MATEO 8:5-13 LUKA 7:1-10

  • UMUSHA WA MUKALAMBA WA BASHILIKA AUNDAPWA

  • ABAKWATA ICITETEKELO BAKAPAALWA

Ilyo Yesu apwishishe ukulanda Ilyashi lya pa Lupili, aile mu musumba wa Kapernahumu. Ilyo afikile, abakalamba ba mu baYuda baile kuli ena. Uwabatumine mukalamba wa bashilika umwina Roma, uushali umuYuda.

Umubomfi wa mukalamba wa bashilika alilwalishe ica kuti ali mupepi no kufwa. Nangu ca kutila umukalamba wa bashilika ali mwina Fyalo, alefwaya ukuti Yesu amwafwe. AbaYuda abo batumine baebele Yesu ukuti umubomfi wa mushilika “nasendama mu ng’anda alilwala ubulebe, kabili alecula nga nshi,” nalimo baloseshe mu kuti, umubili walekalipa nga nshi. (Mateo 8:6) Abakalamba ba mu baYuda balandile pa mukalamba wa bashilika ukuti alilingile ukumwafwilisha pantu “alitemwa uluko lwesu kabili e watukuuliile ne sunagoge.”—Luka 7:4, 5.

Tapakokwele Yesu aile na baYuda ku ng’anda ya mukalamba wa bashilika. Ilyo bali mupepi no kufika, umukalamba wa bashilika atumine ifibusa fyakwe ku kweba Yesu ukuti: “Mukwai, mwi-icusha, pantu nshalinga ukuti mwingile mwi samba lya mutenge wandi. E mulandu wine natila nshili uwalinga ukwisa kuli imwe.” (Luka 7:6, 7) Aya amashiwi alandile yatulanga ukuti uyu muntu, uwabeleshe ukweba abantu ifya kucita, ali-icefeshe sana! Taali nga abena Roma abalecusha abasha.—Mateo 8:9.

Umukalamba wa bashilika alishibe ukuti abaYuda tabalefwaya ukuba pamo na bashili baYuda. (Imilimo 10:28) Nalimo e calengele atume ifibusa fyakwe ku kweba Yesu ukuti: “Soseni fye amashiwi, no mubomfi wandi apole.”—Luka 7:7.

Yesu alipapile ilyo aumfwile ifi kabili abebele ati: “Ndemweba nati, nshatala nsanga nangu umo uwa citetekelo icikalamba nge ci nangu fye ni mu Israele.” (Luka 7:9) Ilyo ifibusa fya mukalamba wa bashilika fyabwelelemo ku ng’anda yakwe, fyasangile umusha ali fye bwino.

Ilyo Yesu aundepe uyu umusha, aebele abaliko amashiwi ayalanga ukuti na bashali baYuda lelo abali ne citetekelo baali no kupaalwa. Atile: “Abengi aba ku kabanga na ba ku masamba bakesa no kwikala pe tebulo pamo na Abrahamu na Isaki na Yakobo mu Bufumu bwa mu muulu.” Cali no kuba shani ku baYuda abashali ne citetekelo? Yesu atile “bakabapoosa ku nse mu mfifi. E kukaba ukulila no kusumanya ameno.”—Mateo 8:11, 12.

E ico abaYuda abakeene ishuko lya kuba mu Bufumu na Kristu, nabo Lesa alibakeene. Lelo abena Fyalo bali no kuba nankwe “mu Bufumu bwa mu muulu.”