Jerimaya 17:1-27
17 “Ugbẹn rẹ utehru yen e vwo si umwemwu ri Juda phiyotọ.
Daimọnd yen a vwọ karọ phiyọ ubiudu rayenKugbe idjo rẹ egbada rayen,
2 Emọ rayen roro kpahan egbada rayen kugbe ekpọ rẹ ẹga* rayenRe kẹrẹ urhe rode vwẹ enu rẹ igbenu itete na,
3 Vwẹ enu rẹ igbenu rehẹ aghwa ri rhiephiyọ na.
Me cha nẹrhẹ a ghwẹ ekuakua wẹn, efe wẹn eje reyọ—E, erọnvwọn rehẹ asan ri kpenu wẹn na, fikirẹ imwemwu ru wo ruru vwẹ ekogho wẹn eje.
4 Wọ cha vwẹ ọhọre robọ wẹn vwo siobọnu uku re me vwọ kẹ wẹ.
Me cha nẹrhẹ wọ ga ivwighrẹn wẹn vwẹ otọ ru wọ riẹnree,Me cha vwẹ ophu sa erhanre phiyọ ovwan.*
Erhanre na cha la rhirin bẹdẹ.”
5 Ọnana yen oborẹ Jihova tare:
“Ekan kẹ ohwo rọ vwẹroso ihworakpọ,*Rọ vwẹroso ogangan rẹ ohworakpọ,*Rẹ ubiudu rọyen rhẹriẹ jẹ Jihova vwo.
6 Ọ cha dia kerẹ urhe ro mudia kpogono vwevunrẹ aton.
Ọ cha mrẹ ọke rẹ emu esiri cha vwọ rhee,Ẹkẹvuọvo ọ cha dia otọ ọyaya vwevunrẹ aton na,Vwẹ otọ rẹ ughwanka rẹ ohwo vuọvo cha sa diaa.
7 Ebruba kẹ ohwo* rọ vwẹroso Jihova,Ro mu ẹwẹn rọyen kpahen Jihova.
8 Ọ cha dia kerẹ urhe ra kọn kẹrẹ asan ame,Rẹ awọ rọyen tan ro evunrẹ ivwori.
Uvo da tobọ rhovwan gangan dede, o che nyo vwẹ omaa,Ẹkẹvuọvo ọ cha ghwẹ ẹbe phiyọ ọkieje.
Ọ cha ro ẹnwan vwẹ ukpe rẹ osio vwo jẹ rhọọ,O che jẹ emamọ ẹmọọ.
9 Ubiudu na phiẹn ohwo vwọ vrẹ kemu kemu, ọ bẹn re se vwo suon.*
Ono yen sa riẹn?
10 Mẹvwẹ ri Jihova yen hiẹ ubiudu na,Me fuẹrẹn iroro rẹ obevun* na,Re me vwọ hwosa kẹ ohwo ọvuọvo vwo nene oborẹ idjerhe rọyen hepha,Vwo nene oborẹ iruo rọyen hepha.
11 Kerẹ ọhohowa ro koko ikẹn rọ rhọghọree,Ọtiọyen ohwo rọ ghwẹ efe rẹ ọghware koko hepha.
Efe na cha va abọ vwẹ uherevie rẹ akpeyeren rọyen,Ukuotọ rọyen, ọ me rhe mrẹvughe nẹ ọyen vwo ọhọọ.”
12 Ekete rẹ urinrin ra kpare kpenu vwo nẹ ọtonphiyọ rhe,Yen asan ọfuanfon rẹ avwanre.
13 E Jihova, iphiẹrophiyọ rẹ Izrẹl,Oma cha vo ihwo eje re kpairoro vrẹ wẹ.
E che si edẹ rẹ ihwo re yanjẹ uwe* vwo phiyọ ekpẹn,Kidie ayen kpairoro vrẹ Jihova, esiri rẹ ame rẹ arhọ na.
14 Sivwin uvwe, E Jihova, oma mẹ ko kpo.
Sivwin uvwe, ki mi che sivwin rhọ,Kidie wẹwẹ yen me vwẹ ujiri kẹ.
15 Nighere! Ihwo evo herọ re ta kẹ vwẹ:
“Tivọ yen ota ri Jihova hepha?
Biko e jẹ ọ rhe!”
16 Ẹkẹvuọvo vwọ kẹ vwẹ, me djẹre mi vwo juwe enene kerẹ osuigodẹẹ,Yẹrẹ ki mi rhẹro rẹ ẹdẹ rẹ ukpokpoghoo.
Wọ nabọ riẹn erọnvwọn eje rẹ unu mẹ tare;Eje na phiare vwẹ obaro wẹn!
17 Wọ dia emu rẹ uguegue vwọ kẹ vwẹẹ.
Wẹwẹ yen adjarhọ mẹ vwẹ ọke rẹ okpetu.
18 Jẹ oma vo ihwo ri muẹkpahan ovwẹ,Ẹkẹvuọvo wo jẹ oma vo vwẹẹ.
Jẹ uguegue ro ayen oma,Ẹkẹvuọvo wo juvwe gueguee.
Reyọ okpetu rhe enu rayen,Rere wọ guọghọ ayen je ghwọrọ ayen karekare.*
19 Ọnana yen oborẹ Jihova ta kẹ vwẹ: “Yanran re mudia anurhoro rẹ emọ rẹ ihwo na rẹ ivie ri Juda wan ruọ je wan no, kugbe inurhoro ri Jerusalẹm eje.
20 Ku wọ ta kẹ ayen nẹ, ‘Ovwan nyo ota ri Jihova, ovwan ivie ri Juda, ihwo ri Juda eje, kugbe ihwo eje re dia Jerusalẹm, re wan inurhoro nana ruọ.
21 Ọnana yen oborẹ Jihova tare: “Ovwan jomaotọ, ovwan muẹ oghwa vuọvo vwẹ ẹdẹ Urovwoma na yẹrẹ muo wan inurhoro ri Jerusalẹmuu.
22 Ovwan muẹ oghwa vuọvo vwo nẹ uwevwin rẹ ovwan rua otafe vwẹ ẹdẹ Urovwoma naa; ovwan je wiowian vuọvo kakakaa. Ovwan sẹro rẹ ẹdẹ Urovwoma na fuanfon kirobo ri mi ji iji rọyen kẹ esẹ rẹ ovwan ride.
23 Ẹkẹvuọvo ayen kerhọ yẹrẹ rhie erhọ rayen phiyọọ, ayen ru uyovwin gangan,* ayen rhọnvwe nyẹme yẹrẹ rhiabọreyọ ọghwọkuu.”’
24 “‘“Ẹkẹvuọvo ovwan da nabọ kerhọ mẹ,” ọtiọyen Jihova tare, “rẹ ovwan rhe mu oghwa vuọvo wan inurhoro rẹ orere nana vwẹ ẹdẹ Urovwomaa, rẹ ovwan da sẹro rẹ ẹdẹ Urovwoma na fuanfon, rẹ ovwan rha wiowian vuọvo vwẹ ẹdẹ naa,
25 ọke yena, ivie kugbe isun ri chidia vwẹ enu rẹ ekete ri Devid ke je cha wan inurhoro rẹ orere nana ruọ, rẹ ayen cha vwọ gua ekpẹrẹ kugbe iyesi, te ayen te isun rayen, eshare ri Juda kugbe ihwo re dia Jerusalẹm; ihwo ke cha dia orere nana ọkieje.
26 Ihwo che nẹ irere ri Juda rhe, vwo nẹ asan re riariẹ Jerusalẹm phiyọ rhe, vwo nẹ otọ ri Bẹnjamin rhe, vwo nẹ ekogho rẹ ushekpotọ na rhe, vwo nẹ ekogho rẹ igbenu na rhe, vwo nẹ Nẹgẹb na* rhe, ayen cha ghwẹ izobo rẹ ẹtorhẹ, izobo, izobo rẹ eka, ifrankisẹnsi, kugbe izobo rẹ akpẹvwẹ rhe uwevwin ri Jihova.
27 “‘“Ẹkẹvuọvo ọ da dianẹ ovwan nyẹme mẹẹ re me vwọ tanẹ ovwan sẹro rẹ ẹdẹ Urovwoma na fuanfon, ovwan muẹ eghwaa, ovwan ji muẹ eghwa wan inurhoro ri Jerusalẹm vwẹ ẹdẹ Urovwoma naa, ki mi che phi erhanre phiyọ inurhoro rọyen, kọ cha torhẹ iwevwin ri Jerusalẹm ri kpenu ra gbogba riariẹ, e che fuoon.”’”
Eta rehẹ obotọ na
^ Ni Eta re Vwomaphia.
^ Yẹrẹ ọ sa dia, “Kidie me vwẹ ophu sa erhanre phiyọ ovwan kerẹ erhanre re kokori.”
^ Yẹrẹ “ọgba.”
^ Vwẹ Hibru, “Rọ vwẹ uvwo vwo ru ugbobọ rọyen.”
^ Yẹrẹ “ọgba.”
^ Yẹrẹ ọ sa dia, “e che se sivwoon.”
^ Vwẹ Hibru, “Me fuẹrẹn ibiehun.”
^ Vwẹ Hibru, “uvwe,” o muẹro nẹ Jihova yen ọ ta ota kpahan.
^ Yẹrẹ “ghwọrọ ayen asakuivẹ.”
^ Vwẹ Hibru, “ayen ru ohọre rayen ghọnghọn.”
^ Yẹrẹ “obohwẹre ọnre na.”
