Jerimaya 9:1-26
9 E mane kẹ uyovwin mẹ ame,Rẹ ẹro mẹ da dia ogbugbu rẹ ameoviẹ!
Ọke yena ke me rha viẹ te ason te uvoFikirẹ ihwo mẹ re hweri.
2 E mane ki mi vwo asan rẹ ọrhorha se wonphiyọ vwevunrẹ aton na!
Ke me rha yanjẹ ihwo mẹ vwo ji vrẹn nẹ asan rẹ ayen hepha,Kidie ayen eje igberadja,Ẹko rẹ ihwo rẹ ophiẹnvwe.
3 Ayen nuẹ ẹrẹnvwe rayen kerẹ umurhabọ;Efian ẹvwọrọn ọyen vọn otọ na ukperẹ evun-ẹfuọn.
“Ayen miovwẹnphiyọ miovwẹnphiyọ,Ayen kerhọ kẹ vwẹ kakakaa,” ọtiọyen Jihova tare.
4 “Kohwo kohwo nomaso kpahen ọrivẹ rọyen,Ovwan tobọ vwẹrosua oniọvo rẹ ovwaan.
Kidie koniọvo koniọvo phiẹn ohwo,Kọrivẹ kọrivẹ miovwo ohwo.
5 Kohwo kohwo ghwa ọrivẹ rọyen ria,O vwo ohwo vuọvo rọ ta uyotaa.
Ayen yono ẹrẹnvwe rayen obo ra vwọrọn efian.
Ayen wian oma bruku rẹ ayen vwo ruẹ obo re chọre.
6 Wo yerẹn vwẹ ohri rẹ ihwo rẹ ophiẹnvwe.
Ayen rhọnvwe riẹn vwẹẹ vwevunrẹ ophiẹnvwe rayen,” ọtiọyen Jihova tare.
7 Ọtiọyena ọnana yen oborẹ Jihova rẹ otuofovwin tare:
“Me cha wran ayen je davwen ayen ni,Kẹ die ọfa yen me sa vwẹ ọmọtẹ rẹ ihwo mẹ vwo ru?
8 Ẹrẹnvwe rayen rọ ta ota rẹ ophiẹnvwe na pha kerẹ odada rọ sua ughwu.
Ọ vwẹ unu rọyen vwọ ta ota rẹ ufuoma kẹ ọrivẹ rọyen,Ẹkẹvuọvo ọ hwa phiyọ hẹrhẹ vwẹ obevun.”
9 “Kẹ o rhe fo nẹ me nọ ayen orhiẹn kpahen erọnvwọn nana?” ọtiọyen Jihova tare.
“O rhe fo nẹ me* reihri kẹ oma mẹ kpahen ẹgborho ọtiọyena?
10 Me cha viẹ ji beroma fikirẹ igbenu naMe cha so une rẹ uvweri fikirẹ asan rẹ eranvwe da sa re odin rẹ aton na,Kidie a torhẹ ayen muotọ, ọtiọyena ohwo vuọvo rha wan vrẹẹ,E rhe nyo edo rẹ ichuruu.
Ephran rẹ idjuvwu na kugbe eranvwe rẹ aghwa na djẹre; a rha mrẹ ayeen.
11 Me cha nẹrhẹ Jerusalẹm dia asan ra ghwẹ ikuta koko, urhuẹn rẹ eranko rẹ aghwa,*Me cha nẹrhẹ irere ri Juda dia ofefe, ohwo vuọvo cha dia evun rayeen.
12 Ono yen vwo aghwanre te ẹdia ro de vwo ẹruọ rẹ ọnana?
Ono yen Jihova ta ota kẹ, ro de ghwoghwo?
Diesorọ a vwọ ghwọrọ otọ na?
Diesorọ a vwọ torhẹ muotọ kerẹ aton,Rẹ ohwo vuọvo gbe wanvrẹẹ?”
13 Jihova da kpahen nẹ: “Kidie ayen sen urhi* re me vwọ kẹ ayen, ayen ru nenee, ayen ji nyupho mẹẹ.
14 Ukperẹ ọtiọyen, ayen ru uyovwin gangan nene ubiudu rayen, ayen ji nene ema ri Bel kirobo rẹ esẹ rayen yono ayen nẹ ayen ru.
15 Ọtiọyena ọnana yen oborẹ Jihova rẹ otuofovwin na, Ọghẹnẹ rẹ Izrẹl tare, ‘Me cha nẹrhẹ ihwo nana re okankọn rọ yara, me je cha nẹrhẹ ayen da ame ra ruanre.
16 Me cha hra ayen nene ohri rẹ ẹgborho rẹ ayen vẹ esẹ rayen riẹnree, mi che ji ọlọkọ nene ayen bẹsiẹ me vwọ ghwọrọ ayen eje re karekare.’
17 Ọnana yen oborẹ Jihova rẹ otuofovwin na tare,‘Roro kpahen obo re phia.
Se eya re sua ine rẹ uvweri na rhe,Rere wo ji ohwo re se eya re tẹn ona rẹ obo ra viẹ na nẹ ayen rhe,
18 Rere ayen brokpakpa kpare une rẹ uvwerhe kẹ avwanre,Rere ẹro rẹ avwanre vwọ djẹ ọkẹre rẹ ameoviẹIphophẹro* rẹ avwanre mi ji su ame prapra.
19 Kidie e nyo edo rẹ uvwerhe vwẹ Zayọn:
“Ni obo ra ghwọrọ avwanre totọ!
Ni oborẹ oma vo avwanre te!
Kidie ayen nẹrhẹ avwanre vrẹn nẹ otọ na, ayen da je guọghọ iwevwin rẹ avwanre.”
20 Ovwan eya na, ovwan nyo ota ri Jihova,
Ovwan vwẹ erhọ rẹ ovwan vwo nyo ota rẹ unu rọyen.
Ovwan yono emetẹ rẹ ovwan uvwerhe nana,Ovwan ji yono ohwohwo une rẹ uvweri nana.
21 Kidie ughwu wan evakpo rẹ avwanre rhe;Ọ ro iwevwin ri kpenu rẹ avwanre ra gbogba riariẹRọ vwọ teyen emọ na hwe vwo nẹ irhuvwun naJe teyen ighene eshare na hwe vwo nẹ ọsuorere na.’
22 Tanẹ, ‘Ọnana yen oborẹ Jihova tare:
“Irivwin rẹ ihwo che she totọ, ayen cha dia kerẹ imaniọ vwẹ aghwa,Kerẹ ekrun rẹ iwiti rẹ ohwo ro vuẹn orhọ ghwe bru kuotọ nu obọ,Ro vwo ohwo vuọvo rọ cha ghwẹ ayen kokoo.”’”
23 Ọnana yen oborẹ Jihova tare:
“E jẹ ọvwaghwanre reyọ aghwanre rọyen vwọ yonmaa;E jẹ ọgba reyọ ẹgba rọyen vwọ yonmaa;E jẹ ọdafe je reyọ efe rọyen vwọ yonmaa.”
24 “Ẹkẹvuọvo e jẹ ohwo rọ yonma reyọ ọnana vwọ yonma:
Nẹ ọyen vughe uvwe, ọyen je riẹn vwẹ,Nẹ mẹvwẹ Jihova, Ohwo ro dje ẹguọnọ ro jẹ rhẹriẹ phia, ro brorhiẹn ọsoso, kugbe ophiọnphiọn vwẹ otọrakpọ na,Kidie erọnvwọn nana yen kẹ vwẹ omavwerhovwẹn,” ọtiọyen Jihova tare.
25 “Nighere! Ẹdẹ cha,” ọtiọyen Jihova tare, “re me cha vwọ nọ kohwo kohwo rọ yanvwere ẹkẹvuọvo jẹ ọ ghene yanvwee orhiẹn,
26 kọyen Ijipt, Juda, Idọm, ihwo rẹ Amọn, Moab, kugbe ihwo eje re brẹ ẹton rẹ ọkọkọ rẹ arhare rayen re dia evunrẹ aton na; kidie ẹgborho na eje yanvweree, uwevwin rẹ Izrẹl eje je yanvwe ubiudu rayeen.”
