Ezra 7:1-28
7 Katapos hini nga mga butang, durante han pagmando ni Hadi Artaxerxes+ han Persia, binalik hi Ezra.*+ Anak hiya nga lalaki ni Seraias,+ nga anak nga lalaki ni Azarias, nga anak nga lalaki ni Hilkias,+
2 nga anak nga lalaki ni Salum, nga anak nga lalaki ni Zadok, nga anak nga lalaki ni Ahitub,
3 nga anak nga lalaki ni Amarias, nga anak nga lalaki ni Azarias,+ nga anak nga lalaki ni Meraiot,
4 nga anak nga lalaki ni Zerahias, nga anak nga lalaki ni Uzi, nga anak nga lalaki ni Buki,
5 nga anak nga lalaki ni Abisua, nga anak nga lalaki ni Pinehas,+ nga anak nga lalaki ni Eleazar,+ nga anak nga lalaki ni Aaron+ nga punoan nga saserdote.
6 Ini nga Ezra sinagka tikang ha Babilonya. Usa hiya nga parakopya* nga maaram gud* han Balaud ni Moises,+ nga iginhatag ni Jehova nga Dios han Israel. Iginhatag han hadi an ngatanan nga iya iginhangyo, kay an kamot ni Jehova nga iya Dios nakada ha iya.
7 An pipira han mga Israelita, mga saserdote, mga Levita,+ mga parakanta,+ mga parabantay han ganghaan,+ ngan mga surugoon ha templo,*+ sinagka ngadto ha Jerusalem han ikapito ka tuig ni Hadi Artaxerxes.
8 Ngan hi Ezra inabot ha Jerusalem han ikalima ka bulan, han ikapito ka tuig han hadi.
9 Ha siyahan nga adlaw han siyahan nga bulan, nagtikang hiya pagbiyahe tikang ha Babilonya, ngan inabot hiya ha Jerusalem ha siyahan nga adlaw han ikalima ka bulan, kay an maopay nga kamot han iya Dios nakada ha iya.+
10 Igin-andam na ni Ezra an iya kasingkasing* ha pagkonsulta ha Balaud ni Jehova ngan ha pagbuhat hito,+ ngan ha pagtutdo ha Israel han mga regulasyon ngan mga paghukom hito.+
11 Ini an usa nga kopya han surat nga iginhatag ni Hadi Artaxerxes kan Ezra nga saserdote ngan parakopya,* usa nga eksperto ha pag-aram* han mga sugo ni Jehova ngan han iya mga regulasyon ha Israel:
12 * “Tikang kan Artaxerxes,+ an hadi han mga hadi, para kan Ezra nga saserdote, an parakopya* han Balaud han Dios han langit: Magkaada ka unta hura nga kamurayawan. Ngan yana
13 nagpapagawas ako hin sugo nga an ngatanan nga katawohan han Israel ha akon ginhadian ngan an ira mga saserdote ngan mga Levita nga naruruyag pag-upod ha imo ngadto ha Jerusalem sadang umupod ha imo.+
14 Kay ginsusugo ka han hadi ngan han iya pito nga magsaragdon basi mag-imbistigar kon an Balaud han imo Dios, nga aada ha imo,* ginsusunod ba ha Juda ngan Jerusalem,
15 ngan basi dad-on an silber ngan an bulawan nga boluntaryo nga iginhatag han hadi ngan han iya mga magsaragdon ngadto ha Dios han Israel, nga an urukyan aadto ha Jerusalem,
16 pati na an ngatanan nga silber ngan bulawan nga makakarawat* mo dida ha bug-os nga probinsya* han Babilonya, upod han regalo nga boluntaryo nga iginhahatag han katawohan ngan han mga saserdote ngadto ha balay han ira Dios, nga aadto ha Jerusalem.+
17 Ngan ini nga kwarta kinahanglan ipalit mo dayon hin todo nga mga baka,+ mga karnero nga lalakí,+ nati nga mga karnero,+ pati na han ira mga halad nga tikang ha lugas*+ ngan han ira mga halad nga irimnon,+ ngan kinahanglan mo ito ihalad ha halaran ha balay han iyo Dios ha Jerusalem.
18 “Ngan an anoman nga baga hin maopay ha imo ngan ha imo kabugtoan nga buhaton, mahimo niyo buhaton gamit an nahisalin nga silber ngan bulawan, sumala ha kaburut-on han iyo Dios.
19 Ngan an ngatanan nga surudlan nga iginhatag ha imo para ha pag-alagad ha balay han imo Dios, kinahanglan mo ito dad-on ha atubangan han Dios ha Jerusalem.+
20 Ngan an iba pa nga kinahanglanon ha balay han imo Dios nga kinahanglan mo ihatag, kukuhaon mo tikang ha tiripigan han bahandi han hadi.+
21 “Ako, hi Hadi Artaxerxes, nagpapagawas hin sugo ha ngatanan nga paratipig hin bahandi ha rehiyon ha Tabok han Salog,* nga an ngatanan nga ginhahangyo ha iyo ni Ezra+ nga saserdote, nga parakopya* han Balaud han Dios han langit, kinahanglan ihatag dayon,
22 tubtob ha 100 ka talanton* nga silber, 100 ka cor* nga trigo, 100 ka bat* nga bino,+ 100 ka bat nga lana,+ ngan bisan ano kadamu nga asin.+
23 An ngatanan nga iginsusugo han Dios han langit kinahanglan buhaton nga may kadasig para ha balay han Dios han langit,+ basi diri Hiya masina ha ginhadian han hadi ngan ha iya mga anak.+
24 Ngan iginpapahibaro liwat ha iyo nga diri igintutugot nga manukot hin bisan ano nga buhis*+ ha bisan hin-o ha mga saserdote ngan mga Levita, mga musikero,+ mga parabantay han purtahan, mga surugoon ha templo,*+ ngan mga nagtatrabaho ha balay han Dios.
25 “Ngan ikaw, Ezra, sumala ha kinaadman nga imo nakarawat tikang ha imo Dios,* pagtoka hin mga mahistrado ngan mga hukom nga maghuhukom ha ngatanan nga katawohan ha rehiyon ha Tabok han Salog, an ngatanan nga maaram han mga balaud han imo Dios; ngan kinahanglan mo tutdoan an bisan hin-o nga diri maaram hito.+
26 Ngan an kada tagsa nga diri nasunod ha Balaud han imo Dios ngan ha balaud han hadi kinahanglan padapatan dayon hin paghukom, kamatayon man ito, pagpaiwasa, multa, o kaprisohan.”
27 Hinaot dayawon hi Jehova nga Dios han aton mga kaapoy-apoyan, nga nagbutang ha kasingkasing han hadi nga patahumon an balay ni Jehova ha Jerusalem!+
28 Ngan nagpakita hiya ha akon hin maunungon nga gugma ha atubangan han hadi+ ngan han iya mga magsaragdon+ ngan han ngatanan nga gamhanan nga prinsipe han hadi. Salit nagkaada ako kaisog* tungod kay an kamot ni Jehova nga akon Dios nakadi ha akon, ngan nagtirok ako tikang ha Israel hin nangunguna nga kalalakin-an* basi sumagka kaupod ko.
Mga footnote
^ Nangangahulogan nga “Bulig.”
^ O “eskriba.”
^ O “Usa hiya nga eksperto nga parakopya.”
^ O “mga Netinim.” Lit., “mga iginhatag.”
^ O “Nagdesisyon na hi Ezra ha iya kasingkasing.”
^ O “eskriba.”
^ O “usa nga parakopya ha mga pulong.”
^ An Ezr 7:12 tubtob 7:26 orihinal nga iginsurat ha Aramaico.
^ O “eskriba.”
^ Lit., “ha imo kamot.”
^ O “sakop nga distrito.”
^ Lit., “maaagian.”
^ O “ha Tabok han Eufrates.”
^ O “eskriba.”
^ Ha orihinal nga yinaknan, tulo nga klase hin buhis an iginlista: buhis para ha tagsa nga tawo; buhis para ha mga produkto; ngan buhis nga iginbabayad han mga biyahero ha kalsada.
^ O “mga Netinim.” Lit., “mga iginhatag.”
^ Lit., “sumala ha kinaadman han imo Dios nga aada ha imo kamot.”
^ O “ginparig-on ko an akon kalugaringon.”
^ Lit., “hin mga ulo.”
