Jerimaya 20:1-18
20 Asaọkiephana Pashọ rẹ orherẹn na, ọmọ rẹ Ima, rọ je dia onotu rẹ isun na vwẹ uwevwin ri Jihova kerhọ ọke rẹ Jerimaya vwọ mraro kpahan erọnvwọn nana.
2 Etiyin Pashọ da ghwiẹ Jerimaya ọmraro na, ọ da vwẹ igoni* rehẹ asan Anurhoro rẹ Obenu ri Bẹnjamin, rọhẹ uwevwin ri Jihova na vwọ kanrọ.
3 Ẹkẹvuọvo vwẹ ẹdẹ rọ vwọ kpahọn rẹ Pashọ vwo si Jerimaya vwo nẹ igoni na nu, Jerimaya da ta kẹ nẹ:
“Jihova wene odẹ wẹn vwo nẹ Pashọ kpo Uguegue rọ ro Asan Eje re.
4 Kidie ọnana yen oborẹ Jihova tare, ‘Mi che ru we phiyọ obo re sua uguegue vwọ kẹ oma wẹn kugbe igbeyan wẹn eje, ivwighrẹn rayen ke cha reyọ ọlọkọ vwọ teyen ayen hwe vwẹ irharo wẹn; ki mi che phi Juda eje phiyọ obọ rẹ ovie ri Babilọn, ko che mu ayen kpo ighuvwu vwẹ Babilọn je vwẹ ọlọkọ vwọ teyen ayen hwe.
5 Ki mi che phi efe rẹ orere nana eje, ekuakua rọyen eje, erọnvwọn eghanghanre rọyen eje, kugbe efe rẹ ivie ri Juda eje phiyọ obọ rẹ ivwighrẹn rayen. Kẹ ayen cha vwẹ ogangan vwọ ghwẹ ekuakua eghanghanre rayen eje reyọ ji mu ayen kpo Babilọn.
6 Vwọ kẹ wẹ ri Pashọ kugbe ihwo eje re dia evunrẹ uwevwin wẹn, e che mu ovwan kpo imu. Wo che kpo Babilọn ji ghwu phiyọ oboyin, e che shi we vẹ igbeyan wẹn eje phiyọ oboyin, kidie wọ mraro rẹ efian vwọ kẹ ayen.’”
7 Wọ phiẹn vwẹ, E Jihova, wọ phiẹn vwẹ.
Wọ reyọ ogangan wẹn vwọso ovwẹ, wo de phikparobọ.
Mi rhi hirhephiyọ oborẹ ihwo vwọ jehwẹ vwẹ ẹdẹ na eje;Kohwo kohwo reyọ ovwẹ vwọ jehwẹ.
8 Kidie kọke kọke re me da ta ota, ki mi kperẹ phia ji ghwoghwo,“Ozighi kugbe oghwọrọ!”
Kidie ota ri Jihova rhi hirhephiyọ obo re nẹrhẹ ihwo yinvwaro kpahan ovwẹ je reyọ ovwẹ vwọ jehwẹ vwẹ ẹdẹ na eje.
9 Ọtiọyena me da ta: “Me rha cha ta ota kpahen Ọghẹnẹẹ,Me rha cha reyọ odẹ rọyen vwọ ta ota ọfaa.”
Ẹkẹvuọvo vwevunrẹ ubiudu mẹ, ọ da rhe dia kerẹ erhanre rọ la vwevunrẹ ibeku mẹ,Me rha sa yọnrọn ba omaa;Mi rhe che se chiro ọfaa.
10 Kidie mi nyo erharhe rẹ eta buebun;Oshọ riariẹ ovwẹ phiyọ.
“Jẹ a ta eta ebrabra kpahọn; jẹ avwanre ta eta ebrabra kpahọn!”
Kohwo kohwo rọ tanẹ ufuoma nene uvwe dia guọnọ eshe mẹ rọ vwọ tanẹ:
“Ọkiọvo o che brorhiẹn rẹ ẹkpa,Ọke yena kẹ avwanre che phio kparobọ ji ruo keri.”
11 Ẹkẹvuọvo Jihova vẹ ovwẹ herọ kerẹ ọgba ofovwin ro muoshọ.
Ọyena yen sorọ ihwo ri muẹkpahan ovwẹ cha vwọ kprowọ, ayen che se phikparobọọ.
E che ku omavovwẹ rode phiyọ ayen ẹro kidie ayen che phikparobọọ.
Ophọphọvwe rayen ri bẹdẹ cha sa chọrọ ohwo ẹroo.
12 Ẹkẹvuọvo owẹ, E Jihova rẹ otuofovwin fuẹrẹn ọvwata;Wọ mrẹ iroro rẹ obevun* rẹ ohwo kugbe ubiudu na.
Juvwe mrẹ ihriẹriọ wẹn vwẹ enu rayen,Kidie owẹ yen mi mu ẹdjọ mẹ rhe.
13 So une kẹ Jihova! Jiri Jihova!
Kidie o sivwin ogbere na* vwo nẹ obọ rẹ ihwo umwemwu na re.
14 Ekan kẹ ẹdẹ re vwiẹ vwẹ!
E jẹ ebruba dia kẹ ẹdẹ rẹ oni mẹ vwiẹ vwẹẹ!
15 Ekan kẹ ohwo rọ ghwẹ iyẹnrẹn esiri bru ọsẹ mẹ rhe tanẹ:
“E vwiẹ ọmọ vwọ kẹ wẹ, ọmọshare!”
Rọ da nẹrhẹ ọ ghọghọ gangan.
16 E jẹ ohwo yena dia kerẹ irere rẹ Jihova phikparobọ jẹ ọ darọọ.
E jẹ o nyo ukperi rẹ oviẹ vwẹ urhiọke kugbe edo rẹ ofovwin vwẹ oghẹruvo.
17 Diesorọ ọ rha teyen ovwẹ hwe vwevunrẹ uwevwiẹ naa,Rẹ evun rẹ oni mẹ da dia kerẹ ushi mẹRẹ evun rọyen vwọ rho ọkieje kerẹ ohwo rọ mrevun?
18 Diesorọ mi vwo nẹ evun rheRhe mrẹ ukpokpoma kugbe omaemuophiyọ,Ri mi vwo ghwu ughwu rẹ omavovwẹ?
