa fya kwa Lesa.

Icalengele Yesu aafwe bakasonkesha ba misonko na babembu, te kuti alesuminisha ifyabipa ifyo balecita, lelo ni co alebomfwila uluse nga filya fine aleumfwila abalwele uluse. Ku ca kumwenako, ilyo aumfwilile uwa fibashi uluse, alimukumishe amweba no kuti: “Ee ndefwaya. Pola.” (Mateo 8:3) Bushe na ifwe te kuti ciwame nga tuleumfwila abantu uluse no kubafwa, maka maka ukubafwa ukuba ifibusa fya kwa Lesa?