Ezra 6:1-22
6 Salit hito nga panahon nagpagawas hin sugo hi Hadi Dario, ngan nag-imbistigar hira ha balay han mga rekord diin gintitipigan an mga bahandi didto ha Babilonya.
2 Ngan usa nga linukot nga basahon an hin-agian ha balwarte han Ecbatana, ha probinsya* han Media, ngan nakasurat dida hito an masunod nga mensahe:
3 “Ha siyahan nga tuig ni Hadi Ciro, hi Hadi Ciro nagpagawas hin sugo may kalabotan ha balay han Dios ha Jerusalem:+ ‘Ipatukod utro an balay sugad nga lugar diin hira maghahalad hin mga halad, ngan kinahanglan ipahamutang an mga pundasyon hito; an kahitaas hito kinahanglan 60 ka siko,* an kahilapad hito 60 ka siko,+
4 nga may tulo ka tungbaw nga dagku nga mga bato nga pakakalidingon ngadto ha bubutangan hito ngan usa ka tungbaw nga mga kahoy;+ ngan an magagasto kukuhaon tikang ha balay han hadi.+
5 Sugad man, ipabalik an bulawan ngan silber nga mga surudlan han balay han Dios nga ginkuha ni Nabucodonosor ha templo ha Jerusalem ngan gindara ha Babilonya,+ basi maibalik ito ha hinmumutangan hito hadto ha templo ha Jerusalem ngan maibutang ha balay han Dios.’+
6 “Salit yana, Tatenai nga gobernador han rehiyon ha Tabok han Salog,* Setar-bozenai, ngan an iyo mga kaupod, nga uroubos nga mga gobernador han rehiyon ha Tabok han Salog+—pahirayo kamo didto.
7 Ayaw kamo panginlabot ha buruhaton ha balay han Dios. Tutukuron utro han gobernador han mga Judio ngan han mga tigurang han mga Judio an balay han Dios ha hinmumutangan hito hadto.
8 Dugang pa, nagpapagawas ako hin sugo mahitungod ha kon ano an kinahanglan niyo buhaton para hini nga mga tigurang han mga Judio para ha pagtukod utro ha balay han Dios: Kinahanglan baydan dayon ini nga kalalakin-an han ira mga nagasto basi makapadayon hira nga waray kaulangan;+ kukuhaon ito ha tiripigan han bahandi han hadi,+ ha buhis nga ginkolekta ha rehiyon ha Tabok han Salog.
9 Ngan anoman an ginkikinahanglan—turilyo nga mga baka+ ngan mga karnero nga lalakí+ ngan nati nga mga karnero+ para ha mga halad nga sinunog ngadto ha Dios han langit, ngan trigo,+ asin,+ bino,+ ngan lana,+ sugad han siring han mga saserdote nga aadto ha Jerusalem—kinahanglan padayon nga ihatag ha ira kada adlaw nga waray palya,
10 basi padayon hira nga makaghatag hin mga halad nga nakakapalipay ha Dios han langit ngan makag-ampo para ha kinabuhi han hadi ngan han iya mga anak.+
11 Nagpapagawas liwat ako hin sugo nga kon may bisan hin-o nga magtalapas hini nga sugo, kukuhaon an usa nga kahoy tikang ha iya balay ngan aalsahon hiya ngan ibibitay dida hito,* ngan an iya balay hihimoon nga panpubliko nga kasilyas* tungod hini nga sayop.
12 Ngan hinaot bungkagon han Dios nga nagpahinabo nga an iya ngaran umukoy didto*+ an bisan hin-o nga hadi ngan katawohan nga nag-aalsa hin kamot basi talapason ini nga sugo ngan bungkagon an balay han Dios, nga aadto ha Jerusalem. Ako, hi Dario, nagpapagawas hini nga sugo. Kinahanglan buhaton dayon ini.”
13 Katapos, ginbuhat dayon ni Tatenai nga gobernador han rehiyon ha Tabok han Salog, ni Setar-bozenai,+ ngan han ira mga kaupod an ngatanan nga iginsugo ni Hadi Dario.
14 Ngan an mga tigurang han mga Judio nagpadayon ha pagtukod ngan pag-uswag,+ kay naaghat hira han pagpanagna ni Hagai+ nga propeta ngan ni Zacarias+ nga apo ni Ido; gintapos nira ito pagtukod uyon ha iginsugo han Dios han Israel+ ngan ha iginsugo ni Ciro+ ngan ni Dario+ ngan ni Hadi Artaxerxes+ han Persia.
15 Natapos nira an balay ha ikatulo ka adlaw han bulan han Adar,* ha ikaunom ka tuig han pagmando ni Hadi Dario.
16 Katapos, an mga Israelita, an mga saserdote, an mga Levita,+ ngan an iba pa nga mga distyero hadto malipayon nga nagkaada inagurasyon* han balay han Dios.
17 Ngan para ha inagurasyon han balay han Dios naghalad hira hin 100 nga todo nga baka, 200 nga karnero nga lalakí, 400 nga nati nga karnero, ngan sugad nga halad tungod han sala 12 nga kanding nga lalakí, nga katugbang han kadamu han mga tribo han Israel.+
18 Ngan an mga saserdote ha ira mga grupo ngan an mga Levita ha ira mga grupo gintokahan nira para ha pag-alagad ha Dios ha Jerusalem,+ sumala ha nahisurat ha libro ni Moises.+
19 Ngan an mga distyero hadto nagselebrar han Paskua ha ika-14 ka adlaw han siyahan nga bulan.+
20 An mga saserdote ngan an mga Levita, hira ngatanan, naglimpyo na han ira kalugaringon,+ salit hira ngatanan limpyo; an hayop nga halad para ha Paskua ira gin-ihaw* para ha ngatanan nga distyero hadto, para ha ira mga igkasi-saserdote, ngan para ha ira kalugaringon.
21 Katapos, an mga Israelita nga binalik tikang ha pagkadistyero kinaon hito, pati na an ngatanan nga inupod ha ira ngan binulag tikang ha pagkamahugaw han mga nasud ha tuna basi magsingba* kan Jehova nga Dios han Israel.+
22 Nagselebrar liwat hira hin malipayon han Piyesta han Tinapay nga Waray Libadura+ ha sulod hin pito ka adlaw, kay ginhimo hira nga malipayon ni Jehova ngan ginpagios niya an kasingkasing han hadi han Asirya nga magpakita hin pag-uyon ha ira,+ salit ginsuportaran niya hira* ha buruhaton ha balay han tinuod nga Dios, an Dios han Israel.
Mga footnote
^ O “sakop nga distrito.”
^ O “ha Tabok han Eufrates.”
^ O “ngan tutuhugon hiya dida hito.”
^ O posible nga “basurahan; tambak han tai han hayop.”
^ Karuyag sidngon, ha Jerusalem, o ha templo.
^ O “nagdedikar.”
^ Ha iba nga lugar, “ginpatay.”
^ Lit., “mamiling.”
^ Lit., “ginparig-on niya an ira mga kamot.”
