1, 2. (a) San-o nagigin birilhon gud ha imo an usa nga regalo? (b) Kay ano nga masisiring nga an lukat amo an pinakabirilhon nga regalo nga makakarawat mo?

 ANO an pinakabirilhon nga regalo nga imo nakarawat? An usa nga regalo diri kinahanglan magin marahalon basi la pabilhan. Ha pagkamatuod, an totoo nga bili han usa nga regalo diri iginbabasar ha kantidad hito. Lugod, kon an regalo nakakapalipay ha imo o nakakatagbaw han totoo nga panginahanglan ha imo kinabuhi, birilhon gud ito ha imo.

² Ha damu nga mga regalo nga karuyag mo makarawat, may-ada usa nga pinakabirilhon ha ngatanan. Ito an regalo han Dios ha katawohan. Tinatagan kita ni Jehova hin damu nga mga butang, kondi an iya pinakabirilhon nga regalo ha aton amo an halad nga lukat han iya Anak, hi Jesu-Kristo. (Mateo 20:28) Sugad han hibabaroan naton dinhi hini nga kapitulo, an lukat amo an pinakabirilhon nga regalo nga posible nga makarawat mo, kay makakahatag ito ha imo hin daku hinduro nga kalipayan ngan makakatagbaw han imo pinakaimportante nga mga panginahanglan. An lukat amo gud an gidadakui nga kapahayagan han gugma ni Jehova ha imo.

3. Ano an lukat, ngan ano an kinahanglan masabtan anay naton basi maapresyar naton inin birilhon nga regalo?

³ Ha simple nga mga pulong, an lukat amo an paagi ni  Jehova ha pagluwas han katawohan tikang ha sala ngan kamatayon. (Efeso 1:7) Basi masabtan an kahulogan hini nga katutdoan han Biblia, kinahanglan repasuhon naton an nahitabo ha hardin han Eden. Maaapresyar la naton kon kay ano nga an lukat birilhon gud nga regalo ha aton kon masabtan anay naton kon ano an nawara ni Adan han hiya nakasala.

4. Ano an kapulsanan han hingpit nga tawhanon nga kinabuhi para kan Adan?

⁴ Han ginlarang ni Jehova hi Adan, iya gintagan hi Adan hin presyoso gud nga butang​—hingpit nga tawhanon nga kinabuhi. Hunahunaa kon ano an kapulsanan hito para kan Adan. Tungod kay hingpit an iya lawas ngan hunahuna, diri gud hiya magkakasakit, malalagas, o mamamatay. Sugad nga hingpit nga tawo, may-ada hiya espesyal nga relasyon kan Jehova. An Biblia nasiring nga hi Adan ‘anak han Dios.’ (Lukas 3:38) Salit hi Adan nagpahimulos hin duok nga relasyon kan Jehova nga Dios, pariho han relasyon han usa nga anak ha mahigugmaon nga amay. Hi Jehova nakipagkomunikar ha iya tunan-on nga anak, ngan ginhatagan niya hi Adan hin makalilipay nga mga buruhaton ngan iginpahibaro ha iya kon ano an ginlalaoman ha iya.​—Genesis 1:28-30; 2:​16, 17.

5. Ano an iginpapasabot han Biblia han magsiring ito nga hi Adan ginhimo ha ‘ladawan han Dios’?

⁵ Hi Adan ginhimo ‘ha ladawan han Dios.’ (Genesis 1:27) Diri ito nangangahulogan nga an hitsura ni Adan pariho han Dios. Sugad han aton hinbaroan ha Kapitulo 1 hini nga libro, hi Jehova diri-nakikita nga espiritu. (Juan 4:24) Salit hi Jehova waray unudnon nga lawas ngan dugo. Tungod kay hi Adan ginhimo ha dagway han Dios, nagpapasabot ito nga ginlarang hiya nga may-ada mga kalidad nga pariho han mga kalidad han Dios, upod na an gugma, kinaadman, hustisya, ngan gahum. Ha usa pa nga importante nga paagi, hi Adan pariho han iya Amay tungod kay may-ada hiya kagawasan ha pagbuot. Salit, hi Adan diri pariho han robot nga makakagbuhat la han kon ano an igindisenyo o iginprograma nga bubuhaton hito. Lugod, makakahimo hiya hin personal nga mga desisyon, ngan makakapili hiya butnga han husto ngan han sayop. Kon  ginpili niya nga sumugot ha Dios, mabubuhi unta hiya ha waray kataposan ha Paraiso nga tuna.

6. Han hi Adan nagtalapas ha Dios, ano an nawara niya, ngan paonan-o naapektohan an iya mga anak?

⁶ Matin-aw, kon sugad, nga han hi Adan nagtalapas ha Dios ngan ginsirotan hin kamatayon, daku hinduro an iya iginbayad. Tungod han iya sala nawad-an hiya han iya hingpit nga tawhanon nga kinabuhi upod na an ngatanan nga mga kapulsanan hito. (Genesis 3:17-19) Makasurubo, nawara ni Adan inin presyoso nga kinabuhi diri la para ha iya kalugaringon kondi para liwat ha iya magigin mga anak. An Pulong han Dios nasiring: “Tungod ha usa ka tawo [Adan], sinulod an sala ha kalibotan, ngan tungod ha sala an kamatayon; ngan sugad man an kamatayon inagi ha ngatanan nga katawohan, kay an ngatanan nakasala.” (Roma 5:12) Oo, kita ngatanan nakapanunod han sala tikang kan Adan. Salit, an Biblia nasiring nga iya “iginbaligya” an iya kalugaringon ngan an iya mga anak ha pagkauripon ha sala ngan kamatayon. (Roma 7:14) Waray paglaom hi Adan ngan hi Eva tungod kay tinuyo nga ginpili nira an pagtalapas ha Dios. Kondi kumusta man an ira mga anak, upod na kita?

7, 8. An lukat kasagaran nga nangangahulogan hin ano nga duha nga butang?

⁷ Ginluwas ni Jehova an katawohan pinaagi han lukat. Ano nga klase hin lukat? An ideya mahitungod han lukat kasagaran nga nangangahulogan hin duha nga butang. Siyahan, an lukat amo an prisyo nga iginbabayad basi mabawi o matubos an usa nga butang. Mahimo ito igpariho ha kantidad nga iginbabayad basi buhian an usa nga ginkidnap. Ikaduha, an lukat amo an prisyo nga katugbang, o kabayaran, han kantidad han usa nga butang. Pariho ito ha kantidad nga iginbabayad basi mataparan an mga nadaot tungod han usa nga aksidente. Pananglitan, kon an usa ka tawo an hinungdan han aksidente, kinahanglan magbayad hiya hin kantidad nga eksakto nga katugbang ha bili han nadaot.

⁸ Paonan-o magigin posible nga mabayaran an daku hinduro nga nawara nga iginpasa ni Adan ha aton ngatanan ngan  talwason kita tikang ha pagkauripon ha sala ngan kamatayon? Aton paghisgotan an lukat nga iginhatag ni Jehova ngan kon ano an magigin kapulsanan hini para ha imo.

9. Ano nga klase hin lukat an ginkinahanglan?

⁹ Tungod kay hingpit nga tawhanon nga kinabuhi an nawara, diri gud makakalukat hito an diri-hingpit nga tawhanon nga kinabuhi. (Salmo 49:​7, 8) An ginkinahanglan amo an usa nga lukat nga an bili katugbang han nawara. Uyon ini ha prinsipyo han hingpit nga hustisya dida ha Pulong han Dios, nga nasiring: “An kinabuhi kuhaon tungod han kinabuhi.” (Deuteronomio 19:21) Salit, ano an makakabayad ha bili han hingpit nga tawhanon nga kinabuhi nga nawara ni Adan? Ginkinahanglan an usa pa nga hingpit, tawhanon nga kinabuhi sugad nga katugbang nga lukat.​—1 Timoteo 2:6.

10. Paonan-o iginhatag ni Jehova an lukat?

¹⁰ Paonan-o iginhatag ni Jehova an lukat? Iya sinugo nganhi ha tuna an usa han iya hingpit nga espirituhanon nga mga anak. Kondi waray magsugo hi Jehova hin bisan hin-o la nga espirituhanon nga linarang. Iya sinugo an usa nga pinakahinigugma niya, an iya bugtong nga Anak. (1 Juan 4:​9, 10) Kinaburut-on nga binayaan hini nga Anak an iya langitnon nga panimalay. (Filipos 2:7) Sugad han hinbaroan naton ha nahiuna nga kapitulo hini nga libro, hi Jehova nagbuhat hin milagro han iya iginbalhin an kinabuhi han iya Anak ngadto ha tagoangkan ni Maria. Pinaagi han baraan nga espiritu han Dios, natawo hi Jesus nga hingpit ngan diri apektado han sirot nga sala.​—Lukas 1:35.

11. Paonan-o mahimo magin lukat an usa ka tawo para ha damu nga mga tawo?

¹¹ Paonan-o an usa ka tawo mahimo magin lukat para ha damu nga mga tawo? Bueno, paonan-o nagtikang an pagin makasasala han mga tawo? Hinumdumi nga tungod ha pakasala, nawara ni Adan an pinakaimportante nga panag-iya, an hingpit nga tawhanon nga kinabuhi. Salit, diri na niya maipapasa ito ha iya mga anak. Lugod, an maipapasa la niya amo an sala  ngan kamatayon. Hi Jesus, nga tinatawag ha Biblia nga “an kataposan nga Adan,” may-ada hingpit tawhanon nga kinabuhi, ngan waray gud hiya makasala. (1 Korinto 15:45) Sugad hin sinaliwnan ni Jesus hi Adan basi maluwas kita. Pinaagi han paghalad, o paghatag, han iya hingpit nga kinabuhi ngan pagpabilin nga bug-os nga nasugot ha Dios, sugad hin ginbayaran ni Jesus an prisyo han sala ni Adan. Hito nga paagi tinagan ni Jesus hin paglaom an mga anak ni Adan.​—Roma 5:19; 1 Korinto 15:​21, 22.

12. Ano an pinamatud-an han pag-antos ni Jesus?

¹² Detalyado nga iginsasaysay han Biblia an pag-antos nga gin-ilob ni Jesus antes hiya mamatay. Naeksperyensyahan niya an maul-ol nga paglatigo, mabangis nga pagraysang, ngan masakit nga pagkamatay ha pasakitan nga kahoy. (Juan 19:1, 16-18, 30; Apendise, pahina 204-6) Kay ano nga kinahanglan mag-antos hinduro hi Jesus? Ha urhi nga kapitulo hini nga libro, hibabaroan naton nga ginruhaduhaan ni Satanas kon hi Jehova ba may-ada tawhanon nga mga surugoon nga magpapabilin nga matinumanon bisan pa han kakurian. Pinaagi han matinumanon nga pagpailob bisan pa han duro nga pag-antos, iginhatag ni Jesus an gimaopayi nga baton ha ayat ni Satanas. Pinamatud-an ni Jesus nga an hingpit nga tawo nga may kagawasan ha pagbuot makakatipig han hingpit nga integridad ha Dios anoman an buhaton han Yawa. Sigurado nga nalipay gud hi Jehova ha pagkamatinumanon han iya hinigugma nga Anak!​—Proberbios 27:11.

13. Paonan-o iginbayad an lukat?

¹³ Paonan-o iginbayad an lukat? Han ika-14 nga adlaw han Judio nga bulan han Nisan han 33 K.P., gintugotan han Dios nga patayon an iya hingpit ngan waray-sala nga Anak. Hito nga paagi iginhalad ni Jesus an iya hingpit tawhanon nga kinabuhi “hin makausa para ha ngatanan nga panahon.” (Hebreo 10:​10, NW) Ha ikatulo ka adlaw tikang ha kamatay ni Jesus, ginbanhaw hiya ni Jehova ngadto ha espirituhanon nga kinabuhi. Ha langit, iginpresenta ni Jesus ha Dios an bili han iya hingpit nga tawhanon nga kinabuhi nga iginhalad sugad nga lukat para ha mga anak ni Adan. (Hebreo 9:24) Kinarawat ni Jehova  an bili han halad ni Jesus sugad nga lukat nga ginkinahanglan basi maluwas an katawohan tikang ha pagkauripon ha sala ngan kamatayon.​—Roma 3:​23, 24.

14, 15. Basi makarawat an “pagpasaylo han aton mga sala,” ano an kinahanglan naton buhaton?

¹⁴ Bisan pa han aton makasasala nga kahimtang, mahimo kita magpahimulos hin presyoso nga mga bendisyon tungod han lukat. Aton paghisgotan an pipira han presente ngan tidaraon nga mga kapulsanan hinin pinakabirilhon nga regalo han Dios.

¹⁵ An kapasayloan han mga sala. Tungod han napanunod nga pagkadiri-hingpit, diri gud masayon para ha aton an pagbuhat han husto. Kita ngatanan nakakasala ha pulong o ha buhat. Kondi pinaagi han halad nga lukat ni Jesus, makakarawat naton an “pagpasaylo han aton mga sala.” (Kolosas 1:​13, 14) Kondi, basi makarawat ito nga pagpasaylo, kinahanglan kinasingkasing nga magbasol kita. Kinahanglan mapainubsanon nga manginyupo liwat kita kan Jehova, ngan maghangyo han iya pagpasaylo basado ha aton pagtoo ha halad nga lukat han iya Anak.​—1 Juan 1:​8, 9.

16. Ano an nabulig ha aton nga makagsingba ha Dios nga may limpyo nga konsensya, ngan ano an kapulsanan han sugad nga konsensya?

¹⁶ Limpyo nga konsensya ha atubangan han Dios. An salaan nga konsensya masayon magresulta ha kawaray-paglaom ngan tungod hito naabat kita hin kawaray-pulos. Kondi, pinaagi han pagpasaylo nga nagin posible tungod han lukat, may pagkabuotan nga tinutugotan kita ni Jehova ha pagsingba ha iya nga may limpyo nga konsensya bisan pa han aton pagkadiri-hingpit. (Hebreo 9:​13, 14) Tungod hini nagigin posible nga magkaada kita kagawasan ha pakiistorya kan Jehova. Salit, may kagawasan nga makakadaop kita ha iya ha pag-ampo. (Hebreo 4:14-16) An pagtipig hin limpyo nga konsensya naghahatag hin kamurayawan ha hunahuna, nakakadugang han pagtahod-ha-kalugaringon, ngan naghahatag hin kalipayan.

17. Ano nga mga bendisyon an nagin posible tungod kay hi Jesus namatay para ha aton?

 ¹⁷ An paglaom nga kinabuhi nga waray kataposan ha paraiso nga tuna. “An suhol han sala amo an kamatayon,” siring han Roma 6:23. Ini nga bersikulo dugang nga nasiring: “Kondi an hatag nga waray bayad han Dios amo an kinabuhi nga waray kataposan, nga aada kan Kristo Jesus nga aton Ginoo.” Ha Kapitulo 3 hini nga libro, aton ginhisgotan an mga bendisyon han tiarabot nga Paraiso nga tuna. (Pahayag 21:​3, 4) Nagin posible ito ngatanan nga tidaraon nga mga bendisyon, upod na an kinabuhi nga waray kataposan ha hingpit nga kahimsog, tungod kay hi Jesus namatay para ha aton. Basi makarawat ito nga mga bendisyon, kinahanglan ipakita naton nga inaapresyar naton an regalo nga lukat.

18. Kay ano nga sadang naton igpasalamat kan Jehova an regalo nga lukat?

¹⁸ Kay ano nga sadang naton igpasalamat hin kinasingkasing kan Jehova an lukat? Bueno, an usa nga regalo labi nga presyoso kon an naghatag hito nagsakripisyo hin panahon, nangalimbasog gud, o naggasto. Nababantad gud an aton kasingkasing kon nakikita naton nga an usa nga regalo usa nga kapahayagan han totoo nga gugma ha aton han naghatag. An lukat amo an pinakapresyoso ha ngatanan nga mga regalo, kay  daku hinduro an iginsakripisyo han Dios ha paghatag hito. “An Dios naghigugma gud han kalibotan, nga iya iginhatag an iya bugtong nga Anak,” siring han Juan 3:16. An lukat amo an pinakamakatirigamnan nga ebidensya han gugma ni Jehova ha aton. Ebidensya liwat ito han gugma ni Jesus, kay kinaburut-on nga iginhatag niya an iya kinabuhi para ha aton. (Juan 15:13) Salit an regalo nga lukat sadang makakombinse ha aton nga hi Jehova ngan an iya Anak nahigugma ha aton sugad nga mga indibiduwal.​—Galasia 2:20.

19, 20. Ha ano nga mga paagi maipapakita mo nga inaapresyar mo an regalo han Dios nga lukat?

¹⁹ Salit, paonan-o mo maipapakita nga inaapresyar mo an regalo han Dios nga lukat? Siyahan ha ngatanan, mahibaro hin dugang pa mahitungod kan Jehova, an Harangdon nga Humaratag. (Juan 17:3) An pag-aram ha Biblia pinaagi hini nga libro mabulig ha imo nga mas makilala pa hi Jehova. Samtang nagdudugang an imo kahibaro mahitungod kan Jehova, maghihilarom an imo gugma ha iya. Sugad nga resulta, ito nga gugma magpapagios ha imo nga lipayon hiya.​—1 Juan 5:3.

²⁰ Ipakita an imo pagtoo ha lukat ni Jesus. May kalabotan kan Jesus an Biblia nasiring: “An natoo ha Anak, may kinabuhi nga waray kataposan.” (Juan 3:36) Paonan-o naton maipapakita nga natoo kita kan Jesus? An sugad nga pagtoo diri ipinapakita ha mga pulong la. “An pagtoo patay, kon waray mga buhat,” siring han Jakobo 2:26. Oo, an totoo nga pagtoo pinamamatud-an han “mga buhat,” han aton mga buhat. An usa nga paagi ha pagpakita nga natoo kita kan Jesus amo an pagbuhat han aton gimaopayi ha pagsubad ha iya diri la ha aton ginsisiring kondi ha aton liwat ginbubuhat.​—Juan 13:15.

21, 22. (a) Kay ano nga sadang kita tumambong ha tinuig nga pagsaurog han Panihapon han Ginoo? (b) Ano an isasaysay ha Kapitulo 6 ngan 7?

²¹ Tambong ha tinuig nga pagsaurog han Panihapon han Ginoo. Ha gab-i han Nisan 14, 33 K.P., gintikangan ni Jesus an usa ka espesyal nga pagsaurog nga tinatawag han Biblia nga an “Panihapon han Ginoo.” (1 Korinto 11:20; Mateo 26:26-28) Ini nga pagsaurog tinatawag liwat nga an Memoryal han kamatayon ni  Kristo. Gintikangan ito ni Jesus basi buligan an iya mga apostol ngan an ngatanan nga nagin totoo nga mga Kristiano nga sinunod ha ira nga hinumdoman pirme nga pinaagi han iya kamatayon sugad nga hingpit nga tawo, iya iginhatag an iya kinabuhi sugad nga lukat. Mahitungod hini nga pagsaurog, hi Jesus nagsugo: “Ini buhata niyo nga hinumdoman ha akon.” (Lukas 22:19) An pagsaurog han Memoryal nagpapahinumdom ha aton han daku nga gugma nga ipinakita ni Jehova ngan ni Jesus pinaagi han lukat. Maipapakita naton an aton apresasyon para ha lukat pinaagi han pagtambong ha tinuig nga pagsaurog han Memoryal han kamatayon ni Jesus. a

²² An igintagana ni Jehova nga lukat tinuod nga pinakabirilhon gud nga regalo. (2 Korinto 9:​14, 15) Inin presyoso hinduro nga regalo mapapahimulsan bisan han mga nagkamatay na. An Kapitulo 6 ngan 7 an magsasaysay kon paonan-o.