Jerimaya 7:1-34
7 Ọnana yen ota ri Jihova ro bru Jerimaya rhe:
2 “Mudia anurhoro rẹ uwevwin ri Jihova rere wo ghwoghwo ovuẹ nana vwẹ etiyin, ‘Ovwan nyo ota ri Jihova, ovwan ihwo ri Juda eje re wan inurhoro nana ra vwẹ uyovwin kpotọ kẹ Jihova.
3 Ọnana yen oborẹ Jihova rẹ otuofovwin, Ọghẹnẹ rẹ Izrẹl tare: “Ovwan rhuẹrẹ idjerhe rẹ ovwan ji wene uruemu rẹ ovwan, ke me cha vwẹ uphẹn kẹ ovwan nẹ ovwan dia otọ nana.
4 Ovwan vwẹrosua eta rẹ ophiẹnvwee, rẹ ovwan da tanẹ, ‘Ọnana* uwevwin rẹ ẹga ri Jihova, uwevwin rẹ ẹga ri Jihova, uwevwin rẹ ẹga ri Jihova!’
5 Kidie ọ da dianẹ ovwan ghene rhuẹrẹ idjerhe rẹ ovwan ji wene iruemu rẹ ovwan; ọ da dianẹ ovwan ghini brorhiẹn ọsoso vwọ kẹ ohwo kugbe ọrivẹ rọyen;
6 ọ da dianẹ ovwan shenyẹ erhorha re dia otọ naa, emephrorivwin* kugbe eyaukuu; ọ da dianẹ ovwan ku ọbara rẹ ihwo rẹ abọ rayen fonro kuotọ nanaa; ọ da je dianẹ ovwan nene eghẹnẹ efa re cha so omaẹwan vwọ kẹ ovwaan;
7 ọke yena, ke me cha rhọnvwe nẹ ovwan dia otọ nana, otọ re me vwọ kẹ esẹ rẹ ovwan ride nẹ ayen dia ọkieje na.”’”*
8 “Ẹkẹvuọvo ovwan vwẹrosua ota rẹ ophiẹnvwe—o che fierere vuọvo vwọ kẹ ovwaan.
9 Kẹ ovwan se chuji, hwe ihwo, gbe igberadja, duvwun iyorin rẹ efian, ze izobo vwọ* kẹ Bel, ji nene eghẹnẹ rẹ ovwan riẹnree nu,
10 rẹ ovwan da yanrhe rhi mudia obaro mẹ vwẹ uwevwin nana ra vwẹ odẹ mẹ se na je tanẹ, ‘Avwanre che sivwin rhọ,’ dede nẹ ovwan ruẹ emu rẹ ẹgua nana eje na?
11 Kẹ uwevwin nana ra vwẹ odẹ mẹ se na rhi hirhephiyọ unu rẹ iji vwẹ ẹro rẹ ovwan re? Nighere, mẹvwẹ komobọ mrẹrẹ re,” ọtiọyen Jihova tare.
12 “‘Ẹkẹvuọvo asaọkiephana, gba yanran kpo asan ọfuanfon mẹ vwẹ Shailo, asan re me ka nẹrhẹ odẹ mẹ dia rere wọ mrẹ oborẹ mi ruro fikirẹ umiovwo rẹ ihwo mẹ Izrẹl.
13 Ẹkẹvuọvo kẹ ovwan ruẹ erọnvwọn nana eje,’ ọtiọyen Jihova tare, ‘dede nẹ mi dje ota ẹtẹta kẹ ovwan* jẹ ovwan kerhọọ. Mi dje ovwan esese ẹkẹvuọvo ovwan kpahenree.
14 Ọtiọyena mi che ru uwevwin na ra vwẹ odẹ mẹ se rẹ ovwan vwẹrosua na, kugbe asan nana re me vwọ kẹ ovwan kugbe esẹ rẹ ovwan ride na, kirobo ri mi ru Shailo.
15 Me cha djẹ ovwan nẹ obaro mẹ, kirobo re me djẹ iniọvo rẹ ovwan eje, emọ rẹ Ifrem eje nẹ obaro mẹ na.’
16 “Vwọ kẹ wẹ, wọ nẹrhovwo fikirẹ ihwo nanaa. Wo kperẹ phia yẹrẹ nẹrhovwo yẹrẹ rẹ vwẹ fiki rayeen, kidie me cha kerhọ wẹẹ.
17 Wọ mrẹ oborẹ ayen ruẹ vwẹ irere ri Juda kugbe irhuvwun ri Jerusalẹm?
18 Emọ na ghwẹ irhe koko, esẹ na koko erhanre, eya na gbe iflawa rere ayen reyọ vwo ze izobo rẹ ikeki vwọ kẹ Ovie Aye rẹ Odjuvwu* na, ayen ku izobo rẹ udi kuẹ eghẹnẹ efa rẹ ayen vwọ kpara ophu mẹ.
19 ‘Kẹ omẹvwẹ yen ayen wan oma?’* ọtiọyen Jihova tare. ‘Ọ dia oma rayen yen ayen ruẹ, rẹ ayen vwọ phọphọ oma rayen?’
20 Ọtiọyena ọnana yen oborẹ Ọrovwori ro Me Kpenu Jihova tare, ‘Nighere! Mi che ku ophu mẹ kugbe ophu ọgangan mẹ kuotọ nana, ku ohworakpọ kugbe eranvwe, irhe rẹ aghwa kugbe emamọ rẹ otọ na; ọ cha ton, e che fuoon.’
21 “Ọnana yen oborẹ Jihova rẹ otuofovwin Ọghẹnẹ rẹ Izrẹl tare, ‘Ovwan yanran, ovwan vwẹ izobo rẹ ẹtorhẹ rẹ ovwan vwọ ba izobo rẹ ovwan efa, rere ovwan ọvo re uvwo na.
22 Kidie vwẹ ẹdẹ re me reyọ esẹ rẹ ovwan ride vwo nẹ Ijipt, me ta ota kẹ ayen yẹrẹ vwẹ iji kẹ ayen kpahen izobo rẹ ẹtorhẹ vẹ izobo efaa.
23 Ẹkẹvuọvo me vwẹ iji nana vwọ kẹ ayen: “Ovwan nyo urhuru mẹ, ke me cha dia Ọghẹnẹ rẹ ovwan, ovwan me je dia ihwo mẹ. Kẹ ovwan yan vwẹ idjerhe na eje ri mi ji iji rọyen, rere o se vwo yovwin vwọ kẹ ovwan.”’
24 Ẹkẹvuọvo ayen kerhọ yẹrẹ rhie erhọ rayen phiyọọ; ukperẹ ọtiọyen kẹ ayen ruẹ nene iroro* rẹ umwemwu rayen, ayen ru uyovwin gangan yan nene ubiudu rẹ umwemwu rayen, ayen de rhivwin kpuko, ayen yan kpo obaroo,
25 vwo nẹ ẹdẹ rẹ esẹ rẹ ovwan ride vwo vrẹn nẹ otọ rẹ Ijipt rhi te ọke na. Ọtiọyena ke me vwẹ ọkieje vwo jẹ idibo mẹ eje re dia emraro na brẹ ovwan ra, mi dje ayen ejejo kẹdi kẹdẹ.*
26 Ẹkẹvuọvo ayen rhọnvwe kerhọ kẹ vwẹẹ, ayen rhie erhọ rayen phiyọọ. Ukperẹ ọtiọyen ayen de ru uyovwin gangan* ji ru obo re bra vrẹ e rẹ esẹ rayen ride!
27 “Wọ cha ta eta nana eje kẹ ayen, ẹkẹvuọvo ayen cha kerhọ kẹ wẹẹ; wo che se ayen, ẹkẹvuọvo ayen cha kpahen kẹ wẹẹ.
28 Ku wọ ta kẹ ayen nẹ, ‘Ọnana ẹgborho ro nyupho ri Jihova Ọghẹnẹ rayeen, rọ je rhọnvwe rhiabọreyọ ọghwọkuu. O vwo ohwo vuọvo rọ fuevuun, a je tobọ ta ota kpahen evun-ẹfuọn vwẹ ohri rayeen.’*
29 “Bru ẹton wẹn re ji rhi bruu* na rere wo do kufia, so une rẹ uvweri vwẹ enu rẹ igbenu itete rẹ odin vuọvo hephaa na, kidie Jihova sen uvwiẹ nana rọ kpare ophu rọyen na, ọ je cha kpairoro vrẹ.
30 ‘Kidie ihwo ri Juda ru obo re brare vwẹ ẹro mẹ,’ ọtiọyen Jihova tare. ‘Ayen vwẹ edjọ rayen ri tuẹn ohwo oma na vwo vi vwevunrẹ uwevwin ra vwẹ odẹ mẹ se na rere ayen vwo gbe ẹgua.
31 Ayen bọn asan ri kpenu ri Tofẹt rọhẹ Iyara rẹ Ọmọ ri Hinọm,* rere ayen sa vwọ torhẹ emeshare rayen kugbe emetẹ rayen vwevunrẹ erhanre, orọnvwọn ri mi ji iji rọyeen, rọ je rhe tobọ rhe ẹwẹn* mẹ dẹvoo.’
32 “‘Ọtiọyena nighere! ọke cha,’ ọtiọyen Jihova tare, ‘re che vwo je se Tofẹt yẹrẹ Iyara rẹ Ọmọ ri Hinọm,* ẹkẹvuọvo Iyara rẹ Ihwehwe. Ayen che shi ihwo phiyọ Tofẹt te ẹdia rẹ o rhe che vwo asan vuọvo ro chekọọ.
33 Irivwin rẹ ihwo nana ke cha dia emuọre vwọ kẹ ephran rẹ idjuvwu na kugbe eranvwe rẹ otọ na, o vwo ohwo vuọvo rọ cha djẹ ayeen.
34 Mi che phioba phiyọ edo rẹ omavwerhovwẹn kugbe edo rẹ aghọghọ, urhuru rẹ ọshare ọpha kugbe urhuru rẹ ọpha vwevunrẹ irere ri Juda kugbe vwẹ irhuvwun ri Jerusalẹm, kidie a cha ghwọrọ otọ na eje karekare.’”
Eta rehẹ obotọ na
^ Vwẹ Hibru, “Ayen,” ọ ta ota kpahan iwevwin eje ra bọn kugbe uwevwin rẹ ẹga na.
^ Yẹrẹ “emọ ri jẹ esẹ evwo.”
^ Yẹrẹ “dia vwo nẹ bẹdẹ ra ro bẹdẹ.”
^ Yẹrẹ “nẹrhẹ ivwirhi rẹ izobo bru kpenu.”
^ Vwẹ Hibru, “mi vrẹn edegburhiọke je ta ota kẹ ovwan.”
^ Odova rẹ ọghẹnẹ rẹ aye rẹ ihwo rẹ Izrẹl ri chukoku Ọghẹnẹ gare; ọ sa dianẹ ayen vwo imuẹro nẹ ọyen ọghẹnẹ rẹ aye rọ nẹrhẹ a sa mrevun.
^ Yẹrẹ “ayen gbekuẹ; ayen kpara ophu.”
^ Yẹrẹ “iroroẹjẹ.”
^ Vwẹ Hibru, “mi vrẹn edegburhiọke kẹdi kẹdẹ ji ji ayen.”
^ Vwẹ Hibru, “ayen de ru ohọre rayen ghọnghọn.”
^ Vwẹ Hibru, “e ji bro kufia nẹ ugbunu rayen.”
^ Yẹrẹ “wẹn ra vwọ kpahotọ.”
^ Ni Eta re Vwomaphia, “Gehina.”
^ Vwẹ Hibru, “tobọ ro ubiudu.”
^ Ni Eta re Vwomaphia, “Gehina.”
