Ezra 8:1-36
8 Yana ini an mga ulo han ira mga panimalay* ngan an lista han katulinan han mga sinagka kaupod ko tikang ha Babilonya durante han pagmando ni Hadi Artaxerxes:+
2 ha mga anak ni Pinehas,+ hi Gersom; ha mga anak ni Itamar,+ hi Daniel; ha mga anak ni David, hi Hatus;
3 ha mga anak ni Secanias, ngan ha mga anak ni Paros, hi Zacarias, ngan may kaupod hiya nga 150 nga lalaki nga nakalista;
4 ha mga anak ni Pahat-moab,+ hi Elieho-enai nga anak ni Zerahias, ngan may kaupod hiya nga 200 nga lalaki;
5 ha mga anak ni Zatu,+ hi Secanias nga anak ni Jahaziel, ngan may kaupod hiya nga 300 nga lalaki;
6 ha mga anak ni Adin,+ hi Ebed nga anak ni Jonathan, ngan may kaupod hiya nga 50 nga lalaki;
7 ha mga anak ni Elam,+ hi Jesaias nga anak ni Atalia, ngan may kaupod hiya nga 70 nga lalaki;
8 ha mga anak ni Sefatias,+ hi Zebadias nga anak ni Miguel, ngan may kaupod hiya nga 80 nga lalaki;
9 ha mga anak ni Joab, hi Obadias nga anak ni Jehiel, ngan may kaupod hiya nga 218 nga lalaki;
10 ha mga anak ni Bani, hi Selomit nga anak ni Josifias, ngan may kaupod hiya nga 160 nga lalaki;
11 ha mga anak ni Bebai,+ hi Zacarias nga anak ni Bebai, ngan may kaupod hiya nga 28 nga lalaki;
12 ha mga anak ni Azgad,+ hi Johanan nga anak ni Hakatan, ngan may kaupod hiya nga 110 nga lalaki;
13 ha mga anak ni Adonikam,+ nga amo an ultimo, ini an ira mga ngaran: hira Elifelet, Jeiel, ngan Semaias, ngan may kaupod hira nga 60 nga lalaki;
14 ngan ha mga anak ni Bigvai,+ hira Utai ngan Zabbud, ngan may kaupod hira nga 70 nga lalaki.
15 Gintirok ko hira ha salog nga tipakadto ha Ahava,+ ngan nagkampo kami didto hin tulo ka adlaw. Pero han gin-usisa ko an katawohan ngan an mga saserdote, waray ko makita didto an bisan usa han mga Levita.
16 Salit iginpatawag ko hira Eliezer, Ariel, Semaias, Elnathan, Jarib, Elnathan, Nathan, Zacarias, ngan Mesulam, nga nangunguna nga kalalakin-an, ngan hira Joiarib ngan Elnathan, nga mga instruktor.
17 Katapos, ginpakadto ko hira kan Ido nga lider ha lugar nga gintatawag nga Casifia. Ginsidngan ko hira nga sidngon hi Ido ngan an iya kabugtoan nga lalaki, an mga surugoon ha templo* nga nakadto ha Casifia, nga dad-an kami hin mga kabulig para ha balay han amon Dios.
18 Tungod kay an maopay nga kamot han Dios nakadi ha amon, nagdara hira hin maaramon nga lalaki tikang ha mga anak ni Mali+ nga apo ni Levi nga anak ni Israel, nga amo hi Serebias,+ ngan an iya mga anak ngan an iya kabugtoan, 18 nga lalaki;
19 ngan hi Hasabias, ngan kaupod niya hi Jesaias tikang ha mga Merarita,+ an iya kabugtoan ngan an ira mga anak, 20 nga lalaki.
20 Ngan may-ada 220 han mga surugoon ha templo,* nga iginhatag ni David ngan han mga prinsipe basi bumulig ha mga Levita, nga an ngatanan iginlista sumala ha ira ngaran.
21 Katapos, didto ha salog han Ahava nagpasamwak ako hin pagpuasa basi magpaubos kami ha atubangan han amon Dios, basi mangaro ha iya hin giya para ha amon pagbiyahe, para ha amon ngan ha amon mga anak ngan ha ngatanan namon nga panag-iya.
22 Naawod ako paghangyo ha hadi hin mga sundalo ngan mga parapangabayo nga magpapanalipod ha amon ha mga kaaway ha dalan, kay nagsiring kami ha hadi: “An maopay nga kamot han amon Dios aada ha ngatanan nga namimiling ha iya,+ kondi an iya kusog ngan an iya kasina nakontra ha ngatanan nga nabaya ha iya.”+
23 Salit nagpuasa kami ngan naghangyo ha amon Dios mahitungod hini, ngan namati hiya ha amon pakimalooy.+
24 Naglain ako yana hin 12 han nangunguna nga mga saserdote, nga amo hira Serebias ngan Hasabias+ upod an napulo han ira kabugtoan.
25 Katapos, gintimbang ko ngada ha ira an silber ngan an bulawan ngan an mga garamiton, nga gin-amot han hadi, han iya mga magsaragdon, han iya mga prinsipe, ngan han ngatanan nga Israelita nga presente didto para ha balay han amon Dios.+
26 Salit nagtimbang ako ngada ha ira kamot hin 650 ka talanton* nga silber, 100 nga silber nga garamiton nga nagkakantidad hin 2 ka talanton, 100 ka talanton nga bulawan,
27 20 nga gudtiay nga yahong nga bulawan nga nagkakantidad hin 1,000 ka darik,* ngan 2 nga garamiton nga hinimo ha maopay nga tumbaga,* nga mainggat an pagkapula ngan makaruruyag sugad han bulawan.
28 Katapos, nagsiring ako ha ira: “Baraan kamo kan Jehova,+ ngan baraan an mga garamiton, ngan an silber ngan an bulawan mga boluntaryo nga halad kan Jehova nga Dios han iyo mga kaapoy-apoyan.
29 Bantayi niyo ito hin maopay tubtob nga matimbang niyo ito ha atubangan han nangunguna nga mga saserdote ngan mga Levita ngan han mga prinsipe han mga panimalay* han Israel ha Jerusalem,+ didto ha mga kwarto* han balay ni Jehova.”
30 Ngan ginkuha han mga saserdote ngan han mga Levita an silber ngan an bulawan ngan an mga garamiton nga gintimbang ngada ha ira, basi dad-on ito ha Jerusalem ha balay han amon Dios.
31 Ha kataposan, binaya kami ha salog han Ahava+ ha ika-12 ka adlaw han siyahan nga bulan+ basi kumadto ha Jerusalem, ngan an kamot han amon Dios nakadi ha amon, ngan iya kami gintalwas tikang ha kamot han kaaway ngan tikang ha pag-ambus ha dalan.
32 Salit inabot kami ha Jerusalem,+ ngan linabay an tulo ka adlaw.
33 Ngan han ikaupat ka adlaw, gintimbang namon an silber ngan an bulawan ngan an mga garamiton ha balay han amon Dios+ ngan igintubyan ito kan Meremot+ nga anak nga lalaki ni Urias nga saserdote, ngan kaupod niya hi Eleazar nga anak nga lalaki ni Pinehas, ngan kaupod nira an mga Levita nga hi Jozabad+ nga anak nga lalaki ni Jesua ngan hi Noadias nga anak nga lalaki ni Binui.+
34 An ngatanan gin-ihap ngan gintimbang, ngan an kabug-osan nga timbang iginrekord.
35 An mga ginawas tikang ha pagkabihag, an mga distyero hadto, naghalad ha Dios han Israel hin mga halad nga sinunog, 12 nga todo nga baka+ para ha bug-os nga Israel, 96 nga karnero nga lalakí,+ 77 nga nati nga karnero nga lalakí, ngan 12 nga kanding nga lalakí+ sugad nga halad tungod han sala; ini ngatanan halad nga sinunog para kan Jehova.+
36 Katapos, an mga balaud han hadi iginhatag namon+ ha mga satrapa* han hadi ngan ha mga gobernador han mga rehiyon ha Tabok han Salog,*+ ngan ira ginsuportaran an katawohan ngan an balay han tinuod nga Dios.+
Mga footnote
^ O “mga Netinim.” Lit., “mga iginhatag.”
^ O “mga Netinim.” Lit., “mga iginhatag.”
^ Ha Ingles, copper.
^ O “mga kwarto nga pangaonan.”
^ Titulo nga nangangahulogan nga “mga parapanalipod han ginhadian,” nga dinhi nagtutudlok ha mga gobernador han mga probinsya ha Imperyo han Persia.
^ O “ha Tabok han Eufrates.”
