Jerimaya 51:1-64
51 Ọnana yen oborẹ Jihova tare:
“Nighere me reyọ odju rẹ oghwọrọ ọvo chaVwọso Babilọn kugbe ihwo re dia Lẹb-kemai.*
2 Mi che ji ihwo re frẹ ibi ekankọn kpo Babilọn,Ayen cha frẹ ji ru otọ rọyen phiyọ ofefe;Ayen che nẹ kẹbẹre kẹbẹre eje rhe rhe vwọsuọ vwẹ ẹdẹ rẹ okpetu na.
3 E jẹ ohwo rọ sa umurhabọ nuẹ umurhabọ rọyeen.
E ji jẹ ohwo vuọvo ro ku ewun rẹ utehru* phiyọ vrẹn muẹdiaa.
Wọ ria ehrọre rẹ ighene eshare rọyeen.
Ghwọrọ otuofovwin rọyen eje.
4 Ayen che she teyen otọ vwẹ otọ rẹ ihwo ri Kaldia na,Vẹ oma rayen re duvwun fi vwẹ irhuvwun rọyen.
5 Kidie Jihova rẹ otuofovwin, Ọghẹnẹ rẹ Izrẹl kugbe Juda yanjẹ ayen vwoo.
Ẹkẹvuọvo otọ rayen* vọnre vẹ abe vwẹ ẹro rẹ Ohwo Ọfuanfon rẹ Izrẹl na.
6 Ovwan djẹ vwo nẹ ohri ri Babilọn,Djẹ fikirẹ arhọ* rẹ ovwan.
Ovwan ghwọrọ fikirẹ oruchọ rọyeen.
Kidie ọnana ọke rẹ ihriẹriọ ri Jihova.
Ọ hwosa rẹ obo ro ruru vwọ kẹ.
7 Babilọn uko rẹ oro vwẹ obọ ri Jihova jovwo;Ọ nẹrhẹ udi mu otọrakpọ na eje.
Ẹgborho na da vwẹ iwaini rọyen;Kọyensorọ ẹgborho na vwọ mwa orhuẹ.
8 Babilọn sheri ji vwirhin siẹvuọvo.
Ovwan vwerhe oma fiki rọyen!
Ovwan vwẹ balsam vwọ kẹ fikirẹ omiamiavwe rọyen; ọkiọvo e se sivwon.”
9 “Avwanre davwẹngba re vwo sivwin Babilọn, ẹkẹvuọvo e se sivwoon.
Yan jovwo rere a yanran kpo dohwo dotọ rọyen.
Kidie ẹdjọeguo rọyen te idjuvwu na re;O kpenu kerẹ evwru na.
10 Jihova brorhiẹn ọsoso kẹ avwanre re.
Yanrhe, e jẹ avwanre gbikun rẹ iruo ri Jihova Ọghẹnẹ rẹ avwanre vwẹ Zayọn.”
11 “Ovwan lọ edada na; ovwan mu ekpọfia re pha ghorien ghorien na.*
Jihova kpare ẹwẹn rẹ ivie rẹ ihwo ri Midia,Kidie ọ guọnọ ghwọrọ Babilọn.
Kidie ọnana ihriẹriọ ri Jihova, ihriẹriọ fikirẹ uwevwin rẹ ẹga rọyen.
12 Kpare oka* kpenu vwọso igbẹhẹ ri Babilọn.
Ru ihwo re rhẹrẹ na gan, phi ihwo re rhẹrẹ phiyọ ẹdia rayen.
Muegbe rẹ ihwo re hwa phiyọ na.
Kidie Jihova jiroro na nure,O che ru obo ro veri kpahen ihwo re dia Babilọn gba.”
13 “E aye rọ dia enu rẹ ame buebun,Vẹ efe buebun na,Oba wẹn vẹ erere rẹ ọghware wẹn na rhire.
14 Jihova rẹ otuofovwin vwẹ oma rọyen duvwun iyorin nure nẹ,‘Me cha ghwẹ eshare vọn evun wẹn, ayen cha dia buebun kerẹ igurube,Ayen che kperi ukperi rẹ ophikparobọ fiki wẹn.’
15 Ọyen yen Ohwo rọ vwẹ ogangan rọyen vwọ ma otọrakpọ na,Ohwo rọ vwẹ aghwanre rọyen vwọ ma otọ naJe vwẹ ẹruọ rọyen vwọ riẹn idjuvwu na phiyọ.
16 Ọke rọ da van,Ame rẹ idjuvwu na ki kpogho,Ọ nẹrhẹ evwru nẹ oba rẹ akpọ na kpenu.
Ọ nẹrhẹ enu nyavwaro ọke rẹ osio da rhọ,Ọ je reyọ odju vwo nẹ iwevwin rọ sẹro rẹ ẹkuakua phiyọ cha.
17 Kohwo kohwo ruẹ kerẹ ohwo ro vwo iroro vẹ erianriẹẹn.
A cha nẹrhẹ oma vo kodjogun kodjogun fikirẹ ema ra kare na;Kidie ema rẹ utehru rọyen* ophiẹnvwe,Ẹwẹn* hẹ evun rayeen.
18 Ayen emu ifefe,* iruo rẹ ehwẹjẹ.
Ẹdẹ rẹ ẹdjọeguo rayen de te, ayen cha ghwọrọ kufia.
19 Ẹkẹn ri Jekọp họhọ erọnvwọn nanaa,Kidie ọyen yen Ohwo rọ ma erọnvwọn eje,Tobọ te ọkpọ rẹ uku rọyen dede.
Jihova rẹ otuofovwin yen odẹ rọyen.”
20 “Wẹwẹ ubiurhe rẹ ofovwin vwọ kẹ vwẹ, ekuakua ofovwin,Kidie me cha reyọ owẹ vwọ fa ẹgborho na guọghọ.
Me cha reyọ owẹ vwọ ghwọrọ uvie sansan.
21 Me cha reyọ owẹ vwọ fa iyesi na vẹ ọ rọ gua hwe.
Me cha reyọ owẹ vwọ fa akpẹrẹ na vẹ ọ rọ gua hwe.
22 Me cha reyọ owẹ vwọ fa ọshare vẹ aye hwe.
Me cha reyọ owẹ vwọ fa ọmare ọshare vẹ ọmọshare hwe.
Me cha reyọ owẹ vwọ fa eghene ọshare vẹ aye hwe.
23 Me cha reyọ owẹ vwọ fa osuigodẹ vẹ uchuru rọyen hwe.
Me cha reyọ owẹ vwọ fa ọghwẹrẹ vẹ ẹko rẹ eranvwe rọyen hwe.
Me cha reyọ owẹ vwọ fa isun kugbe ichabọ rẹ isun hwe.
24 Me cha hwosa kẹ Babilọn kugbe ihwo eje re dia KaldiaFikirẹ umiovwo eje rẹ ayen ruru vwẹ Zayọn vwẹ irharo wẹn,” ọtiọyen Jihova tare.
25 “Nighere me vwọso owẹ, E ugbenu rọ ghwọrọ na,” ọtiọyen Jihova tare,“Wẹwẹ rọ ghwọrọ otọrakpọ na ejobi na.
Me cha riẹn obọ mẹ phia vwọso owẹ ji genre uwe she vwo nẹ enu rẹ eragha naKe me cha nẹrhẹ wọ dia ugbenu rọ torhẹre.”
26 “Ihwo cha reyọ ukuta rẹ ubienyẹ yẹrẹ ukuta rẹ uchivwo vwo mie wee,Kidie wọ cha dia obo ra ghwọrọre bẹdẹ,” ọtiọyen Jihova tare.
27 “Kpare oka* ọvo kpenu vwẹ otọ na.
Hworo ọgban vwẹ ohri rẹ ẹgborho na.
Vwẹ ẹgborho vwo mu vwọsuọ.
Se uvie rẹ Ararat, Minai, kugbe Ashkinaz vwọsuọ.
Vwẹ isodje rọ reyọ ihwo phiyọ iruo rẹ isodje vwo mu vwọsuọ.
Jẹ iyesi buebun djẹ rhe kerẹ igurube itete re ghwiẹ gbidigbidi.
28 Reyọ ẹgborho na,Ivie ri Midia, isun rọyen kugbe ichabọ rẹ isun rọyen ejeVẹ etọ na eje rẹ ayen suẹn na vwo mu vwọsuọ.
29 Otọrakpọ na che kpogho je phariẹ,Kidie iroro rẹ Jihova jẹ kpahen Babilọn che rugbaRo vwo ru otọ ri Babilọn phiyọ obo ri muẹ ohwo oshọ, ohwo vuọvo cha dia evun rọyeen.
30 Egba ofovwin ri Babilọn rha họnraa.
Ayen chidia asan ọgangan rayen.
Ayen rhe vwo ogangaan.
Ayen rhe dia kerẹ eya re.
E phi erhanre phiyọ iwevwin rọyen.
E vwirhin irhe ra vwọ kanra ẹchẹ rọyen.
31 Ọdjonẹ ọvo djẹ ra vwa ọdjonẹ ọfa,Ikọn ọvo ra vwa ikọn ọfa,Rẹ ayen vwọ niyẹnrẹn kẹ ovie ri Babilọn nẹ e phi orere rọyen kparobọ re vwẹ kẹbẹre kẹbẹre,
32 Nẹ a reyọ asan ra sa vwẹ owọ shue na re,Nẹ a vwẹ erhanre torhẹ ekọ ri papairọs na re,Nẹ oshọ ji muẹ isodje na.”
33 Kidie ọnana yen oborẹ Jihova rẹ otuofovwin, Ọghẹnẹ rẹ Izrẹl tare:
“Ọmọtẹ ri Babilọn pha kerẹ asan re de wonro ibi ekankọn.
Ọke ra cha vwọ vwẹ ogangan chiyon rere o dje muotọ te re.
Chekemerha ọke rẹ orhọ rọyen ko che te.”
34 “Ovie Nẹbukadnẹza* ri Babilọn mu vwe rọ;Ọ so oyanghan vwọ kẹ vwẹ.
O mu vwe phiyotọ kerẹ ochẹ ofefe.
Ọ rọ vwẹ kerẹ ọrọdekọ rode;Ọ re erọnvwọn iyoyovwin mẹ vọn evun.
Ọ ghworiẹ ovwẹ kufia.
35 ‘E jẹ ozighi ri mi rhiẹromrẹ rhe enu ri Babilọn!’ ọtiọyen ohwo rọ dia Zayọn na tare.
‘E jẹ ọbara mẹ dia enu rẹ ihwo re dia Kaldia!’ ọtiọyen Jerusalẹm tare.”
36 Ọtiọyena ọnana yen oborẹ Jihova tare:
“Nighere mi nenesi rẹ ẹdjọ rẹ ovwan,Me cha reihri fikirẹ ovwan.
Me cha nẹrhẹ ame rẹ abadi na kpọ je nẹrhẹ erhare rọyen kpọ yamu.
37 Babilọn ko che hirhephiyọ asan ra ghwẹ ikuta koko,Urhuẹn rẹ eranko rẹ aghwa,Obo ri muẹ ohwo oshọ kugbe obo ra vwẹ fiki rọyen gbe ophiọrọ,Ohwo vuọvo cha dia evun rọyeen.
38 Ayen eje cha guan kerẹ ikpohrokpo itete.*
Ayen cha guan kerẹ emọ rẹ ikpohrokpo.”
39 “Ọke rẹ urhurusivwe rẹ ayen vwọ re orẹ da gan mamọ re, ki mi che mu udemu phiyotọ kẹ ayen je nẹrhẹ ayen da udi vroma,Rere ayen sa vwọ kparoma kpenu;Ọke yena, kẹ ayen cha vwerhẹn ovwerhẹn ri bẹdẹ,Ovwerhẹn rẹ ayen che vrẹn nuu,” ọtiọyen Jihova tare.
40 “Me cha reyọ ayen yanran kerẹ imigodẹ re muẹ kpo asan re de hwe eranvwe,Kerẹ egbon vẹ ẹvwe.”
41 “Gbe ni obo re phi Shishak* kparobọ,Obo ra reyọ Ujiri rẹ otọrakpọ na ejobi!
Oborẹ Babilọn rhi hirhephiyọ obo ri muẹ ohwo oshọ vwẹ ohri rẹ ẹgborho na!
42 Abadi na rhurhu Babilọn re.
Ọgbogho rọyen rọ pha buebun na rhurhiro muotọ.
43 Irere rọyen hirhephiyọ obo ri muẹ ohwo oshọ, otọ ro vwo amee kugbe aton.
Otọ rẹ ohwo vuọvo cha diaa, rẹ ohwo vuọvo je cha wanvrẹẹ.
44 Mi che gboja kẹ Bẹl vwẹ Babilọn,Me cha reyọ obo ro murọ na nẹ unu rọyen rhe.
Ẹgborho rhe che rhurie bro ra ọfaa,Igbẹhẹ ri Babilọn che she.
45 Ovwan vrẹn nẹ evun rọyen, ihwo mẹ!
Ovwan djẹ fikirẹ arhọ* rẹ ovwan, kidie ophu muvwe ri Jihova gangan!
46 Ovwan jẹ udu nẹ ovwan awọ yẹrẹ djoshọ fikirẹ iyẹnrẹn rẹ ovwan che nyo vwẹ otọ naa.
Vwẹ ukpe ọvo ovwan che nyo iyẹnrẹn,Vwẹ ukpe rọ vwọ kpahọn, ovwan che nyo iyẹnrẹn ọfa,Iyẹnrẹn rẹ ozighi vwẹ otọ na kugbe ọ rẹ osun rọ vwọso osun.
47 Ọtiọyena nighere! ọke chaRe me cha vwọ ghwọrọ ema ri Babilọn ra kare.
A cha nẹrhẹ oma vo etọ rọyen eje,Ihwo rọyen eje ra teyen hwe che she teyen otọ vwẹ ohri rọyen.
48 Idjuvwu na vẹ otọrakpọ na kugbe erọnvwọn eje rehẹ evun rayenChe kperi ukperi rẹ aghọghọ fikirẹ Babilọn,Kidie ihwo re ghwọrọ na che nẹ obohwẹre ọnre bro rhe,” ọtiọyen Jihova tare.
49 “Ọ dia ihwo rẹ Izrẹl ọvo yen Babilọn teyen hweeẸkẹvuọvo ọ je teyen ihwo rehẹ otọrakpọ na ejobi hwe vwẹ Babilọn.
50 Ovwan re vabọ rẹ ọlọkọ na, ovwan rha djẹ yanran, ovwan muẹdiaa!
Ovwan karophiyọ Jihova vwo nẹ asan oshesheri rhe,Ovwan mi ji rhe roro kpahan Jerusalẹm.”
51 “A nẹrhẹ oma vo avwanre kidie avwanre nyo eta rẹ ehwẹjẹ.
Ophọphọvwe rhurhu opharo rẹ avwanre,Kidie erhorha rhe vwọso asan efuanfon rẹ uwevwin ri Jihova na.”
52 “Ọtiọyena nighere! ọke cha,” ọtiọyen Jihova tare,“Re me cha vwọ ghwọrọ ema rọyen ra kare,Ihwo ra wanre oma cha guan vwẹ otọ rọyen eje.”
53 “Ọ da tobọ dianẹ Babilọn yerin kpo idjuvwu na dede,Ọ da tobọ dianẹ ọ gbogba riariẹ asan ọgangan rọyen ri kpenu na dede,Obọ mẹ yen ihwo re cha ghwọrọ che nurhe,” ọtiọyen Jihova tare.
54 “Kerhọ! Ukperi rẹ oviẹ ọvo nẹ Babilọn cha,Edo rẹ okpetu rode ọvo do nẹ otọ rẹ ihwo ri Kaldia na cha,
55 Kidie Jihova ghwọrọ Babilọn,Ọ cha nẹrhẹ urhuru rọyen rode na fọ,Ọgbogho rayen che do kerẹ ame buebun.
E che nyo edo rẹ urhuru rayen.
56 Kidie ọ rọ ghwọrọ na cha rhe enu ri Babilọn;E che mu egba ofovwin rọyen,A cha guọghọ umurhabọ rayen,Kidie Jihova ọyen Ọghẹnẹ rọ hwosa.
O che jẹ osa ẹhwaa.
57 Me cha nẹrhẹ udi mu isun rọyen kugbe egbaghwanre rọyen,Isun rọyen vẹ ichabọ rẹ isun rọyen kugbe egba ofovwin rọyen,Kẹ ayen cha vwerhẹn ovwerhẹn ri bẹdẹ,Ovwerhẹn rẹ ayen che vrẹn nuu,” ọtiọyen Ovie na rẹ odẹ rọyen dia Jihova rẹ otuofovwi na tare.
58 Ọnana yen oborẹ Jihova rẹ otuofovwin tare:
“Dede nẹ igbẹhẹ ri Babilọn rhoro, e che kporon totọ,Dede nẹ inurhoro rọyen kpenu, e che phi erhanre phiyọ ayen.
Ihwo na cha lagha oma kufia;Oma che bru ẹgborho na ku rẹ ayen vwo koko erhanre phiyọ na.”
59 Ọnana yen ota rẹ Jerimaya ọmraro na ji iji rọyen kẹ Sẹraya ọmọ ri Neraya ọmọ ri Masaya vwẹ ọke ro vwo nene Ovie Zẹdikaya ri Juda kpo Babilọn vwẹ ukpe rẹne rẹ usuon rọyen; Sẹraya yen ohwo rọ vwẹrote ekuakua rẹ ovie na.
60 Jerimaya si okpetu eje re cha rhe enu ri Babilọn phiyọ ọbe ọvo, kọyen eta nana eje re si kpahen Babilọn na.
61 Kpobarophiyọ, Jerimaya da ta kẹ Sẹraya: “Ọke wo de te Babilọn ji rhiẹromrẹ nu, gbe se eta nana eje phia gorigori.
62 Wo de ru ọyena nu, gba tanẹ, ‘E Jihova, wọ ta kpahen etinẹ na nẹ a cha ghwọrọ, ohworakpọ yẹrẹ eranvwe rha cha dia evun rọyeen, nẹ o che hirhephiyọ asan ofefe rhirin bẹdẹ.’
63 Ọke wo de se ọbe nana nu, gba gba ukuta sio rere wo do phiyọ uherevie rẹ Urhie ri Yufretis na.
64 Wo de ru ọyena nu, gba tanẹ, ‘Enẹ yen Babilọn che divwin, o rhe che vrẹn ọfaa fikirẹ okpetu re me reyọ cha enu rọyen na; oma kọ cha ghwọrọ ayen.’”
Etinẹ yen eta ri Jerimaya de vwoba.
Eta rehẹ obotọ na
^ Ọ họhọre nẹ ọnana odẹ ọfa re vwo se Kaldia rere ihwo vwo jẹ riẹn nẹ ọyen yen e se.
^ Ọ họhọre nẹ imibro utehru re pha kerẹ esẹn rẹ erin ra rhuọn kugbe yen e vwo ru ewun na.
^ Kọyen, otọ rẹ ihwo ri Kaldia na.
^ Yẹrẹ “erhi.”
^ Yẹrẹ ọ sa dia, “ovwan ghwẹ ekpu rẹ edada rẹ ovwan vọn.”
^ Yẹrẹ “Kpare ọkpọ rẹ oka.”
^ Yẹrẹ “ema rọyen ra vwẹ erọnvwọn ra wranre vwo ru.”
^ Yẹrẹ “Odju.”
^ Yẹrẹ “odiodi.”
^ Yẹrẹ “Kpare ọkpọ rẹ oka.”
^ Vwẹ Hibru, “Nẹbukadrẹza,” idjerhe ọfa re vwo sio.
^ Yẹrẹ “kerẹ emọ rẹ ikpohrokpo ri vwo ẹton ohọre.”
^ Ọ họhọre nẹ ọnana odẹ ọfa re vwo se Bebẹl (Babilọn) rere ihwo vwo jẹ riẹn nẹ ọyen yen e se.
^ Yẹrẹ “erhi.”
