Jerimaya 30:1-24
-
Ive rẹ ẹreyọ rhivwin kugbe esivwo (1-24)
30 Ota ro nẹ obọ ri Jihova bru Jerimaya rhe nẹ,
2 “Ọnana yen oborẹ Jihova Ọghẹnẹ rẹ Izrẹl tare, ‘Si eta eje re me ta kẹ wẹ na phiyọ evunrẹ ọbe.
3 Kidie “nighere! ọke cha,” ọtiọyen Jihova tare, “ri mi che vwo koko ihwo mẹ re mu reyọ, Izrẹl kugbe Juda,” ọtiọyen Jihova tare, “me cha reyọ ayen rhivwin rhe otọ re me vwọ kẹ esẹ rayen ride, kẹ ayen cha rhoma dia.”’”
4 Enana yen eta rẹ Jihova ta kẹ Izrẹl kugbe Juda.
5 Ọnana yen oborẹ Jihova tare:
“Avwanre nyo edo rẹ uguegue;Oshọ yen herọ, ufuoma herọọ.
6 Biko, ovwan nọ, sẹ ọshare se vwiẹ.
Kẹ diesorọ me vwọ mrẹ kọshare kọshare rọ goma ro mu abọ kpahen evun* rọyenKerẹ aye rọ chuvwiẹ?
Diesorọ kopharo kopharo vwọ fuan?
7 Okpetu rode kẹ vwẹ! Kidie ẹdẹ yena cha dia brabra.
O che vwo ẹdẹ ọfa rọ họherọọ,Ọ cha dia ọke rẹ ukpokpogho vwọ kẹ Jekọp.
Ẹkẹvuọvo e che sivwon nẹ evun rọyen.”
8 “Vwẹ ẹdẹ yena,” ọtiọyen Jihova rẹ otuofovwin tare, “mi che vwirhin urhekpe na nẹ ohọre wẹn je sanvwe ifi wẹn kpo ẹkẹn ivẹ; erhorha rha cha reyọ vwo ru ọviẹn rayen ọfaa.*
9 Ayen cha ga Jihova Ọghẹnẹ rayen kugbe Devid ovie rayen ri mi che vwo mu kẹ ayen.”
10 “Wẹ, odibo mẹ Jekọp, wọ djoshọọ,” ọtiọyen Jihova tare,“Wo gueguee, E Izrẹl.
Kidie mi che sivwin uwe nẹ asan oshesheri rheMi che sivwin emọ wẹn vwo nẹ otọ re mu ayen ra na.
Jekọp che rhivwin rhe, ọ cha fọ gbiẹi, e ji che kpokpoo,O vwo ohwo vuọvo rọ cha djoshọ mu ayeen.”
11 “Kidie me vẹ owẹ herọ,” ọtiọyen Jihova tare, “ri mi vwo sivwin uwe.
Ẹkẹvuọvo me cha ghwọrọ ẹgborho na eje re me hra ovwan ra na karekare;Ẹkẹvuọvo me cha ghwọrọ owẹẹ.
Me cha vwẹ ọghwọku* ro fori vwọ kẹ wẹ,Mi ji che jẹ oja egbe vwọ kẹ wẹẹ.”
12 Kidie ọnana yen oborẹ Jihova tare:
“O vwo emu vuọvo re che vwo sivwin omaẹwan wẹẹn.
E che se sivwin omaẹwan wẹn kpoo.
13 O vwo ohwo vuọvo rọ cha rẹ kẹ wẹẹ,O vwo idjerhe vuọvo re se vwo sivwin ora wẹn kpoo.
Esivwon herọ vwọ kẹ wẹẹ.
14 Ihwo eje ri vwo ẹguọnọ wẹn kpairoro vrẹ wẹ.
Ayen rha guọnọ owẹ ọfaa.
Kidie uphiaphia rẹ ọvweghrẹn ọyen me vwọ fa wẹ,Kirobo rẹ ohwo rọ djoma gboja kẹ ohwo,Fikirẹ abe wẹn rode kugbe imwemwu wẹn buebun.
15 Diesorọ wọ vwọ viẹ fikirẹ omaẹwan wẹn?
E che se sivwin omaẹwan wẹn kpoo!
Fikirẹ abe wẹn rode kugbe imwemwu wẹn buebunYen nẹrhẹ mi ru we ọtiọna.
16 Ọtiọyena a cha ghwọrọ ihwo eje re ghwọrọ owẹ,E ji che mu ivwighrẹn wẹn eje kpo imu.
A cha kua ekuakua rẹ ihwo re kua wẹ fiotọ,Ke me je cha nẹrhẹ e gborho ihwo eje ri gborho uwe.”
17 “Ẹkẹvuọvo me cha kẹ wẹ omakpokpọ ji sivwin era wẹn kpo,” ọtiọyen Jihova tare,“Dede nẹ ayen se we ọ ra senre:
‘Zayọn, rẹ ohwo vuọvo hiẹ guọnọọ.’”
18 Ọnana yen oborẹ Jihova tare:
“Nighere, mi koko ihwo rẹ itughẹ ri Jekọp re mu kpo imu,Mi che gbe arodọnvwẹ kẹ itabanako rọyen.
A cha rhoma bọn orere na phiyọ enu rẹ ugbenu otete rọyen,A me rha vwẹ uwevwin ro kpenu ra gbogba riariẹ na vwo vi vwẹ asan ro foro.
19 Ayen cha kpẹvwẹ Ọghẹnẹ je hwẹ gangan.
Me cha nẹrhẹ ayen bunphiyọ, ayen cha hanvwee;Me cha nẹrhẹ ayen bun mamọ,*Ayen cha hanvwee.
20 Emọ rọyen cha dia kirobo rẹ ayen hepha jovwo,Mi che ru ọghwẹgbe rayen gan vwẹ obaro mẹ.
Mi che gboja vwọ kẹ ihwo eje ri shenyẹ.
21 Ohri rẹ ihwo rọyen yen ohwo rode na che nurhe,Ohri rọyen yen osun rọyen che nurhe.
Me cha nẹrhẹ o sikẹrẹ ovwẹ, ko che bru vwe rhe.”
“Ọ rha dia ọtiọyeen, ono yen yivwin bru vwe rhe?” ọtiọyen Jihova tare.
22 “Ovwan cha dia ihwo mẹ, ke me cha dia Ọghẹnẹ rẹ ovwan.”
23 Nighere! Odju ọgangan ri Jihova che dju vẹ ophu,Kerẹ odju ro djuẹ riariẹ, o che dju vwẹ enu rẹ uyovwin rẹ irumwemwu na.
24 Ophu ọgangan ri Jihova che fueenBẹsiẹ ro vwo ru obo rehẹ ẹwẹn rọyen gba.
Ovwan che vwo ẹruọ rẹ ọnana vwẹ ẹbẹre rọ koba rẹ ẹdẹ na.
