Jerimaya 25:1-38
25 Ota rẹ Ọghẹnẹ vwọ kẹ Jerimaya kpahen ihwo ri Juda eje vwẹ ukpe rẹne ri Jehoyakim ọmọ ri Josaya, ovie ri Juda rọ dia ukpe rẹsosuọ rẹ Ovie Nẹbukadnẹza* ri Babilọn.
2 Ọnana yen oborẹ Jerimaya ọmraro na ta kpahen* ihwo ri Juda eje kugbe ihwo eje re dia Jerusalẹm:
3 “Vwo nẹ ukpe rẹ 13 ri Josaya ọmọ rẹ Emọn, ovie ri Juda rhi te ọke na, etiyin ikpe 23 yen ota ri Jihova vwo bru vwe cha re, mi ji dje ovwan ẹvuẹvuẹ* ẹkẹvuọvo ovwan kerhọọ.
4 Jihova ji idibo rọyen eje emraro na bru ovwan rhe, o dje ayen ejejo,* ẹkẹvuọvo ovwan kerhọ yẹrẹ phi erhọ phiyotọ rere ovwan nyoo.
5 Kẹ ayen ta, ‘Biko ovwan ọvuọvo kuomarhẹriẹ vwo nẹ idjerhe umwemwu rẹ ovwan kugbe irueru rẹ umwemwu rẹ ovwan; ọke yena kẹ ovwan cha dia otọ rẹ Jihova vwọ kẹ ovwan kugbe esẹ rẹ ovwan ride vwẹ ọke grongron re na rhirin bẹdẹ.
6 Ovwan nene eghẹnẹ efa, vwẹ ẹga kẹ ayen, je vwẹ uyovwin kpotọ kẹ ayeen, ovwan vwẹ iruo rẹ obọ rẹ ovwan vwọ kpara ovwẹ ophuu; ọ rha dia ọtiọyeen me cha ghwa okpetu rhe enu rẹ ovwan.’
7 “‘Ẹkẹvuọvo ovwan kerhọ mẹẹ,’ ọtiọyen Jihova tare. ‘Ukperẹ ọtiọyen ovwan vwẹ iruo robọ rẹ ovwan vwọ kpare ovwẹ ophu, kọyensorọ mi vwo gboja kẹ ovwan.’
8 “Ọtiọyena ọnana yen oborẹ Jihova rẹ otuofovwin na tare, ‘“Kidie nẹ ovwan muọghọ kẹ ota mẹẹ na,
9 me vwẹ ovuẹ rhe erua eje rẹ obohwẹre ọnre na,” ọtiọyen Jihova tare, “mi se Ovie Nẹbukadnẹza* ri Babilọn odibo mẹ, ke me cha reyọ ayen rhe rhe vwọso otọ nana, vwọso ihwo re dia evun rọyen kugbe ẹgborho eje re riarierẹ phiyọ. Me cha vwẹ ayen kpahotọ vwọ kẹ oghwọrọ je nẹrhẹ ayen dia obo ri muẹ ohwo oshọ kugbe orọnvwọn ra cha vwẹ fiki rọyen gbe ophiọrọ kugbe oghwọrọ ri bẹdẹ.
10 Mi che phioba phiyọ edo rẹ omavwerhovwẹn kugbe edo rẹ aghọghọ rayen, urhuru rẹ ọshare ọpha kugbe urhuru rẹ ọpha, edo rẹ ukuta robọ ra vwọ lọ erọnvwọn kugbe elo rẹ urhukpẹ.
11 A cha ghwọrọ otọ nana karekare ji hirhephiyọ obo ri muẹ ohwo oshọ, ẹgborho nana ke cha ga ovie ri Babilọn ẹgbukpe 70.”’
12 “‘Ẹkẹvuọvo ọke rẹ ikpe 70 na da gba nu, ke me cha vwẹ ovie ri Babilọn kugbe ẹgborho yena vwo guẹdjọ fikirẹ oruchọ rayen,’ ọtiọyen Jihova tare, ‘me cha nẹrhẹ otọ rẹ ihwo ri Kaldia na dia ofefe bẹdẹ.
13 Me cha nẹrhẹ eta eje re me ta kpahọn, erọnvwọn eje re si phiyọ ọbe nana rẹ Jerimaya mraro rọyen kpahen ẹgborho na eje rugba kpahen otọ yena.
14 Kidie ẹgborho buebun kugbe ivie ride cha vwẹ ayen vwo ru eviẹn, me cha hwosa kẹ ayen vwo nene irueru rayen kugbe iruo rẹ abọ rayen.’”
15 Kidie ọnana yen oborẹ Jihova Ọghẹnẹ rẹ Izrẹl ta kẹ vwẹ: “Reyọ uko rẹ iwaini rẹ ophu nana nẹ obọ mẹ, rere wọ nẹrhẹ ẹgborho eje ri mi ji we brẹ ra na da.
16 Ayen cha da, gele, ji ru kerẹ erhuẹ fikirẹ ọlọkọ ri mi jẹ rua ohri rayen na.”
17 Ọtiọyena me da reyọ uko na nẹ obọ ri Jihova je nẹrhẹ ẹgborho na eje ri Jihova ji vwe bru ra na da:
18 me da tonphiyọ vẹ Jerusalẹm kugbe irere ri Juda, ivie rọyen kugbe isun rọyen, mi vwo ru ayen phiyọ obo ra ghwọrọre, obo ri muẹ ohwo oshọ, orọnvwọn ra vwẹ fiki rọyen gbe ophiọrọ kugbe ekan kirobo rọ hepha nonẹna;
19 ọyena vwọ wan nu, me da vwọ kẹ Fero ovie rẹ Ijipt kugbe idibo rọyen, isun rọyen, ihwo rọyen eje,
20 kugbe erhorha eje re dia ohri rayen; ivie rẹ otọ rẹ Ọz eje; ivie eje rẹ otọ rẹ ihwo ri Filistia, Ashkẹlọn, Gaza, Ẹkrọn, kugbe ihwo ri Ashdọd ri chekọ;
21 Idọm, Moab, kugbe ihwo rẹ Amọn;
22 ivie ri Taya eje, ivie ri Saidọn eje, kugbe ivie rẹ otọ rẹ ame riariẹ phiyọ rọ kẹrẹ abadi na;
23 Didan, Tima, Bọz, kugbe ihwo eje re brẹ ẹton rẹ ọkọkọ rẹ arhare rayen;
24 ivie rẹ ihwo rẹ Arebia eje kugbe ivie rẹ erhorha na eje re dia evunrẹ aton na;
25 ivie ri Zimrai eje, ivie rẹ Ilam eje, kugbe ivie rẹ ihwo ri Midia;
26 ivie rẹ obohwẹre ọnre na eje, te e re kẹrẹre te i ri shereri, ohwohwo kpahen ohwo, kugbe uvie efa sansan rẹ akpọ na eje; ovie ri Shishak* kọyen cha da siẹrẹ ayen da da nu.
27 “Ku wọ ta kẹ ayen nẹ, ‘Ọnana yen oborẹ Jihova rẹ otuofovwin, Ọghẹnẹ rẹ Izrẹl tare: “Ovwan da udi vroma rere ovwan gerin ji she rẹ ovwan vwo jẹ ese vrẹn fikirẹ ọlọkọ ri mi jẹ rua ohri rẹ ovwan na.”’
28 Ọ da dianẹ ayen rhọnvwe reyọ uko na nẹ obọ wẹn rẹ ayen da daa, gba ta kẹ ayen nẹ, ‘Ọnana yen oborẹ Jihova rẹ otuofovwin na tare: “Ovwan che jẹ daa!
29 Kidie nighere! ọ da dianẹ orere ra vwẹ odẹ mẹ se kọyen me ka ghwa okpetu rhe, kẹ ovwan yen e che jẹ oja egbe kẹ?”’
“‘E che jẹ oja egbe vwọ kẹ ovwaan, kidie mi jẹ ọlọkọ vwọsua ihwo re dia akpọ na eje,’ ọtiọyen Jihova rẹ otuofovwin na tare.
30 “Ku wọ mraro rẹ eta nana eje vwọ kẹ ayen je ta kẹ ayen nẹ,‘Jihova cha van vwo nẹ obenu rhe,Ọ cha nẹrhẹ e nyo urhuru rọyen vwo nẹ asan ọfuanfon rọ dia na rhe.
Ọ cha van gangan vwọso asan rọ dia.
Ọ cha so une kerẹ ihwo ri chiyẹn igrepu vwẹ asan re de mie iwaini,Ọ cha so une rẹ ophikparobọ vwọso ihwo eje re dia akpọ na.’
31 ‘Edo ọvo che do re te oba rẹ akpọ na,Kidie Jihova vẹ ẹgborho na vwo ẹdjọ.
Ọyen komobọ che guẹdjọ rẹ ihworakpọ eje.
Ọ cha vwẹ ọlọkọ vwọ teyen irumwemwu na hwe,’ ọtiọyen Jihova tare.
32 Ọnana yen oborẹ Jihova rẹ otuofovwin tare:
‘Nighere! Okpetu ọvo hrabọ vwo nẹ ẹgborho vwo kpo ẹgborho,E che siobọnu odju ọgangan vwo nẹ ẹbẹre ri me sheri rẹ akpọ na rhe.
33 “‘Ihwo rẹ Jihova cha teyen hwe vwẹ ẹdẹ yena che nẹ oba rẹ ẹbẹre ọvo rẹ akpọ na re te oba rẹ ẹbẹre ro chekọ rẹ akpọ na. E che vwere ayeen, a cha ghwẹ ayen koko yẹrẹ shi ayeen. Ayen cha dia kerẹ imaniọ* vwẹ otọ na.’
34 Vwerhe oma ovwan isuigodẹ rere ovwan kperi!
Ovwan gbune vwevunrẹ ekpẹn, ovwan ihwo ride rẹ uchuru na,Kidie ọke re che vwo hwe ovwan je hra ovwan tere,Ovwan che she kerẹ ochẹ ọghanghanre!
35 Isuigodẹ na vwo asan vuọvo rẹ ayen cha djẹ raa,Ihwo ride rẹ uchuru na je cha sa djẹ vabọọ.
36 Kerhọ! Ukperi rẹ isuigodẹ naKugbe omaevwerhe rẹ ihwo ride rẹ uchuru na,Kidie Jihova guọghọ asan rẹ igodẹ rayen da ria odin.
37 Obo ri vwo arhọ gbe dia asan ri fuoma na ọfaaFikirẹ ophu ọgangan ri Jihova.
38 O vrẹn nẹ asan rọ dia re kerẹ ọmọ rẹ okpohrokpo,*Kidie otọ rayen hirhephiyọ obo ri muẹ ohwo oshọFikirẹ ọlọkọ ro gbe arodọnvwẹẹ naKugbe fikirẹ ophu ọgangan rọyen.”
Eta rehẹ obotọ na
^ Vwẹ Hibru, “Nẹbukadrẹza,” idjerhe ọfa re vwo sio.
^ Yẹrẹ “ta kẹ.”
^ Vwẹ Hibru, “mi vrẹn edegburhiọke je ta ota kẹ ovwan.”
^ Vwẹ Hibru, “o vrẹn edegburhiọke je ta ota kẹ ovwan.”
^ Vwẹ Hibru, “Nẹbukadrẹza,” idjerhe ọfa re vwo sio.
^ Ọ họhọre nẹ ọnana odẹ ọfa re vwo se Bebẹl (Babilọn) rere ihwo vwo jẹ riẹn nẹ ọyen yen e se.
^ Yẹrẹ “ifatalaiza.”
^ Yẹrẹ “ọmọ rẹ okpohrokpo ro vwo ẹton ohọre.”
