Jerimaya 18:1-23
18 Ọnana yen ota ri Jihova ro bru Jerimaya rhe:
2 “Vrẹn rere wo kpo uwevwin rẹ ọmechẹ na, ke me cha nẹrhẹ wo nyo eta mẹ vwẹ etiyin.”
3 Ọtiọyena mi de kpo uwevwin rẹ ọmechẹ na, me da mrẹ rọ ma ochẹ vwẹ enu rẹ orọnvwọn rọ vwọ ma echẹ na.
4 Ẹkẹvuọvo ochẹ rẹ ọmechẹ na vwẹ ọphiẹn vwọ ma na da guọghọ vwẹ obọ rọyen. Ọtiọyena ọmechẹ na da ma phiyọ orọnvwọn ọfa ro niri nẹ o shephiyọ.
5 Etiyin ota ri Jihova de bru vwe rhe, rọ vwọ ta:
6 “‘Kẹ mi rhe se ru ovwan kirobo rẹ ọmechẹ nana ruru na, E uwevwin rẹ Izrẹl?’ ọtiọyen Jihova tare. ‘Nighere! Kirobo rẹ ọphiẹn hepha vwẹ obọ rẹ ọmechẹ na, ọtiọyen ovwan hepha vwẹ obọ mẹ, E uwevwin rẹ Izrẹl.
7 Kọke kọke me da ta ota kpahen eghwie vẹ ẹguọghọ totọ, kugbe ẹghwọrọ rẹ ẹgborho yẹrẹ uvie,
8 rẹ ẹgborho yena re me ta ota kpahen na da kpairoro vrẹ umiovwo rọyen, ki mi ji che wene ẹwẹn mẹ kpahen okpetu re me guọnọ reyọ cha enu rọyen jovwo na.
9 Kọke kọke me da ta ota kpahen ẹbọn vẹ ẹkọn rẹ ẹgborho yẹrẹ uvie,
10 rẹ ẹgborho na de ru obo re brare vwẹ ẹro mẹ, o rhe nyupho mẹẹ, ki mi che wene ẹwẹn mẹ kpahen emu esiri re me guọnọ ruẹ kẹ jovwo na.’
11 “Asaọkiephana biko, ta kẹ ihwo ri Juda kugbe ihwo re dia Jerusalẹm nẹ, ‘Ọnana yen oborẹ Jihova tare: “Nighere, mi muegbe rẹ okpetu je jiroro rẹ oborẹ mi che vwo gboja kẹ ovwan. Biko ovwan kuomarhẹriẹ vwo nẹ idjerhe rẹ umwemwu rẹ ovwan rere ovwan wene idjerhe rẹ ovwan vẹ irueru rẹ ovwan.”’”
12 Ẹkẹvuọvo ayen da ta: “Kpairoro vrẹ ọyena! Kidie avwanre che ru obo rehẹ ẹwẹn rẹ avwanre, avwanre ọvuọvo che ru udu gangan vwo ru nene obo rehẹ ubiudu umwemwu rọyen.”
13 Ọtiọyena ọnana yen oborẹ Jihova tare:
“Biko ovwan nọ vwẹ ohri rẹ ẹgborho na.
Ono yen nyo oka rẹ emu tiọnana jovwo re?
Ọmọtobẹ rẹ Izrẹl ru orọnvwọn ọvo rọ brare mamọ.
14 Kẹ imicho ri Lẹbanọn wran vwo nẹ eragha rehẹ eghwrọrọ rọyen?
Gbanẹ ame odjidjiro rọ djẹ nẹ asan oshesheri cha yamuẹ?
15 Ẹkẹvuọvo me chọrọ ihwo mẹ ẹro.
Kidie ayen ze izobo* vwọ kẹ orọnvwọn ro fiemu vuọvoo,Ayen nẹrhẹ ihwo kprowọ vwẹ idjerhe rayen, kọyen idjerhe rẹ awanre na,Rere ayen wan idjerhe rẹ obuko ro jẹ dia riẹriẹriẹ* na,
16 Rere o vwo ru otọ rayen phiyọ obo ri muẹ ohwo oshọKugbe obo ra vwẹ fiki rọyen gbe ophiọrọ bẹdẹ.
Kohwo kohwo rọ wanvrẹ che no vẹ oshọ, o mi kpogho uyovwin.
17 Kerẹ odju rẹ ẹbẹre ọnre va nẹcha, me cha hra ayen vwẹ obaro rẹ ọvweghrẹn na.
Mi che chukoku ayen, ayen cha mrẹ opharo mẹ vwẹ ẹdẹ rẹ ukpokpogho rayeen.”
18 Ayen da ta: “Ovwan yanrhe rere a jiroro rẹ umwemwu kpahen Jerimaya, kidie irherẹn rẹ avwanre yen che rhe dje urhi na* kẹ avwanre, egbaghwanre na yen cha rha kẹ avwanre uchebro, emraro na yen che rhe ghwoghwo ota rẹ Ọghẹnẹ vwọ kẹ avwanre. Ovwan yanrhe rere a ta eta ebrabra kpahọn, e jẹ a davwerhọ rẹ obo rọ taa.”
19 E Jihova, davwerhọ mẹ,Rere wọ kerhọ kẹ oborẹ ihwo re vwọso ovwẹ ta.
20 Ofori nẹ a vwẹ umiovwo vwọ hwosa rẹ erhuvwu?
Kidie ayen tọn ọgọdọ vwọ kẹ arhọ* mẹ.
Karophiyọ oborẹ mi mudia obaro wẹn da ta ota esiri kpahen ayen,Rere ophu wo muẹkpahan ayen na vwo fuen.
21 Ọtiọyena jẹ owẹnvwe hwe emeshare rayen,Rere wọ vwẹ ayen kpahotọ vwọ kẹ ọlọkọ.
Jẹ emọ rẹ eya rayen ghwu, jẹ ayen je dia eyauku.
Jẹ ọtiekọ teyen eshare rayen hwe,A me rha vwẹ ọlọkọ teyen ighene eshare rayen hwe vwẹ ofovwin.
22 E jẹ e nyo ukperi rẹ oviẹ vwẹ iwevwin rayenỌke ru wọ da reyọ igborhugborho bru ayen rhe kpregede.
Kidie ayen tọn ọgọdọ rẹ ayen vwo mu vweJe kpahen ufi kẹ vwẹ.
23 Ẹkẹvuọvo wẹwẹ, E Jihova,Nabọ riẹn iroro rẹ umwemwu rayen eje rẹ ayen vwọ teyen ovwẹ hwe.
Wo rhurhu oruchọ rayeen,Wo phoro umwemwu rayen vwo nẹ obaro wẹẹn.
Jẹ ayen kprowọ vwẹ obaro wẹnVwẹ ọke wọ da cha vwẹ ophu gboja kẹ ayen.
