Pakadto ha sulod

Pakadto ha mga sulod

 APENDISE

Natawo ba hi Jesus ha Disyembre?

Natawo ba hi Jesus ha Disyembre?

AN Biblia waray iginsusumat ha aton kon kakan-o natawo hi Jesus. Kondi, naghahatag gud ito ha aton hin maopay nga rason ha pagsiring nga waray hiya matawo ha Disyembre.

Tagda an mga kahimtang han klima hito nga panahon han tuig ha Betlehem, diin natawo hi Jesus. An bulan nga Chislev (katugbang ha Nobyembre/Disyembre) han mga Judio mahagkot ngan mauran nga bulan. An bulan katapos hito amo an Tebeth (Disyembre/Enero). Ito an may-ada pinakahabubo nga mga temperatura han tuig, nga danay may mga niebe ha kabukiran. Aton kitaon kon ano an iginsusumat ha aton han Biblia mahitungod han klima hito nga rehiyon.

Iginsasaysay han parasurat han Biblia nga hi Esra nga an Chislev mahagkot ngan mauran gud nga bulan. Katapos igsaysay ni Esra nga damu nga katawohan an nagkatirok ha Jerusalem ha “ikasiyam ka bulan [Chislev], ha ikakaruhaan ka adlaw han bulan,” iginsumat niya nga an katawohan “nangungurog . . . tungod han daku nga uran.” Mahitungod han mga kahimtang han klima hito nga panahon han tuig, an nagkakatirok nga katawohan mismo nagsiring: “Amo ini an panahon han duro nga uran, ngan diri kami nakakahimo pagtindog dida ha gawas.” (Esra 10:9, 13; Jeremias 36:22) Diri urusahon nga ginsiguro  han mga magbarantay han mga karnero nga naukoy ha mga rehiyon ha palibot han Betlehem nga hira ngan an ira mga karnero waray na dida ha gawas ha gab-i kon Disyembre!

Kondi, an Biblia nagsusumat nga an mga magbarantay han mga karnero nakada ha kapatagan nga nagbabantay ha ira mga karnero ha gab-i han katawo ni Jesus. Ha pagkamatuod, iginpapatin-aw han parasurat han Biblia nga hi Lukas nga hiton nga panahon, an mga magbarantay han mga karnero “naghuhuron ha mga kaumhan, ngan nagbabantay han ira pag-agma ha gab-i ha ira kahayopan” hirani ha Betlehem. (Lukas 2:8-12) Tigamni nga an mga magbarantay han mga karnero aktuwal nga nangungukoy ha gawas, diri la nagkakalakat ha gawas durante han kaadlawon. Kaupod nira an ira mga panon han kakarnerohan ha kapatagan ha gab-i. Ito ba nga paghulagway han pag-ukoy ha gawas naangay ha mahagkot ngan mauran nga klima han Betlehem kon Disyembre? Diri, diri gud. Salit an mga kahimtang ha panahon han katawo ni Jesus nagpapasabot nga waray hiya matawo ha Disyembre. *

An Pulong han Dios nagsusumat ha aton hin eksakto kon kakan-o namatay hi Jesus, kondi gutiay la nga detalye an iginhahatag hito kon kakan-o hiya natawo. Nagpapahinumdom ini han ginsiring ni Hadi Salomon: “An maopay nga ngaran maoroopay kay han birilhon nga lana; ngan an adlaw han kamatayon kay han adlaw han katawo han usa.” (Eklesiastes 7:1) Diri urusahon, kon sugad, nga an Biblia naghahatag hin damu nga detalye mahitungod han ministeryo ngan kamatayon ni Jesus kondi gutiay la nga detalye mahitungod han panahon han iya katawo.

Han natawo hi Jesus, an mga magbarantay han mga karnero ngan an ira mga panon han kakarnerohan nakada ha kapatagan ha gab-i

^ par. 6 Para ha dugang nga impormasyon, kitaa an pahina 176-9 han Reasoning From the Scriptures, nga iginpublikar han mga Saksi ni Jehova.